NKUMBUYE WA UVAVASO 15

Mwaaka va Mfungare

(Val 25:1-7)

1Masiiyony a wo mwaka wa mfungare sarya sye toose. 2Mmbo mtanaa indi, wo umwi nasarye nalakivese-fo naakwa ava nndu wa kwake, yelo ni weele lwa Nndumi Iruva lwakapwa lweesarya. 3Muny we kushiidimaa yeengera immbesa, lyo mwanamau nkuti kunsarye sye. 4Indi kwany nkushekaafo nturi mashika Nndumi Iruva akuvikyaa mbora kya dede urukeny elo akuniingaa we Nndumi Iruva, Iruva wafo. 5Naasa arannya unyanga lwa Nndumi Iruva wafo na usau, kulatye efyo nkeekuvia inu. 6Llyo Nndumi Iruva wafo ashekuvikyaa mbora shaasa alekuvia, kwaarye vandu veengyi findo nta yewe nkushaakwaa-fo, kushillye vengyi nta mbakushillyaa yewe-fo.

7Kwakooya avonika-fo nndu nkiva efo kwafo nnang'ani a vana va mau efo poo kwafo urukeny elo Nndumi Iruva, Iruva wafo akuniinga, lola nnu kulasheemuumisya nrima na ilema imooroya woko mwana mau eto nkiva. 8Lola kumooroye woko kumwaakuye yefyo fimaa imwaauwa yoo ngatareny yakwe. 9Kukwiise nnu kulasheerera marero nalasumani kwishaambaa, “Mwaaka wa mfungare nkufii, nto weevesa sye, kure kulaniinga mwanamau kindo, nawe elyi ashefuuyaa Nndumi Iruva mmbo kivaa kyuumu kyafo.” 10Niinga mwanamau efyo fyamwaanguya nta nrima wafo ularovyo-fo, mashika Nndumi Iruva wafo mmbo ashekuvikyaa mbora kyeendwa nkyo efo mashoreny afo moose yoo kushearundaa. 11Mashika vaturi mmbakaa vamande ikaafo-fo na kukafika llung'anu, nkyo kyeende shakuvia, “Oroya mwanamau woko, elyi afikyo mfindo, na nndu nturi kiwo.”

Uramba lwa Ikaa na Mashinga

(Yuu 21:1-11)

12Kwakooya nndu nndumi ao nka Mweebrania akumbwa kwafo nawe kakurunndya ando a myaaka irindaru naasa, mwaaka wa mfungare lleke neende kyakwe. 13Neelyi kwammuleka, kulanre neende na maako aruu-fo. 14Lola kindo kunniingaa efo usirony lwafo, neefo mbesheny kwafo na vakori nyafo, nniinge kiinani na mbora Nndumi Iruva, Iruva wafo akusimbye. 15Neewe kummbwa shaasa kweekee ishinga urukeny lwa Misri, Nndumi Iruva, Iruva wafo kakwaauwa-fo, nkyo arannya shaasa nkeeikuvavasya inu. 16Nkyo elyi ishinga akeekuvia nshikuraa yewe na vandu vafo-fo, mashika elyi akukunndye kakaau nisha. 17Llyo kusheipoo mfuma kudoshe kuri kakwe nawe nave wafo deny. Na kya kishinga kyevetana indo. 18Nta kulasheerovyo kwakooya akunda yuuka kwafo, kimmba ankurunndya myaaka irindaru sele ewaryaa weesi kavii ya nndu wa weesi. Nawe Nndumi Iruva wafo mmbo ashekuvikyaa mbora findony fyafo fyoose.

Ngashe ta Mbee ta Ng'umbe na Moonri

19Ngashe toose ta mbee efo ng'umbeny tafo na moonriny afo mfya Nndumi Iruva wafo Iruva, nta kularunde nafyo mashora engyi-fo; nta ifisema mafwaa-fo. 20Mmbo kushefilyiiyaa yoo mbee ya Nndumi Iruva, yewe na va poo yafo. 21Lyo kwakooya kyikee kitongororo ao kifiiye miso, kulakiniinngye kwa Nndumi Iruva-fo. 22Mmbo kulyiyaa efo kyeny kwafo, kilyiwa ni yewo varini na valakee varini, shaasa mulyee kinamburi na iluny. 23Lyo loleny mulasheena samu ya vayo-fo, yo ipusuyo si sha mura.

Currently Selected:

NKUMBUYE WA UVAVASO 15: MAS2

Highlight

Compare

Copy