2 TIMOTEO 2
2
Nkureeki Nsaari va Yesu Kristo
1Kyasiany, yewe mwana-kwa wona ikaariswa ni isarya lya Kristo Yesu. 2Na mbony tilya kuletiita kwakwa kwiiyo vakureekyi veengyi, tirambikye vandu yewo vasaari yewo vashidimaa ilosha na vengyi. 3Sisirya ngatara ando amwi neeny, kuve sha nsikari nsha wa Kristo Yesu. 4Nkwiifo mwiikapana fira akwaata ngusaniny ta ulana elu needimi isenya yeto mwimmbika-fo. 5Na nndu mwiivakyana efo fitavanuny nnyawonaa ureto kanra nalavakyana kisumani-fo. 6Mmbo kikooye nremi ankwaatara na mashora akwe nasonngwe we iwona-u waavi lwakwe. 7Soongya nnu yeki nkeekuvia, mashika ni Nndumi ashekurangusaa kya findo fyoose. 8Nkye kummbwa Yesu Kristo ulya aleruka auka kwa vafu, akee wa ufyari lwa Davidi shaasa Nrumi ya Nsia yaamba. 9Neeny mmbo shilelyiswa ukiva kimaruma kya vayo kutani shifingwaa sha nndu mwiitana maravi; lyoony, irero lya Iruva llyivaa ifinga-fo. 10Kyeendwa llyo mmbo nkeesisirya fyoose, kimaruma kyeewo vasauwe, naambo nawo vakooye ukiro elo lweendwa ni Kristo Yesu, ando amwi na itumbe lya llung'anu.
11Ni irero lyisumani iirikyo deny.
Mashika kwakooya lwafwa nawe,
mmbo luverutwaa ando amwi nawe.
12Kwakooya lwasisirya,
mmbo lusheshillyaa ando amwi nawe.
Kwakooya lwankana we
naakwa niwe mmbo ashelukanaa yese;
13Kwakooya yese lulakusirye-u
we mmbo eengera iva nsaari.
Mashika we nnyashiidimaa ikukana we muni-fo.
14Nkye vakumbure mbony yeto kuvevaikimba na irina lya Iruva, naambo valashellya ulai lulatiri mbusha, yelo lulyamaraa yewo vearannya. 15Kaarya nnu yoora sheelyi ni Iruva akusauye, kwaveva nndundi nalatiri nyinyira, kwavesalallya irero lya dede. 16Kwiise nnu na marero a ing'ana alakee a ki-Iruva, mashika yewo mmbo vasheengeraa nnu na uravi, 17na marero awo mmbo ashekwaanaa ree sha itiinga ikasha. Vandu va ngata yeyo nsha Himenayo na Fileto, 18nawo mmbo valenreta ekyo kya dede, vakaveamba mwaandu wa ifurummya ulemmaa iira indo kyikava nkyo kyeeveta iirikyo lya veengyi. 19Kyaindi lyo irero lya Iruva lyivangyi, lyikavikywa na kiringisyo ekyi, kyeyaamba,
Nndumi eeshi yewo vakee vakwe,
na kingyi-se,
yeto moose mwiisenda Irina lya Nndumi nare uravi lakwe.
20Kyasiany efo mmba ya Nndumi nshi kwiifo fiiya fya saabu na fya fesa-da-fo, kuveefo na fya firi na fya uteeri, fingyi fitiri nnduma deny, na fingyi mfitiri-fo. 21Naasany kwakooya nndu akusongosye elyi akwiisa na vandu yewo, mmbo ashevakaa kiiya kilya kitiri nnduma, kyikee Nndumi, kyisonyi kideesye kirunde mashora mesha. 22Naasany kukwiise lango yeto ta ukoony, kusore usumanu na iirikyo, ukundi, urilalyi kwikee na valya vakeevaanga Nndumi vekee na nrima wa dede. 23Lyo marero a utondo evesa-vesa alemi mashika nshi a urango-fo, nang'u mmbo ashendee myaandu tupu. 24Na nkivaa nndundi wa Nndumi nave nndu wa myaandu-fo. Mmbo akundyo nave nndu mmamiri kwa vandu woose, eeshi ilosha, atiri usisiryo. 25Na vandu yewo vavakyanaa nawe navaikimbe na ufoo, naambo kwakooya kiivaa naambo Iruva naveekye vakurye neemanya dede yeyo. 26Naambo urango luvawuiye, vauke efo nreiyony wa yeto nkumbi-alevareiya, vakatana efyo finsennyi.
Currently Selected:
2 TIMOTEO 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
