2 SAMUELI 18

Absalomo avingwa neewaawa

1Nalyo Davidi kasang'irya vandu vakwe kaveekena, kavavikya veesallya va fiku na va mayana. 2Davidi karumau kyenga kya kararu vasalallywa ni Yoabu, na kyenga kyingyi vasalallywa ni Abishai mwana wa Seruya mwanamaye wa Yoabu, na kyenga kyingi kisalallywa ni Itai, Mgiti. Naasa mangyi kavia vandu yewo, “Naakwa ni yeny mmbo nkeenda neeni.” 3Kyeendi vandu yewo vakammbia, “Yewe kulasomukye-fo. Mashika kwakooya yese lwarisha, mmbalollya n'kido-fo, naakwa lwafwa kyenga, yese nshi kindo-fo. Kyeendi yewe mmbo kukee torya ngota vandu fiku ikumi, Nkyo nkisha yewe kulutarame kwikee kunu muriny.” 4Nawe mangyi kavavia, “Mmbo ntanaa shaasa mushivyaa.” Nawe mangyi kasalala yoo ngiriny, vandu yewo vakasomuka fiku fiku na mayana mayana. 5Nawe mangyi kavavasya Yoabu na Abishai na Itai kavavia, “Mmbo shamutereva mweende na nsoro yeto Absalomo waarya.” Eereraa indo na vandu woose mmbo valeita, llya mangyi alerera kya Absalomo.

6Naasa vandu yewo vakeenda vandekabana na Israeli, nawo vakandekabannya nsitony wa Efraimu. 7Vandu va Davidi vakakaba vandu va Israeli, kukasha ukiva uniini, elyi valefwa vandu fiku makumi avii. 8Fira ikeengera neekwaana urukeny, veengyi vakafiiya efo nsiton ngota yewo walewaawa ni usu.

9Elyi neelyi Absalomo kakwaanannya ramu-ramu na vasero va Davidi. Absalomo mmbo eesamyi frasi yakwe, naasa frasi yeyo ikeera kwasi ya maramba a nri nniini wa nkuu, nrwe wakwe ukatamba efo marambeny a nri yeto, kanunutwa yoo nriny, lyo frasi yo ikeera na mbee yiirishaa indo. 10Kukava nndu alelollya shaasa kyava keenda kandevia Yoabu, “Shalollya Absalomo eenunutywa alya nkuuny.” 11Nawe Yoabu kavia nndu yeto andemweengye mbony yeyo, “A elyi yewe kwalollya indo nki kyeema kulankabe nafwe? Llyo neeny sheekuningaa fesa ikumi nkuvike na nkanda wa uvingi.” 12Naasa nndu yeto kavia Yoabu, “Na shiniingwa fesa kyiku, nsheekaryaa iwaa mwana wa mangyi-fo, mashika mangyi mmbo alemuvia yeni, yewe na Abishai na Itai, kaamba, ‘Loleny nndu moose nalesheepana nsero yeto Absalomo.’ 13Na kukooye yeny shilentannya kyikasha (mashika mangyi nkuti mmbo eemanyaa-da), nta yewe nkweekaa kyaalu kyakwa-fo.” 14Naasa Yoabu kaamba, “Nshishidimaa isisirya shiireraa neewe indi-fo keepoo mafumu araru, kundekaba Absalomo yoo ngoony, ekununutye indo yoo nriny.” 15Na vasoro valya venriiye fisha fyakwe vakeenda vakandekaba Absalomo vakammbwaa. 16Kyiikiva indo Yoabu kakaba iranda, vandu vakwe vakawuya vakara ivingya Israeli. 17Vakawuya vakeepoo nnying'a wa Absalomo vakandeweera irininy yaasha efo nsitony, vakawuya vakasang'irya-u nkuka wa mawe. Israeli woose vakarisha wo nndu kyakwe. 18Nawe Absalomo mmbo esongosya ngo ando a imungony, vai mashika elyi kulore eetiri mwana naambo nang'anisyeu irina lyakwe. Ngo yeyo kaifishya irina lyakwe muni, nayo ivangwaa Absalomo fika inu. Davidi avio kya ufu lwa Absalomo

19Naasa Ahimaasi we mwana wa Sadoki kaamba. “Ulaalu mmbo nsheendaa sere shinderwaaya mangyi mbony yeti namanyi shaasa Nndumi Iruva alemweekya itaiya vakiduva vakwe.” 20Yoabu kammbia, “Inu nshi yewe kuvaa mwiirwaa mbony-fo, vera nkonu ungyi, mashika yeu alefwa mmwana wa mangyi-te.” 21Nalyo Yoabu kavia Nkushi umwi, “Enda yewe kundevia mangyi ekyo kulelollya.” Nawe Nkushi yeto keenndya Yoabu, keendany eshaangusyaa. 22Llyo Ahimaasi mwana wa Sadoki alevia Yoabu lya kavii, “Shiniinga muumuu shisore Nkushi yeto efo numa,” Nawe Yoabu kammbia, “Nkyiki mfwau elyi kukundye irishya-fo tupu neewe kulaonisaa-fo nta mbusha kya mbony yeto?” 23Kawuya immbia, “Kyasia, shira-da sheende. ‘Endaany-te.’” Llyo Ahimaasi alerisha eesoraa shia ya kyaandaa, karisha katana eera mbee ya Nkushi ulya. 24Naasa kyikava Davidi mmbo eke alya nnang'ani kavii ya ngiri ta muri, na nringyi wa ngiri we asaamyi kulya uwe ya vayo efo isimambeny, kainwa miso kalollya nndu eefo arishaa kyuumu. 25Nawe kamatuka, kavia mangyi nawe mangyi kammbia, “Kwankooya ni nndu umwi nsi mmbo arie mbony shive.” Nawe kasha arishaa kafika-u. 26Nringyi ulya elyi eefo alolaa-da, kalollya nndu ungyi eefo arishaa indo, nawe kavaanga mwikallya alya ngiriny, “Lolate, ekakato nndu ungyi akeesha erishaa.” Mangyi nawe kaamba, “Neeto nawe-da mmbo aluriiye mbony.” 27Llyo nringyi yeto kaamba, “Shaasa shalollya yeny, ulya wa mbee mmbo avakye Ahimaasi wa Sadoki.” Nawe mangyi kammbia, “Yeto ni nndu nsha mweende mbony shisha.”

28Naasa Ahimaasi keedikira mangyi kaamba, “Ni ufoo mangyi. Kakwiinyika kawa si kifulufulu mbee ya mangyi, kaamba, ‘Nndumi Iruva wafo naarafumwa, woi mangyi, yeto alevivya mbai vandu yewo verye ikabana na nndumi wakwa mangyi,’” 29Naasa mangyi nawe kavesa, “Nyira womi, nsoro yeto wakwa Absalomo eefo nisha?” Ahimaasi kaamba, “Llya Yoabu aleshiruma yeny shikee nsero wa mangyi shikee wafo, mmbo lwemmiita ntiri nniini lyo lulamanyi mmbweki.” 30Nawe mangyi kammbia, “Osho-te salala yaa,” Keenda kasalala-u.

31Vereraa indo Nkushi ulya kasha swany, kaamba, “Mmbo shirye mbony sheengye nndumi wakwa mangyi, mashika inu llyo Nndumi Iruva ataiya yewo woose venkukikisa ikabana neewe mangyi.” 32Naasa mangyi kavesa lyingi, “A nsoro yeto wakwa Absalomo eefo nisha?” Nkushi ulya kammbia, “Vakiduva woose va nndumi wakwa mangyi, neewo woose veekunndye ikutannya meesi vave shaasa nsoro yeto aleva.” 33Naasa nalyo mangyi kasavaa deny kasaama kulya kiryeny kilya alya uwe ya ngiri, kaiya. Eesheenda kafwa kaamba, “Woi mwana-kwa Absalomo! Woi mwanakwa Absalomo! A kyema ni yeny shilefwa ando afo Absalomo mwanakwa, woo Absalomo mwanakwa!”

Currently Selected:

2 SAMUELI 18: MAS2

Highlight

Compare

Copy