NKUMBUYE WA UVAVASO 17
17
1Kulashishye Nndumi Iruva, Iruva wafo ng'umbe ao suva yitiri mfere-fo, mashike ekyo nkindo kitefusu kwa Nndumi Iruva, Iruva wafo.
2Na kwakooya efo kwany urukeny kulevikwa ni Nndumi Iruva, Iruva wafo kushelollyoo-fo nndu wa kyuumi ao wa kika, atanaa meesi mbee ya Nndumi Iruva, Iruva wafo. 3Kava mwiinndya maruva a wongo, ao nkyeere na mwiiri, a findo fya efo ngini-u, 4neewe kwavio, llyo kushekutakuraa iruuya kwakooya ni kindo kya dede, uravi lwa ngata yeyo lwatanwa kunu Israeli, 5llyo kushesomutaa nndu yeto efo poo ya muri, kava nndumi ao nka, nakapwa na mawe kutani afwa. 6Yeto mwiiwaawa nawaawa kyuukana na vakureekyi vavii ao vararu, nalawaawa kya ukureeki lwa nndu umwi-fo. 7Maako a vakureekyi yewo akae uwe yakwe, numa ave maako a vandu woose. Indo llyo uravi lusheutwaa kwany.
8Kwakooya kwaonisa mbony shiroo ikakwiilanya, ikwaani na nndu na mwanamaye na yaavana masaa, ao nndu aafinya ungyi, vakawaanyana, naasa yewe kwiipoo kweende mbee ya Nndumi Iruva wafo, 9kurereny na makohani na Valevi na mwiileta myaandu, kuvavese, nawo mmbo vashekooraa ando usumanu Lukai. 10Neewe llyo kutaniny shaasa vakoora, neewe kuve kutanaa indo. 11Shaasa vakooraa uramba lweerummbwa myaandu na usumanu lwa vayo nta kulashaalashaa. 12Na nndu ara nalasora shaasa oorwa ni nkohani yeto mwiirunndya Nndumi Iruva, Iruva wafo, ao mwiirummbwa myaandu, nndu yeto ifwa nafwe, naambo uravi lumande kunu Israeli. 13Nkyo na vandu woose vashiita vaereye vare valaimmbwa indo.
Uramba Lukwaani na Mangyi
14Elyi kusheangaa efo urukeny elo Nndumi Iruva, Iruva wafo akuniingaa, kukaefo, naasa kwambeny, Shikunndye ivika mangyi, sha vandu wa masanga engyi yoo aluringitye, 15lola kulare kulavika yeto Nndumi Iruva, Iruva wafo akooraa nawe mangyi, nawe nave umwi wa vandu vafo, nta nalave nndu muny-fo. 16Nta nalafumbute frasi takwe-fo, nta nalaviire vandu na Misri-fo, mashika Nndumi Iruva, Iruva mmbo aleamba, “Pookya ulaalu mulawuye na numa-fo.” 17Nta muloore vaka veengyi-fo mashika mmbo vashemufulutaa mirima yaany, nta mulatire waafu lwa fesa tany nta saabu. 18Na kyeeri mangyi ashevikwaa nkuti natire kyitabu kya mbony yeti, shaasa kitirwa m Vakohani na Valevi, 19nave mwiikuloshafo kyeeri kyoose akee na muu, nakuloshefo yiinndya Nndumi Iruva wakwe, eesoraa marero moose a mavavaso yaa. 20Nalasheona ikurosa mbee ya vandu vengyi neemina mavavaso, llyo asheonaa suku shiingyi efo umangyiny lwakwe we na vana vakwe kunu Israeli.
Currently Selected:
NKUMBUYE WA UVAVASO 17: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
