NKUMBUYE WA UVAVASO 11

Uniini lwa Nndumi

1Kimmba niindo, kunda Nndumi Iruva Nndumi wafo neesora ufundo lwakwe wo nkonu, na mavavaso akwe na usumanu lwakwe, neefyo akuvavasyaa. 2Yeni inu manyiny, mashika nshi nkeerera na vana vany valaishi-fo, nta kulaore valellollya ngapo ya Nndumi Iruva-fo, na uniini lwakwe na woko lwakwe lwa finya, lurundaa mashora, 3na ngyende takwe na filya aletannya mangyi ya Misri we Farao, na uruka lwakwe, 4na shaasa aletannya itorito lya va Misri na farasi tawo, na mitika awo, na shaasa alevaalaluya kulya yeeveny ya Shamu llya vekeemuvinngya na shaasa alevarumatya-fo, neeni mukumbuye fika inu; 5na filya alemutannya yeni alya mbai ya nruva, kutani mwashefika yaa mukai, 6kummbweny na shaasa aletannya vana valya va Eliabu wo Datani na Abiram va ufyari lwa Ruben shaasa mulelollya sumbai ivamira, amwi na vakyeny kwawo na meema awo, na wo kindo kyawo kyekee na muu, 7Nang'u miso any mmbo alelollya mashora maniini Nndumi Iruva aleatana.

Mbora Tikee Urukeny lwa Kyaasa

8Nkyo mukalatya efi fyoose nkeemukumbura inu, muwoni finya neevangiswa yaanga urukeny elo efo mukeenda. 9Llyo na suku tany tishevaa shiingyi efo urukeny yelo Nndumi Iruva aleniinga vande vany na ufyari lwawo lwa numa, llo uruka lwiishwe malela na wuki. 10Mashika uruka yelo efo mukeenda nshi uruka luvakye Misri kulya muleuka-fo, kulya mmbo mweevaaya neenisa mfongo sheelyi munisaa kyaawu kya nyany. 11Lyo uruka yelo efo mukeyenda mmbo lukee lwa mamungo na fidooro nalo mmbo luniswaa ni mmbwa ya iruveu tupu. 12Uruka yelo mmbo lulelwaa ni Nndumi Iruva muni, nawe nng'u avikye miso akwe kyeeri kyoose kya mwaaka.

13Na elyi mushearannya mavavasyo akwe na nrima yoo nkeemuvia ulaalu mukunde Nndumi Iruva waany, neendunndya na mirima yaany myoose na ngoo shoose, 14llyo neeny nshemoolotyaa mmbwa ya uruka lwany na kyeeri kya vayo, mmbwa ya kisie na ya mateeri, kwiilule shoonga tafo, na misabibu yafo na mafura. 15Neeny shikuniinge mare a findo fyafo fyeevikya, neewe kuwoni shoonga yakumaa. 16Kwiiseny mulasheelembika musore maruva engyi nta yaafiirya ndi. 17Kyikava indo llyo Nndumi Iruva ashemwiimaa mmbwa na uruka lwany luture fimu fya vayo, neeni murumake na yuuka ulaniny efo urukeny Nndumi Iruva alemuniinga. 18Kyasia aranyiny marero akwa nisha, mwaafingye yoo wokony avekaa yoo mbee ya miso any kyeeri kyoose. 19Muvelosha vana vany efo kyeny, elyi mukee efo shia, na kyeeri kukeelala na elyi kwakwiipoo. 20Na lyingyi marero yaa areiye yoo mwaangony wa mmba, 21naambo mwaakummbwe na suku tany na ta vana vany tikooye iva shiingyi urukeny elo Nndumi Iruva waany amuniinga, kyeeri kyoose. 22Kwakooya mwalatya mavavaso yaa moose nkeemuniinga, mukunde Nndumi Iruva weeru neelatya shia takwe neenkunda, 23llyo Nndumi Iruva asheumbutaa vakiduva vany efo mbee yaany neeni mmbo mushevailannyaa neevashillya. 24Na wo ando mushevaryaa mmbo kuvaa kwany, pookya kasa eko na Lebanoni, pookya mura wa Frati fika yeeve lya taari ya nkwaany, kuve nnyanu wany. 25Nkwifo vandu vashiindimaa imusiika-fo, Nndumi Iruva waany mmbo asherumata efo koose mushiiraa, shaasa llya alemuvia.

26Lolente yoo mbee yaany mmbo shavika-u mbora na kidengo; 27muwonise mbora elyi mwasora mavavasyo a Nndumi Iruva, Iruva weeru, ya nkeemuninngya inu, 28ao kidengo kimukooye elyi mwara mavavasyo a Nndumi Iruva, Iruva weeru neesora shia ingyi, yeyo ya maruva engyi mulaeeshi nta.

29Naasa elyi Nndumi Iruva, Iruva wafo ashekufitaa efo urukeny elo, saama ifumbuny lya Gersimu kusenndye-u mbora na kidengo yoo uwe ya ifumbu lya Ebali. 30A yefo nshikwakulya ya Yordan? Taari ya nkwaany, urukeny lwa vakanaani efo Araba kuwandami na Giligali, mbai ya nsito wa More? 31Mashika mmbo muruukaa Yordan mwange urukeny elo Nndumi Iruva alemuniinga mwaange-fo mulutire luve lwany, 32Neeny loleny mulatye mavavaso akwe shaasa nkeemoora inu.

Currently Selected:

NKUMBUYE WA UVAVASO 11: MAS2

Highlight

Compare

Copy