NKUMBUYE WA UVAVASO 12

Ando Kumwi kwa Mwiindye

1Yaa nng'u mavavaso na usumanu musheringaa kyeeri ekyo mushaangaa efo urukeny yelo Nndumi Iruva, Iruva wa vandeye vany alemuniinga. 2Mmbo musherumataa andokoose yoo vasongosie kwa yiinndya maruva awo, ando koose efo mafumbuu na ando engyi koose. 3Rumateny na mafwanu yoo awo mwaakore na muro, neeto teebasha na marina awo aangaten-fo deny. 4Nta mulandetane shawo kyeeri mushiinndyaa Nndumi Iruva, waany 5yoo Nndumi Iruva, Iruva waany, ashemooraa nng'u mushesenndyan irina lyakwe, nng'u mushevikyaa miso mundeindyan 6muverwaa-fo firaso fyany fyeekora na muro, na firaso fya ngata toose fya maako any, firaso fya kyaasa na fya pya, na findo fiwonikye fya mbee, maronda any a ng'umbe na a moonri. 7Mmbo mushelyaa shoonga tany mukee na Nndumi Iruva waany, na wo kindo mubaanaa na maako any mufure nakyo, yeni na va kyen kwany shaasa Nndumi Iruva amuvikyaa mbora. Efo mukeenda 8mulashetana shaasa muketana yaa, wo nndu shaasa alollye we muni-fo; 9mashika mmulefikya ifura elyo shaasa Nndumi Iruva wafo ashekulyimmyaa-fo.

10Naasa kyeeri musheruukaa Yordan neekaa efo urukeny yelo Nndumi Iruva wafo ashekuniingaa, namwiimurise neemwaauwa ngatara yeekapana na vakiduva vany, mukukaye sau, 11kyasia yoo Nndumi Iruva waanyashesauwaa namuvike, nng'u musheendee wo kindo shaasa nkeemuvavasya inu, firaso fyany fyoose, fya ngata toose, efo musheutyaa Nndumi Iruva, Iruva waany. 12Neeni na vana vany na varundi vany veny veefura na Nndumi Iruva waany, na Llevi akee kwany, mashika elyi Llevi nalatiri ding'u efo kwany. 13Lola nnu kulasheuta kiraso kyafo kyeekora na muro ando ni ando-da yoo kwalollya kumuni, 14kwikee yoo kweni Nndumi Iruva wafo ashekooraa, nng'u kusheutyaa firaso neefyo fyoose nshekuvavasyaa. 15Ando amwi neefyo mmbo kutiri muumu wa ishisha nyama neelyiyya efo mmba kwafo, shaasa kwakunda, filya Nndumi Iruva wafo akulyimya nndu moose akee nrini ao nalakee nrini, mmbo vakulyiyyaa nyama ya iluny ao kinamburi. 16Lyo samu yo mulaini-fo, ipusuyo-si sha mura. 17Kulasheelya waavi lwa ikumi lwa fimu ao mfinyo, na mafura, na lwa efyo fiwonikye fya mbeo fya ng'umbe ao moonri, ao nta fyaasa fyafo, ao firaso fya kyaasa. 18Lyo shoonga tany mmbo mushelyaa na vana vany mukee na Nndumi Iruva, Iruva wany yoo ashemuvikaa yewe na vana vafo va kyuumi na vakyika na ishinga lyafo na Llevi akee kwafo, kufure na Nndumi Iruva, Iruva wafo ando amwi na umasi lwafo loose. 19Lola nnu kulasheerekyo Llevi nta lyimwi kyeeri kyoose kukee na muu.

20Naasany kyeeri Nndumi Iruva, Iruva wafo ashekweengeryaa uruka lwafo shaasa alekuvikya kyaasa, mmbo kusennywaa kwaambe, Inu shilanngye ilya nyama, naasa kulyiiye indo shaasa kulanngye, 21Na yoo Nndumi Iruva, Iruva wafo ashekooraa kweemwiinndya. Kwakooya kukee kwaasha mmbo kusheshishaa ng'umbe ao suva kuuta efo findony fyafo, kulyiiye yoo mmba kwafo, shaasa kwakunda kumuni. 22Shaasa kwalya nyama ya iluny na kinamburi ni indoda neewo, woose vakee varini na valekee varini. 23Lyo kulole kulani samu mashika nnyo muu, neewe nkutiri muumu weelya muu amwi na nyama-fo. 24Samu mulani-fo mmbo kushiipusuyaa-si sha mura. 25Kwantana indo yewe na vana vafo lyo mushevikyoo mbora yewe na vana vafo elyi mwatana efyo Nndumi Iruva akunndye. 26Lyo findo fyafo fyeeninga Nndumi Iruva mmbo kufirwaa ando a yiinndya, kwiinutyen fyaasa fyafo. 27Kuniinngye-u firaso fyeekora na muro, nyama na samu yoo uwe ya kitara kyeerasya, samu ya firaso kwiipusuye yoo kitareny kyeerasya, lyo nyama ya vayo kuilye. 28Findo efi nkeekuvia fyaarannyi kufiringe naambo kukooye ivikyo mbora yewe na vana vafo llung'anu, kimmba kwatana mesha akasennya Nndumi Iruva wafo.

Wiikimbi lwa Iindya Mafwanu

29Kyeeri Nndumi Iruva, Iruva wafo ashemamitaa vakiduva vafo efo kukeenda naambo kuwoni-fo mwaanya, 30lola lyo kulasheetana sha wo, nta kulavese mbony ta maruva awo shaasa eekai, kwaambe “A mmbo veeshiindyaa inda? Naambo neeny shikusare indo.” 31Kulasheetannya Nndumi Iruva wafo indo-fo mashika efyo Nndumi Iruva afisuuye mfyo valetana ando amwi na vana vawo vakootya maruva a wongo firaso fyeekora na muro.

32Efi shiifo shimuviaa fitaniny fyoose; kulaengerye nta kulanyiise-fo.

Currently Selected:

NKUMBUYE WA UVAVASO 12: MAS2

Highlight

Compare

Copy