2 SAMUELI 17

Hushai alemba Absalomo

1Ahitofeli keengera ivia Absalomo, “Shira shisauwe vandu fiku ikumi na fivii neeny kio ekyi kyeni shisore Davidi, 2neeny mmbo shindenrayaa kyeeri aaraye, nalakiidimaa itana kindo, naawukwa deny. Llyo vandu yewo vakwe woose varishaa, neeny shiwaane na mangyi muni. 3Neeny llyo nsheviraa vandu yewo vakwe kwafo, nalyo uruka mmbo lushetiraa ufoo.” 4Nakyo kikasennya Absalomo ando amwi na Israeli woose.

5Naasa Absalomo kaamba, “Vaangeny Hushai Mwariki lwaarannyi makusaro akwe nawe.” 6Naasa Hushai ekifika kwa Absalomo kammbia shaasa Ahitofeli aleamba, kammbesa kwakooya kivaa itana indo, ao kwaluvia makusaro afo. 7Nawe Hushai kavia Absalomo, “Kindo ekyi Ahitofeli arera nkivaa itana ulaalu-fo.” 8Hushai keengera yaamba, “Yewe kwiishi na vandu vakwe shaasa vakee vakaari, nawo vakee vanyaasi sha ngare yasokwa ngurana ya vayo efo kasa. Na kingyi-se, ndoo ni inndu lya fira, nnyalalaa yoo vasikari vakwe vakai-fo. 9Mwiishi, ulaalu mmbo akemoovise mbangeny, ao ando kungyi. Nkyo kyeeri maata vawo vashewaawaa, wo nndu ashiitaa mmbo ashaambaa, ‘Ekakawo vandu va Absalomo vanshishwa sha ng'umbe. 10Nalyoony naakwa ni ulya akee nkaari sha miiso, mmbo asyaa neeke sha muuya, mashika Israeli woose mmbo veeshi shaasa ndoo akee nkaari na vandu vakwe woose kiwo.’ 11Nkyo yeny mmbo sheshaamba indi, ‘Israeli woose pookya Dani fika Beer-sheba vashe yaa kukai, vashe woose piny, shaasa vafye neewe kuvasongoye kumuni fireny. 12Llyo yese lusherorovaa efo koose Davidi akai na kukava kwi. Neese llyo lushemmboyaa tiny shaasa laura yooloka, lulalekeyaa nta umwi waawo naturushuke-u. 13Nalyo kwakooya nkundo kwa muriny akai, vandu veru mmbo vavivaa muri yeto moose luurwaa imungony, kulasherewaafo nta iwe lyimwi.’” 14Nawe Absalomo na vandu vakwe woose vakaamba, “Ekyo Hushai aamba nkyo kikee kisha ngota kilya kya Ahitofeli.” Kimmba nawe Nndumi Iruva mmbo alema ekyo kya Ahitofeli naambo urumato lusheye Absalomo.

Davidi Aikimbo Karisha

15Naasa Hushai kavia vakohani valya Sadoki na Abiatari, Ahitofeli mmbo ammivia Absalomo na Israeli woose kindo kivasumannyi itana, neeny shavevaniinga makusaro akwa. 16Nkyo ulaalu rumyeny Davidi nrumi mummbie indi, “Kio ekyi kya inu lola nnu kulashelala kufii na iriko llya lya kasa, naruuke we na vandu vakwe, nalashekooywa kunu namamitwa we na vandu woose.” 17Nawe Yonatan na Ahimaasi mmbo vekee kufii na Enrogeli yevereyaa nka umwi kava mwiveengye mbony, nawo vakanderwaaya Davidi mbony yeto, wo vaka yewo vakakusuruma naambo valalollyo veshaa na kulya muriny. 18Lyo kukava-fo nsoro umwi avalollya kandevia Absalomo. Nalyo vakeenda ve wavii veshaangusyaa, vakafika Buharimu kyeny kwa nndu eetiri kirori ekyo kya mura efo kari kwakwe, vakooloka efo kiroriny. 19Na nka yeto muni keepoo kifiniko kafinika yoo kaniny kya kirori ekyo, kaalala-u nganu kaanika naambo nndu nalalollye-u. 20Naasa vasero va Absalomo vakasora nka ulya efo mmba vakammbia, “A Yonatan na Ahimaasi nkwi vakai?” Nka ulya kavavia, “Mmbo varuuka mura vakeenda.” Veekivauwa valavalollye vakawuya Yerusalemu. 21Veekiwuya vandu valya vakooka yefo kiroriny, vakandevia Davidi vakaamba, “Ukeny yaa muruuke mura sere, niindo Ahitofeli alluvia.” 22Nawe Davidi kooka-u ando amwi na vandu vakwe woose, vakaruuka Yordan, neelyi kulekya vemmaa iruuka woose.

23Naasa Ahitofeli ekilollya kilya alevavia nkyalatywa kasaama nshungu wakwe, keenda kyeny kulya muriny wakwe. Nafo kasongosya mbony ta mmba yakwe, kakuvanika kafwa; kanderikwa kulya kifuny kya ndeye. 24Davidi kandefika Mahanaimu. Nalyo Absalomo karuuka Yordan ando amwi na Israeli woose. 25Nawe Absalomo kavika Amasa natetere vasikari vakwe woose ando a Yoabu. Amasa yeu mmbo eke mwana wa nndu avaangwaa Yeteri, nawe ni Mwismaili, maye ni Abikaili mfu wa Nhashi mfwamaye wa Seruya, maye wa Yoabu. 26Absalomo na vandu vakwe mmbo valendemannya ulale kulya Gileadi.

27Nalyo Davidi ekifika Mahanaimu, Shobi mwana wa Nahashi wa Raba, nawo ni Vaamoni, na Makiri mwana wa Amieli wa Lo-debari, nawo Barsilai, Mgileadi wa Rogeli. 28Vakeende nafo mboloko teelaya na bakuri, na nungu na nganu, na nswa na soko ta ngata shiingyi, 29na wukyi na mafura eevee, na moonri na mafura a ng'umbe, naambo Davidi na vandu vakwe vakooye ilya, mashika elyi valelollya yefo kasa mmbatiri shoonga-fo, mmbo vaaraye na yaakuka.

Currently Selected:

2 SAMUELI 17: MAS2

Highlight

Compare

Copy