NKUMBUYE WA UVAVASO 3

Israeli Avinga Mangyi Ogu

(Mee 21:31-35)

1Naasa lukainduka lukarwa na shia ya Bashani na Ogu akee mangyi ya Bashani keepoo fira we na vandu vakwe vai naambo nakapane neese kulya Edrei. 2Nndumi Iruva kashivia, kulamwiiryae-fo, mashika shammuvika maakony afo, we na vandu vafo na uruka lwakwe, neewe mmbo kushentannyaa shaasa kuletannya Sihoni wa Vaamori ulya ekee Heshboni. 3Naasa Nndumi Iruva, weeru kavika Ogu maakony eru, na vandu vakwe woose, lukavakapa kulasaeu kindo. 4Lukatira miri yaawo myoose, ulasae nta umwi; nayo yeekee miri makumi arindaru, uruka loose lwa Arikobu yelo llo umangyi lwa Ogu wa Bashani 5Miri yeyo myoose mmbo yeetiri turuve shiikare shaasa, kukavekaafo na ilakee miikare miingyi. 6Lukailyamara deny, shaasa lulelyamara ilya ya Sihoni wa Heshboni llya lulelyamara-fo miri myoose yeyo yeetiri vandu womi na vaka. 7Lyo findo fyeevikya fyoose sanda na masaa a vayo mmbo lulefiipo fikava fyeru. 8Niindo luletira ngyuruka ta vamangyi yewo vavii va Vaamori vekee kwakulya ya Yordan, pookya imungo lya Arnoni kundekooya ifumbu lya Hermon; 9(na Hermon wo Vasidoni mmbo vaivaangaa Sieirioni na Vaamori vakaivaanga Seniri); 10miri myoose ya kyaandeeny, na Gileadi shoose, na Bashani shoose, kufike Saleka na Edrei, nnyo miri ya Ogu wa Bashani. 11(Na nndu ensaafo kwa Varefai ni Ogu muni, we mangyi ya Bashani, kwiishi, kitara kyakwe mmbo kyeekee kya minya, na kitara ekyo (alerikwa-fo nkya iwe) kikatira waasha lwa meta yiinya na ivari meta ivii, nakyo kikee kwa Vaamoni kulya Raba).

Ngyufari Tilesamya Taari ya Ngama ya Yordan

(Mee 32:1-42)

12Neese lukatira uruka yelo, uka Aroon kukee imungony lya Arnoni na kyenga kya uruka lwa fidooro lwa Gileadi na miri ya vayo, yo lukainiinga ufyari lwa Ruben na lwa Gadi, 13na miri ya Gileadi yeyo ilesaau na Bashani shoose, llo umangyi lwa Ogu, shaniinga vana va Manase maata, uruka loose lwa Arikobu na Bashani shoose. (Uruka yelu mmbo luvangwaa uruka lwa Vavefai. 14Yairi mwana wa Manase mmbo aletira uruka loose lwa Arikobu fika nnyanuny wa Vageshuri na Vamaaka, katifishya marina ni Hawat-yairi fika inu, nato nto ta Bashani). 15Na Makiri shaniinga Gileadi. 16Na vana va Ruben na va Gileadi shavaniinga uka Gileadi fika imungo lya Arnoni yoo nnang'ani kundekooya mura wa Yaboki nto nnyanu wa Amoni, 17na uruka lwa Araba, na mura wa Yordan, uka Kinereti fika yeeve lya Araba, nnyo yeeve lya shumbi, na taari ya ngama mfo mafuumbu a Pisga.

18Shavakumbura lyingyi sheelyi Nndumi Iruva, weeru mmbo aleluniinga uruka yelu luve lweru, nkyo ulaalu veepo fisha fyawo vakillye mura ando amwi woose yewo vakee vakaari. 19Lyo vaka vany na vana na findo fya mmba (mashika shiishi shamanya mutiri findo fyeevikya fiingyi), wo na findo efyo fisaa mbele kunu miriny ilya mukai; 20Kutani elyi Nndumi Iruva ashewonisyaa vanavamaye vany kirembo urukeny yelo alevaniinga, llyony neeni muwuye wo nndu alya shilemmaa imwaavya. 21Naasa llyo shilevavasya Yosua, shammbia, Miso any alelollya nisha shaasa Nndumi Iruva, Iruva waany aletannya vamangyi valya vavii, nalyo niindo-da ashetannyaa wo umangyi elo mushekooyaa efo mukeeruuka nafo. 22Mulavairyae-fo, mashika Nndumi Iruva, Iruva waany mmbwe yeto akeemukapannya.

Mose Eemo Yaanga Kanaani

23Naasa kyeeri ekyi shafiirya Nndumi Iruva ndi, shammbia 24Woi Nndumi Iruva, ulaalu mmbo kukeeyoora ishinga lyafo ulyimbi lwafo, na woko lwafo shaasa lutiri finya, mashika nkwi kunu ulaniny ao efo Iruveeu kukee Iruva ashiidimaa itana mashora a finya avakye yoo afo yewe. 25Neeny mmbo shakutereva woi mmbe, shiruuke Yordan shilole uruka yelo usha, na ifumbu elyo isha, na Lebanon. 26Lyo Nndumi Iruva nalashaarannyi mashika llya emmisua neeny kyeendwa nnyeni kashivia, Naasa ra kifye! Kulakisende kindo ekyi-fo. 27Kyasia saama ifumbuny lya Pisga kwiimaiye-fo taari ya nkwaany na taari ya ndoo, ya sinde, na taari ya ngama, kulole-fo, mashika yewe nkukillya mura yeu wa Yordan-fo. 28Lyo vaanga Yosua kunkaarise nakaarye, mashika mmbwe asheruutaa vandu yeva, na uruka yelo shakuvia kulwiimaiye mmbwe ashevafitaa-fo. 29Naasa lukakaa yoo imungony kufii na Beth-peori.

Currently Selected:

NKUMBUYE WA UVAVASO 3: MAS2

Highlight

Compare

Copy