NKUMBUYE WA UVAVASO 14

Kyeeri Nndu Afiiyyo

1Yeni mmbo mukee vana va Nndumi Iruva, Iruva weeru; kyeeri mukee kiiyony muloote ivoya shaasa vengyi vatanaa-fo. 2Mashika yeni mmbo mukee vandu veele va Nndumi Iruva, wafo, neeni Nndumi Iruva mmbo alemusauwa muve vandu vakwe, torya ngota vandu vengyi woose yaa ulaniny.

Findo Fitefusu na Filakee Fitefusu

(Val 11:1-47)

3Nta kulalye kindo kitefusu-fo. 4Nyama mulyaa nnya ng'umbe, na yoonri na mburu, 5sanga na iluny na sarya, na iputu, na finamburi, 6na wo ngata yeto tikwaavye tiparikye mbungashu, tirafunnyaa mura nto mulyaa. 7Kyeendi yefi filarafunnyaa mura mulalye-fo, na mbungashu ta vayo tikwaavye ni ngamula, sungura, mmbo fikee fitefusu kwany, 8na nguve nayo ikwaavye mbungashu, lyo nnyirafunyaa mura-fo, nkyo nguve nshitefusu, mulalye nta mulaipaane naakwa ifiiye-fo. 9Na yefyo fya mureny ni efi mulyaa, mfyo efyo fitiri maaru na malalu, 10lyo ekyo kilakee indo mulalye-fo, nkitefusu.

11Ndeye toose tilakee shitefusu kulyiiyeny. 12Lyo ndeye yeti mulatilye-fo, 13nto uviri na ngoru, nansha, na yeto titivakye, 14na makukuru a ngata toose, 15na nyaa, na nnyinyiro na ngata ta vayo toose; 16-18na mafururu a ngata toose, na mamunyunyu 19na makuru moose atiri maaru lyo akakuruffwa efo si, mulalyefo. 20Lyo ndeye yeto shisha kulyiiyeny.

21Loleny mulasheelya kindo kyoose kyafwa tin, lyo muny akee kwafo we nakullye, ao kukummbye veny, mashika lyo yewe mmbo kukee ufyari weele lwa Nndumi Iruva wafo. Kulashishe ngurana ya mburu ao yoonri ikeyoonga-fo.

Uramba lwa Kyenga kya Ikumi kya Fimu

22Mulare mulauta firaso fya kyenga kya ikumi-fo kuuta efo fimuny fyafo fyoose-fo, wo mwaaka tana indo. 23Enda mbee ya Nndumi Iruva wafo yoo akuvavasye kusenndyeu irina lyakwe, kweendeu firaso fyafo fya kyenga kya ikumi fya fimu na mfinyo, na mafura, neefyo fiwonikye fya mbee fya ng'umbe na mburu na moonri, elyo llyo ikulosha yiinndya Nndumi Iruva wafo kyeeri kyoose. 24Na elyi kwakooya kyaaro nkyaasha ikooya ando yoo Nndumi Iruva wafo akusawuye nakuvikyen mbora, 25llyo kufyaalasha fyaaluke fesa kweende nato fika yoo Nndumi Iruva wafo akuvavasye, 26na fesa yeto ura nato kindo kyoose, ng'umbe ao mburu ao suva shaasa kukundaa, kundelyiiyan yoo mbee ya Nndumi Iruva wafo, kufuryeny yewe na va mmba yafo; 27na Llevi yeto akee kwafo kulanrekyo, ni elyi nalatiri ding'u sha yewe.

28Masiiyony a wo mwaaka wa kararu, uta kyenga kya ikumi kya findo fyafo fyoose, 29kimaruma kya Llevi elyi nalatiri ding'u ingyi, na kya muny akee kwafo, na nka wa ding'u na mwana wa ngwera, naambo valye neewuura, naambo Nndumi Iruva, Iruva wafo nakuvikye mbora efo mashoreny moose a maako afo.

Currently Selected:

NKUMBUYE WA UVAVASO 14: MAS2

Highlight

Compare

Copy