2 SAMUELI 16
16
Siba na mangyi Davidi
1Nawe Davidi llya alemaa iira alya urorony lwa ifumbu indi, kakwaanannya na Siba akee nsero wa Mefiboshet eerye mishungu ivii ikee mideesye, iveerye mikate mayana avii na fivale iyana fya sabibu shuumu, na ndunda tingi, na mboloko ya mfinyo. 2Naasa mangyi kavia Siba, “A findo efi mfeeki?” Siba kammbia, “Mishungu yei mmbo sheengye vasero va mangyi, na mikate na sabibu nshoonga ya vana yeva mangyi ariani nawo; nato mfinyo nkimaruma kya yewo vashaaraa vani kunu kasa.” 3Mangyi kaamba, “A Mefiboshet we mwana wa nndumi wafo Sauli nkwi akai ndesa?” Siba kavia mangyi, “we nkulya Yerusalemu akaa, mashika mmbo alekusara Israeli mmbo vashemmbiryaa umangyi lwa saawoye Sauli.” 4Nawe mangyi kavia Siba, “Findo fyoose fya Mefiboshet mmbo shafikuniinga yewe.” Siba nawe kaamba, “Wara finya mangyi. Woi mangyi kyankusennya ishitannya indo.”
Davidi na Shimei
5Naasa Davidi ekifika Bahurimu, kakwaanannya na nndu umwi wa ufyari lwa Sauli avangwaa Shimei mwana wa Gera, nawe llya alellollya keenda edengaa nnu. 6Shimei kapooka yeerya mangyi Davidi songoro ando amwi na vandu vakwe, mmbo vandu woose ando amwi na vasikari vakwe woose. 7Kyeeri kilya ekedenga marero akwe akava nng'u yaa, “Ndifo neefo yewe mwiiwaa, kwaveva nndu nravi! 8Nawe Nndumi Iruva mmbo ashekutaiyaa kya samu ya mmba ya Sauli yeyo ilepusuka, neewe kwashililya ando akwe, lla elyi Nndumi Iruva eniinga mwana wafo Absalomo umangyi yelo kwasokwa yewe mashika elyi kukee nndu mwiwaa,”
9Nalyo Abishai mwana wa Seruya kavia mangyi Davidi, “A nkyikyi elyi kite kifu kyakarya idenga nndumi wakwa mangyi? Shakutereva-dwa woi mangyi, shira shindenrummbwa nrwe ulaalu indi,” 10Nawe mangyi kammbia, “Ekyo kyamuting'a nkyoki yeni vana va Seruya? Kulashekooya ni Nndumi Iruva ambya nashidenge, kammbia, ‘Denga Davidi,’ nalyo nkwiifo nndu amwiimaa-fo.” 11Naasa Davidi kavia Abishai na vasero valya vakwe, “Mmulollye shaasa mwana wakwa shimuni Absalomo akunndye ishiwaa a M-benyaminy yeu nshi mmwasi? Nkureeyeny nashidenge. Kulakooye ni Nndumi Iruva ammbavasya indo. 12Kulakooye kimaruma kya efyo fyoose fileshikooya Nndumi Iruva asheshiviiryaa muu kyeendwa mfidengo fyakwa.” 13Nalyo Davidi na vandu vakwe vakeengera yeenda. Nawe Shimei kavandama na ifumbu llya elyi eefo asheendaa, keengera idenga mangyi neemwerya mawe, neefwala kiluulyi. 14Mangyi na vandu vakwe vakaariswa nkyaaro, veekifika Yordan vakaimuya-u.
Absalomo Kullya Yerusalemu
15Nawe Absalomo na vandu vakwe vakandefika Yerusalemu, ando amwi na Ahitofeli. 16Nawe Hushai wa kulya Arki, akee mbuya ya Davidi eekilollya Absalomo kammbia, “Wara finya mangyi, wara finya.” 17Absalomo kavia Hushai, “A yekyo kyamaa-ki kwa nndu mbuya yafo? A nkyeema kuleima mbuya yafo” 18Hushai kavia Absalomo, “Kileva indo-fo, lyo yeny mmbo shikaa kyaalu kya yeto Nndumi Iruva ansauwa nave mangyi. 19A ni vi ashevaa nsero wakwe na wa vana vakwe? Shaasa shileinndya ndoo niindo-da nshekwiinndyaa neewe.”
20Naasa Absalomo kavia Ahitofeli, “Nkyeamba, lukatana inda?” 21Ahitofeli kavia Absalomo, “Anga kwandekaa na fishinga fya ndoo valya alevara kulya mmba, neelyi Israeli woose vashiitaa llyo vamannyaa dede nkukikee nawe, nawo vakarye ikusora yewe.” 22Nawo vakandeallya Absalomo yeema efo kai, nawe kakaa na fishinga fya ndeye wo nndu kalollya, 23na kindo kyoose Ahitofeli aleamba mmbo kilelatywa kyikava sheelyi kyooka kwa Iruva muni. Ni indo kileva kwa Davidi na Absalomo.
Currently Selected:
2 SAMUELI 16: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
