2 SAMUELI 21

Vafyari va Sauli vawaawo

1Kyeeri Davidi ekee mangyi kwesha-fo shaa ando a myaaka iraru ikusorye. Davidi katereva Nndumi Iruva, nawe Nndumi Iruva kaamba nkimaruma kya Sauli, elyi ekee mwiwaa, na llya alewaa Vagibeon valya. 2Naasa mangyi Davidi kavaanga Vagibeon kavavia, (Vagibeon nshi udeena lwa Israeli-fo, ni udeena lwa Vaamori, na vana va Israeli mmbo veevikyani nawo kyaasa kya ufoo lyo Sauli kakunda ivawaa naambo naringe Israeli na Yuda). 3Nawe Davidi kavavia Vagibeon yewo, “Shamutannya-ki ndesa naambo lukundani, naambo neese lwiirikyo ni Nndumi Iruva?” 4Nawo Vagibeon vakammbia, “Nshi mbony ya sye ya fesa ao saabu ikee kitere kyeru na Sauli, ao mmba yakwe-fo, ao yese kive mmbo luwaiye nndu wa Israeli-fo.” Davidi kavavia, “Ekyo mushaambaa nkyo shimutannyaa.” 5Nawo vakavia mangyi, nndu ulya alelureta neluvia mbony ta ilureta, naambo lulave na ando koose kwekaa kunu Israeli, 6mmbo lwatereva lurammbikywa vandu vakwe mfungare efo vaniny vakwe neese lundevavaanika na irina lya Nndumi Iruva kulya Gibeon alya ifumbuny lya Nndumi Iruva. Mangyi kavavia, “Nkisha, shimurammbikyaa.”

7Nalyo mangyi kalekea Mefiboshet mwana wa Yonatan akee mwana wa Sauli kimaruma kya kyaasa kya Davidi na Yonatan vevikyani kyaasa mbee ya Nndumi Iruva. 8Kyeendi mangyi kaniinngya vana vavii va Rispa mfu wa Aya valya aleirya Sauli. Armon na Mefiboshet, na vana varaanu va Merabu mfu wa Sauli aleirya Adrieli mwana wa Barsilai, Mmeholat. 9Yewo mfungare kavavika maakony a Vagibeon nawo vakandevavanika nrii-u mbee ya Nndumi Iruva, vakamamitwa indo. Nakyo nkyeeri kya fimu fya mbee fya nganu. 10Nawe Rispa mfu wa Aya karaa makunnya kalala maweny uka elyo nganu tekeevewa kutani elyo mmbwa ilesha, nta nalelekeye ndeye nsanyiny ao mafisi kio ashelya minying'a ilya. 11Nalyo Davidi kashevywa shaasa Rispa mfu wa Aya, nka kishinga wa Sauli aletana, 12keenda kandeuta mafwa a Sauli na a Yonatan kulya Yabesh-gileadi, mashika mmbo valeyaiva kulya Betshani, llya Vafilisti valevavanika, llya valewaa Sauli kulya Gilboa. 13Davidi keende-fo maffwa yoo a Sauli na a Yonatan, na alya engyi akasangirywa alya valevanikwa. 14Vakanderika maffwa a Sauli na Yonatan kulya urukeny lwa Benyamen, kulya Sela kifuny kya ndeye Esopia, shaasa mangyi alevavasya. Kikasennya Iruva kavikya uruka elo mbora.

Fira na Masiingo a Vafilisti

(1 Fye 20:4-8)

15Numa ya vayo kukashekwiipoo-se fira ya Vafilisti na Israeli. Nawe Davidi kandesoka na Gobu ando amwi na vasero vakwe, kandekabana na Vafilisti. Nalyo Davidi kaanguyo mfinya. 16Naasa kweefo nndu umwi wa Varefai evaangwaa Ish-benobu na ifumu lyakwe lyeetiri kilo iinya indi, uroo lwa vayo, kaveraa na usu wiiya kisiny, kakunda iwaa Davidi. 17Lyo Abishai mwana wa Seruya kamweekya iwaa mfilisti yeto. Nalyo vandu va Davidi vakalyiiya mboo vakammbia, “Ni dede nkukyendaa neese fireny-fo, naambo sa ya Israeli ilasheefwa.”

18Numa ya vayo kukashekaa-fo fira ingyi ya Vafilisti na Israeli kulya Gobu, llyo Sibekai, Mhushati alewaa Safu, Mrefai. 19Kukakaafo fira ingyi-da ya Vafilisti na Israeli efo Gobu, na Elhanan mwana wa Yairi nndu wa Betlehemu kawaa Goliati Mgiti, Kiri kya ifumu lyakwe mmbo kyeng'ani sha llo. 20Kukavekaa-fo-se fira ingyi-da kulya Gati, nafo kweefo nndu mwaasha deny, kavetira mini irindaru ya maako na irindaru ya marende, myoose mini makumi avii na iina, mmbwa ufyari lwa Varefai. 21Eekyaarara Israeli, llyo Yonatan mwana wa Shaama, ulya mwanamaye wa Davidi, kammbwaa. 22Yewo woose vaana mmbo veewonikye kwa Mrefai yeto wa Gati, vakawaawa ni Davidi na vandu vakwe.

Currently Selected:

2 SAMUELI 21: MAS2

Highlight

Compare

Copy