2 TIMOTEO 3
3
Mikonu ya Ifurummya
1Lyo manya mbony yei, sheelyi kyeeri kya ifurummya mmbo kusheshaa mikonu yeeresye. 2Mashika vandu mmbo vashekukundaa wo veni, valange nnu fesa, vave vekurumisha veni, veekung'anisa, vearara, valashinndyaa vamiku vawo, nta valakee vandu va kyaanu, valakee va miriminy, 3valakundye va kyeny kwawo, nta valakundye isaryana na vengyi, vakava vevikya ureeree, valasiraa ngoo vakava vanyaasi, nta valalangye ngata shoose ya usha na umamiri. 4Mmbo vakee veeriingya vengyi, vakatira utiilyi, neekung'anisa, vakakunda lango ta mwiili ngota ikunda Iruva. 5Vakava sheelyi ni vandu vesha ate lyo mmbo valemmyi ekyo deny. Yewo woose kukwiise nawo. 6Nnang'ani yaawo mmbo kwiifony na valya vakwaataa efo mmbeny ta vandu, vakakamara-fo mifungwa vaka yewo varavi varye maryo a ulyamari, na ilamyo ni lango ta ngata shiingyi; 7vakakwiishivirya-fo indo wo nkonu naambo valasheefikya dede yeyo irye urango. 8Na kivaka llya Yane na Yambre valesalala na Mose kyellema, ni indo neeva mmbo vakelemana na dede yeyo; yewo ni vandu vallyamarikyo mmirwe, vakakaa kwaasha na mbony ta iirikyo. 9Lyo nshi vafikaa kwaasha nta-fo, mashika urung'ani elu lwawo lwammelollyo mmbandu woose, shaasa na urung'ani lwa yewo lulelollyo paa.
Kilossho kya Ifurummya
10Lyo yewe mmbo kulelatya ufundo lwakwa, na ngaa yakwa, na kilya shikundye itana, na iirikyo, na usisiryo, 11na ukundi, na ivereya, na ngatara eti takwa na makyiva yaa, na filya fileshikooya kulya Antiokia, na Ikonio na Listra, ngata toose ta ngatara yeto shiletisisirya; nawe Nndumi kashaauwa efo koose. 12Ee deny, neewo woose valangye muu mweele mmbo vasheminwaa. 13Lyo vandu vakasha na velemba vasheengeraa ikaafo, na yeengera iraveeka, velembaa neelembwa. 14Kyaindi yewe kutire na filya kuleloshwa neesununndyo, mashika kwiishi ni kwa vaki kulekulosha kwawo; 15neewe lyo uka udu lwafo mmbo kuleloshwa mareiyo meele kwaamanya, nang'u ng'u akurangusaa kuwoni ukiro lukuukya efo kikusiryony kwa Yesu Kristo. 16Mareiyo moose atiri Mumuyo wa Iruva mmbo avaa kwa ilosha, na kwa iikimba vandu makasha awo na kwa ivatetera, neevavika ngeeny ya songosiny ikee ya usumanu. 17Naambo nndu moose akee wa Iruva nasongovike neekaariswa naambo needimi itana findo fyoose nisha.
Currently Selected:
2 TIMOTEO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
