NKUMBUYE WA UVAVASO 13
13
1Naasa efo kwany kwakooya ashekuboo-fo nkisuku ao mwooriya moorya nawe natani kirinyiswa ao ngyende, 2nakyo kyikava shaasa aamba, namuvieeny, “Ulaalu lulatye maruva engyi, lueendye,” 3yewe kulaarannye marero a nkisuku yeto-fo, ao a mwoorya moorya-fo, mashika ekyo nsha kyeeso Nndumi Iruva, Iruva wany amurikya nalole kwakooya munkundye kifye inda efo miriminy yany. 4Vallyeny na Nndumi Iruva waany, mwiinndyeny muveringa mavavaso akwe, na yaarannya unyanga lwakwe, mundundye neekutira nawe. 5Naasa nkisuku yeto ao mamoorya yeto nawaawa, kimmba aamba findo filasumani kwa Nndumi Iruva, Iruva waany, yeto alemuuta kulya Misri, kakuwouwa kulya mmba ya ushinga, neeto vai mmbo akunndye ikweeveta nakuute shieny yeyo Nndumi Iruva alekoora kuisore. Yeyo nnyo shia ya yuuta uravi efo kwany.
6Ao kwakooya mwanamau, mwana wa mau, ao mwana wafo, ao mfu wafo, ao nka wafo nkunde, ao mbuya yafo ya nrima, akuvia Nnde lundeinndya maruva meny kulaeeshi, 7shaasa vandu yewo va ngyuruka tingi vatanaa, vakava vakufii ao vakwaasha, 8nndu sha yeto kulamwaarannyi-fo nta kulamwiirikye-fo, na kulansarye fo, nta kulanre-fo, 9nkuti kummbwae, woko lwafo lusonngwe inkapa, llyo vengyi vasoryeny. 10Nkapeny na mawe kutani afwa, kiimmba eekunndye ikweveeta kuuke kwa Nndumi Iruva, Iruva wafo, yeto alekuuta kulya Misri ushingeny. 11Llyo na Israeli woose vashiitaa vakooye yiiryaa, vare valatana kindo kiroo kwawo.
12Naasa kwakooya kweeta sheelyi efo miriny yeyo Nndumi Iruva, Iruva waany ashemuvikaa-fo, 13kwansha-fo maraami a vandu, nawo vakeeveta vandu, veshaambaa, Syeny lundeinndya maruva a wongo 14naasa yewe llyo kuvesaany neeruuya, kwankooya niindo dede, neewe kwalollya dede uravi yelo lwantannyika, 15Naasa vandu va muri yeto vawaawa noosu vamamitwa deny, na findo fyawo na findo fyeevikya nafyo, fiwaawa. 16Na findo fyawo fyoose fisanyiryo yoo shia, na muri yetu ukorwa na muro, five sha kiraso kyeekora na muro, lyo muri yeto urewa irama, ulakitanwase-fo 17Kulaipoofo kindo kyoose kikee kitefusu-fo, naambo unyafi lwa Nndumi Iruva lulasheekusheya, nawe llyo akulyilyaa neekufumbuta shaasa alevikya vakuu vafo kyaasa, 18kwakooya kwaarannya unyanga lwa Nndumi Iruva, wafo kwiilatyaa mavavasyo akwe yaa nkeekuniinga inu, kutani efyo fisenyi Nndumi Iruva wafo.
Currently Selected:
NKUMBUYE WA UVAVASO 13: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
