VAKOLOSAI 4
4
1Na yeni vanndumi va vandu, tanyiny mashinga any fya usumanu na fya wiindi, mwiimanyaa sheelyi naakwa ni yeni mutiri Nndumi waany akee wa efo iruveeu.
Mavavaso
2Laleny shoovi nnu mwiiterevaa, ando amwi na yaana Iruva, 3muveluterevya neese kiwo, naambo Iruva naluruye mwaango wa irero lyakwe, luvambise kyama ekyo kya Kristo na nkyo ekyo kyileengye shafingwa. 4Naambo shikyoore paa shaasa kishisumanyi irera. 5Kaeny na urango kwa yewo valakee vakristo, mularetaa nta fyeeri. 6Marero any ave a mbora kyeeri kyoose, arolaa, muvemanya shaasa kisumani irouwa wo nndu.
Fiidikiro fyefurumya
7Tikiko we mwanamaye weeru nkunde akee nsaari na mwiakana neeny mashoreny a Nndumi, mmbo ashemoongoyaa mbony takwa toose. 8Nawe mmbo shanruma kwany kimaruma kya vayo, naambo mumanyi mbony teru, namuviirye nato muu. 9Mmbo ashaa na Onesimo mwanamaye weeru ungyi akee nkunde na nsaari, nawe mmbwa efo kwany. Yewo mmbo vashemuviaa mbony toose ta yaa kweru.
10Na Aristariko ulya alefingwa ando amwi neeny amwiidikira, ando amwi na Marko mwanamaye wa maye wa Barnaba, ulya mulevavaso mmbwe, naasany kansha mwaambyeny. 11Na Yesu yeto avaangwaa Yusto; yewo ni vandu va Kiyuda. Yewo wo veni ni vandu veakana neeny mashoreny yoo a umangyi lwa Iruva; nawo mmbo valeshiviirya nnu muu. 12Epafra ulya wa kwany, nawe akee ishinga lya Yesu Kristo, amwiidikira, nawe mmbo akeevina nnu kimaruma kyany imuterevya, naambo mukooye isalala na ivanga nisha shaasa Iruva akundye. 13Mashika mmbo nkenkureekya deny sheelyi mmbo akee ikuvinisa nnu kimaruma kyany na kya valya vakee Laodikia, na kya valya vakee Hierapoli, 14Na Luka ulya akee mwaanga nkunde, na Dema vamwiidikira nnu. 15Na yeni idikireny nnu siri ya Laodikia, na Nimfa, na siri yeyo ya mmba yakwe. 16Mukammaa isoma barrwa yei, niingyeny indesomwa se kulya siriny ya Laodikia, na barrwa ilya ya Laodikia nayo isomwa ni yeni. 17Vieny Arkipo indi, “Salallya nnu urundi yelu Nndumi alekurambikya naambo kulwiinutye.”
18Yefi mfyo fiidikiro fyakwa yeny Paulo shareiya na woko lwakwa shimuni. Mukummbwe nnu ifingwa lyakwa. Isarya lya Iruva lyimukaye yeni.
Currently Selected:
VAKOLOSAI 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
