2 SAMUELI 19

Shaasa Yoabu Alesakira Davidi

1Nawe Yoabu kashevio shaasa mangyi akeeiya kya Absalomo. 2Nkyo ivinga lyawo fireny nkonu ulya lyikava nkiiyo kwa vandu va uruka woose, llya valemanya sheelyi mangyi mmbo atirwa mfoova kimaruma kya mwana wakwe Absalomo. 3Vandu vakaovya nkonu ulya, vetirwa ni usutu sha vandu varisha fireny. 4Naasa mangyi kasikya kisangu kyakwe kaiya neefwa nnu, wo mwanakwa Absalomo, Absalomo mwanakwa, wo mwanakwa! 5Kyasian, Yoabu kashefika kwa mangyi kammbia, “Inu yewe mmbo kwallyilyisa vandu vafo mmbo vasero vafo woose valekwaauwa kulashewaawa, yewe na vana vafo, wa kyuumi na va kyika, na vaka vafo, na fishinga fyafo. 6Lyo yewe koora inu shaasa kukuundye yewo vakusuuye, kwavesua yewo vakukundye. Inu mmbo kwaamba paa sheelyi vasongoru na vasero vafo nshi kindo, kwafo yewe-fo, mashika inu llyo shamanya deny, kukooye Absalomo mmbwe akya neese loose lusye, mmbo kyeekusennya yewe deny. 7Naasany ulaalu somukya na poo, kundeviirya vasero vafo muu mashika lyo yeny mmbo shakuvia na irina lya Nndumi Iruva kwanra kulasomuka, nkwiifo nta nndu umwi akaa kyaalu kyafo inu-fo, neekyo kishuukaau mmbo kishevaa kikasha ngota efyo kulellollya uka udu lwa-fo fika inu.” 8Nawe mangyi kasomuka kandekaa yoo ngiriny. Na vandu vakandevywa mangyi nnyoo ngiriny akai nawo vakeenda vakasorau mangyi.

Davidi Akudeesya Iwuya Yerusalemu

Nawo mmbo vemmeenda wo nndu yeemeny lyakwe. 9Efo ngyufyariny toose vandu va Israeli vakasakya veni na veni, vakaamba, “Mangyi mmbo aleluuta maakony a vakiduva veru, kaluauwa makony a Vafilisti, kyeendi we karisha mbee ya Absalomo kasama urukeny. 10Nawe Absalomo yeto lulensauwa nave mangyi yeeru, mmbo amfiyya fireny. A ekyo kyeema ulaalu lulaambe mangyi naviiryo kiri kyakwe nkyoki?” 11Naasa mangyi karuma nrumi kwa vakohani valya Sadoki na Abiatari vandevio, “Rereny na vamiku va Yuda woose, muvavie, ‘Ankyiki elyi mwafurumya indo yaamba ulaalu mangyi nawuye?’ Mashika mmbo ammiita shaasa Israeli valeamba, naambo vammbiire-se. 12Yeni mmbo mukee va iffwa na samu yakwa, nkyiki musheva va mafurumyony iviira mangyi kyeny.” 13Naasa endevieny Amasa, “A nshi yewe kukee samu yakwe shimuni, iffwa na nyama yakwa?” Nawe Iruva na lwaauwe we muni, kwanra kulava yewe ando a Yoabu, kutetere vasikari vakwa woose kyeeri kya-fo kyoose 14Elyi alerera indo kava mmbo antira mirima ya Yuda woose vakava vamwi nsi. Nawo kavavia mangyi, “Woi mangyi, wuya yewe na vasero vafo woose.” 15Nalyo mangyi kawuya, kafika alya Yordan. Na Yuda vakasha Gilgali vasheammbya mangyi, vanduute Yordan.

16Shimei we mwana wa Gera, wa ufyari lwa Benyaminy wa Bahurimu, kaangusya isoka na vandu va Yuda naambo lundeammbya mangyi Davidi. 17Nawe mmbo eeriani na vandu kyiku. Nawe Silba ulya eke ishinga lya Sauli, ando amwi na vana vakwe ikumi na varaanu, na mashinga makumi avii, vakasongoya mangyi iruuka Yordan. 18Na ngalava imwi ikaruuta vandu va mangyi nakyo kikansennya.

Davidi Atana Mesha kwa Shimei

Llyo Shimei mwana wa Gera kawo si yoo mbee ya mangyi akimaa iruuka Yordan. 19Kammbia, “Woi nndumi wakwa mangyi kulasue, nta kulasheekummbwa makasha akwa moose shiletana kyeeri kilya nndumi wakwa aleuka Yerusalemu. 20Mashika yeny shiishi ukasha lwakwa. Na yeny mmbo shava wa mbee wa mmba ya Yosefu isheammbya nndumi wakwa mangyi. 21Naasa Abishai mwana wa Seruya karouwa kaamba, Shimei mmbo araa nalawaawa llya alearara needenga mangyi nsauwe wa Nndumi Iruva?” 22Lyo mangyi Davidi kaamba, “Ekyo kyamuting'a nkyoki yeni vana va Seruya kutani mwava vakiduva vakwa inu? A mmbo akifwaa nndu ungyi yaa Israeli inu? A mmbo shilaishi sheelyi yeny mangyi ya Israeli?” 23Nalyo mangyi kaamba, “Shimei, nkufwaa-fo. Mangyi kallyiya mboo.”

Davidi Atana Mesha kwa Mefibosheti

24Naasa Mefiboshet nshuku wa Sauli keenda naambo nandeammbya mangyi Davidi, nawe nnyeutye fii-fo, nta ngyala ta marende nta yuuta nguyo-fo, nta nnyalesangya soori takwe-fo, kipookya nkonu ulya mangyi alerisha Yerusalemu, kufike nkonu ulya alewuya. 25Naasa eekifika Yerusalemu yaammbya mangyi, mangyi kammbia, “Ale Mefiboshet, nkyikyi elyi kulore kulevandama neeny llya shilerisha?” 26Nawe kammbia, “Nndumi wakwa mangyi, ni ishinga lyakwa lyileshilemba, mashika yeny nsero wafo mmbo shekunndye ideesya nshungu wakwa, shisaame naambo sheende shivandame na mangyi, kimmba shikee kitongororo shilashiidimaa ivarya na marende. 27Nawe mmbo aleshiriingya kwafo, woi mangyi, lyo mangyi nndumi wakwa mmbo akee sha nsu wa Iruva. Woi mangyi kushitanyiny ekyo kyakusennya. 28Mashika lyo vandu va mmba ya nde mmbo veesumani ifwa mbee ya mangyi, lyo kwalanga ishiwarya yeny nsero wafo shive mwiilya neewe neena neewe. A ni usumanu kyi shitiri lwefuuya mangyi kya mmwasi?” 29Naasa mangyi kammbia, “A nkyikyi elyi kweengera irera efyo fyoose. Yeny shimurammbikyaa umangyi lwa Sauli mukwaavye na Siba.” 30Mefiboshet kammbia, “Naakwa Siba awarya ding'u shoose lyo yeny mmbo shifurye elyi mangyi nndumi wakwa awuya na ufoo.”

Davidi Atana Mesha kwa Barsilai

31Nawe N'gileadi ulya Barsilai kasoka auka Rogelimu keenda aryani na mangyi kutani vakillya mura wa Yordan. 32Barsilai mmbo ammikwa deny, wa myaaka makumi nyanya. Mmbwe eva mwiniinga mangyi shoonga kulya Mahanaimu, kimmba elyi eke nndu atiri wiidimi uniini. 33Naasa mangyi kavia Barsilai, “Luruuke loose, neeny shindekulellya kulya Yerusalemu.” 34Lyo Parsillai kavesa mangyi, “A ni myaaka iinga ikwaani sheengyere naambo shiidimi yeenda na mangyi ya Yerusalemu? 35Inu nshitiri myaaka makumi nyanya, a shishiidima-se yaawuya kyindo kisha na kikasha? A ishinga lyimanyaa-se kyindo lyilyee ao lyinee? A shikyaaranyaa ngyunyanga ta veembi womi na vaka? A nkyikyi ishinga lyeengyere irovyo kya mangyi? 36Ishinga lyafo llyisheenda lyikillye Yordany kinnywa na manyi. A nkyikyi mangyi ishitee na raangya sha eywa? 37Shatereva, ra ishinga lyafo lyiwuye, naambo shindefiiyya muriny mbwakwa, kufii na fifu fya nde na ma wakwa. Indi ayi ishinga lyafo Shimhamu; lyire lyeende na kwakulya amwi na nndumi wakwa mangyi; lyintannye wo kyindo kwakunda.” 38Na mangyi karouwa kaamba, “Shimhamu mmbo asheenda kwakulya neeny na yeny shintannye shaasa kwakunda; wo kyindo kushiterevaa mmbo shikutannyaa.” 39Llyo vandu woose vakakillya kwakulya ya Yordany na mangyi karuuka; mangyi kakaba kiisi Parsillai na kammbikkya mbora kanra keenda kyeny kwakwe muni.

Yuda na Isreli Varumana Kimaruma kya Mangyi

40Mangyi keengera kyaaro fika Kilkali na Shimhamu keenda nawe; vandu woose va Yuda na kyenga kya vandu va Israeli, vakyeemya mangyi kyaarony kyakwe. 41Llyo vandu woose va Israeli vakasheya mangyi vakammbia, “A nkyikyi mwamaaye weeru, vandu va Yuda vakwiiwa, vakaruuta mangyi na va mmba yakwe Yordany, na vandu va Davidi woose amwi nawe.” 42Womi woose va Yuda vakarouwa womi va Israeli, “Ni kyimaruma mangyi mmwanamaaye weeru. A nkyikyi mwasswa kya mbony yei? A llwallya kyindo kyoose kya mangyi? Ao nnyalluniinga simbo nta imwi?” 43Na vandu va Israeli vakarouwa womi wa Yuda vakaamba, “Mmbo lutiri fyenga ikumi kwa mangyi na kwa Davidi mmbo lutiri mmwasi yaany. A nkyikyi mwalwiila? A nsheese-se lweeke va mbee irera kya iviira mangyi eru?” Indi marero a womi va Yuda akavava na ngota a womi wa Israeli.

Currently Selected:

2 SAMUELI 19: MAS2

Highlight

Compare

Copy