NKUMBUYE WA UVAVASO 19

Kirisshony

(Mee 35:9-34; Yos 20:1-9)

1Kyeeri Nndumi Iruva, Iruva wafo ashemamitaa vandu va ngyuruka eto Nndumi Iruva wafo ashekuniingaa, neewe kushetiraa neekaa efo miriny yaawo, 2rauwa-u miri iraru ikae yoo nnang'ani ya uruka elo Nndumi Iruva, Iruva wafo akuniinga. 3Yoo nnang'ani vika-u shia yeerauwa uruka lwafo elo Nndumi Iruva, Iruva wafo akuniinga avaan fyenga firaru naambo nndu awaa nndu ungi kya nsindara nalature ando eerishya. 4Na uvingo lwa nndu awaa nndu, mmbo lukee indi, mwiwaa kanrishya-fo mmbo amwekya, yeto mwiwaa nalawaaye, nta nalansunye. 5Nsha elyi vandu vavii vakupoo indemanya ngwi nsitony veerye kyaara, kyaara kikafuma efo munyiny kikawaa yeto ungyi, naasa nndu yeto narishye efo miriny yeyo ikee mirauweu; 6naambo yeto alewaa nalasheetaiyo kiduva ni yewo veni nndu mashika a unyafi, mashika nalatiri usumanu lwa immbwaa, kimmba kolore eetiri nawe kiduva. 7Kimaruma kya efyo, shakuvavasya kurauwe-u miri iraaru ya vandu. 8Na kwakooya Nndumi Iruva wafo asembera nnyanu wafo shaasa alekuvikya kyaasa na vamiku vafo navaniinge uruka elo. 9Neewo kwaringany mavavaso akwe shaasa nkeekuvia inu, kwiikunndye Nndumi Iruva wafo neelatya shia yakwe, engerau miri ingi iraru ando amwi na ilya ingyi iraru; 10naambo nndu nalatiri kiteve nalasheewaawa efo urukeny lwafo Nndumi Iruva wafo alekuniinga. 11Lyo kwakooya nndu asswa ungyi nawe kallaya neenkapa kafwa, neeto mwiiwaa karishya miriny yeyo umwi wa vayo, 12vamiku va muri wakwe varumi vandu vandembiira, navikwa maakony a veenrumbuya nataiyo, nawe nawaawa. 13Lola kulashelyamarya, yeto nalatiri usumanu nauke efo Israeli naambo muwone iviiri yaa ulaniny.

Minyanu

14Lola kulasembere nnyanu ukeembike ni valya vamusongoye, neewe kwaukooya yaa urukeny yelo kuleniingwa ni Nndumi Iruva, Iruva wafo.

Vakureeki

15Nkureeki umwi nnyamaa yuuta ukureekyi kya uravi lwa nndu ungyi-fo, nkuti vakureeke-u vandu vavii ao vararu. 16Kwakooya nkureekyi nkasha oota ukureekyi kya isswa nndu, 17llyo yewo vavii vakeekapana vashesaleswaa mbee ya Nndumi Iruva, yoo mbee ya makohani na veerummbwa myaandu, 18nawo vasununde deny, neelyi valollyaa dede yelu ni nkureekyi lwa wongo nawe koota ukureekyi lwa wongo ifota nndu ungyi, 19naasa llyo mushenrumbuyaa shaasa we muni eekunndye yeto ungyi natannyo, indo llyo kusheutaa uravi mnang'ani yaany. 20Neewo vashiitaa woose mmbo vashiiryaa vare valatana kindo sheekyo. 21Nta mulavalyilye-fo, muu mmbo utawaa mmuu, neeriso lyitawa niiriso, lyoo neeyoo, woko na woko na urende kiwo lutawo na urende.

Currently Selected:

NKUMBUYE WA UVAVASO 19: MAS2

Highlight

Compare

Copy