2 SAMUELI 20

Mbony ta uriingyi lwa Sheba

1Nalyo kweefo nndu umwi wa ngula evaangwa Sheba, wa Bikri wa ufyari lwa Benyamen. Nndu yeu mmbo ekaba iranda kaamba, “Yese llukee va Davidi-fo, nta llutiri ding'u na mwana yeu wa Yese-fo. Yeni Israeli wo nndu naware shia keenda.” 2Vana va Israeli veeta indo vakarafo isora Davidi vakasora Sheba wa Bikri. Lyo wo vandu va Yuda vakeengera isora mangyi waawo Davidi uka alya Yordan vakandefika Yerusalemu. 3Naasa mangyi Davidi ekifika Yerusalemu keepoo vaka valya fishinga ikumi, valya alevareeya mmba vailole, kavavika efo mmba vakaefo sha vaka va ding'u, vakaringwa kulave nndu aanga kwawo. Vakaringwa indo fika ifwa lyawo.

4Nalyo mangyi kavia Amasa, “Endeende vandu va Yuda vashekaa ya ando a mikonu iraru, neewe kukeeu.” 5Amasa keenda kavasang'irya, lyo kakyeeyo iwuya na kyeeri kisumani. 6Naasa llyo Davidi alevia Abishai, “Sheba mwana wa Bikri mmbo arye ilumaa, kakashaa ngota Absalomo. Ipoo vasero va nndumi wafo kunsore nta nalasheewona mwaanya wa yaanga muriny utiri turuve-fo, mashika mmbo asheovyaa-fo” 7Naasa llyo vandu va Yoabu, na Vakerete, na vapeleti, na vandu vakaari woose valesomuka wooka kulya Yerusalemu vakandevingya Sheba wa Bikri. 8Naasa veekee alya iweny llya iniini lya Gibeoni, Amasa kashevaammbya. Nawe Yoabu mmbo eree masara akwe a fira, na nkanda, na usu kisiny, naasa elyi eefo asheendaa indo usu lwakwe lukawa si. 9Yoabu kavia Amasa, “Ufoo lukae neewe mwanama.” Naasa llyo Yoabu katira Amasa nguyo takwe na woko usha sheelyi ammimindaa. 10Nta Amasa nnyalelola usu elo lweekee wokony lwa Yoabu-fo. Naasa Yoabu kanrandwa nalo ndeu maala akakillya si moose nta nnyalembiirya-fo, kafwa.

Numa Yoabu na Abishai mwanamaye vakasora Sheba wa Bikri. 11Nsero umwi wa Yoabu kasalala kufii nawe kammbia, “Yeto akundye Yoabu akee kyaalu kya Davidi nasore Yoabu.” 12Kyeeri ekyi lyo Amasa we nkulya shia ekekummbya muu epusukaa samu. Nndu ulya alollya vandu woose vansalala veelolaa kandeipoo nnying'a wa Amasa kandewoososya soori kandeurika. 13Kyeeri ekyi valya va Amasa vakasora Yoabu naambo vanderuuya Sheba wa Bikri.

14Nawe mmbo aleira efo kwa Vaisraeli woose fika Abeli, na kwa Betmaaka na kwa Vabikri woose, neewo vakakulunga woose varuuye Sheba. 15Nawo vakashenshingillya efo Abeli ya Bet-maaka, vakasang'irya uteri sha usau yoo isimambeny lya muri, llyo vakafisha isimamba lya muri. 16Nafo kweefo nka umwi nnrango, kaonisa unyanga kaamba, “Shaarannyiny, shaarannyiny-te, vieny na Yoabu nashe na yaa kufii, shirere nawe.” 17Naasa Yoabu kasembeya nang'u nka ulya kammbia, “Nnyewe Yoabu-ro?” Kammbia, “Yee.” Nawe kammbia, “Arannyany marero a kishinga kyafo.” Na Yoabu kammbia, “Shiitye-te.” 18Nka yeto kaamba, “Elyo kasha vandu mmbo veeshaambaa, ‘Mulare mularuuya mbony kulya Abeli.’ Nawo niindo valetana. 19Yenu mmbo shikee kyaalu kya yewo veeruuya ufoo vakee kunu Israeli. Yewe mmbo kukunndye imamita muri yeu ukee nto maye wa Israelli. Nkyikyi elyi kukunndye imamita ding'u ya Nndumi Iruva?” 20Nalyo Yoabu kanrouwa kammbia, “Nta kilave indo kwakwa, nshikunndye ilyamarafo. 21Shaasa kukusarye nshi indo-fo. Lyo mmbo kwiifo nndu umwi wa kulya mafumbuny a Efraimu avaangwaa Sheba wa Bikri, nawe mmbo akundye iwaa mangyi, Davidi-sho, kyasia nsomuteny we muni nsi, neeny shuuke kunu muriny yeu.” Nawe nka ulya kavia, Yoabu, “Vereya kweeryo nrwe wakwe neefo uwe ya isimamba.” 22Naasa nka ulya kasora vandu woose karera nawo na urango. Vakarummbwa Sheba mwana wa Bikri nrwe vakeerya Yoabu efo poo, nawe kakaba iranda, wo nndu kawara shia yakwe keenda kyeny. Yoabu nawe kawuya kwa mangyi kulya Yerusalemu.

Fisongoru va Davidi

23Nawe Yoabu mmbo ekee mwiisalallya vasikari woose va Israeli. Benaya mwana wa Yehoyada kasalallya Vakereti na Vapeleti. 24Adoramu we kasalallya mashora a finya, Na Yehoshafati mwana wa Ahiludi kava mwiireiya findo fyeekumbura. 25Shausha we mwiireiya findo. Sadoki na Abiatari wo makohani. 26Na ungyi ni Ira wa Yairi, we mmbo eke nkohani wa mangyi Davidi.

Currently Selected:

2 SAMUELI 20: MAS2

Highlight

Compare

Copy