2 SAMUELI 15

Uriingyi lwa Absalomo

1Numa ya mbony yeto Absalomo kadeesya ikari na frasi, ando amwi na vandu makumi araanu, vakarisha vakeera mbee yakwe. 2Nalyo wo nkonu ngama kava mwiikupoo nraasi kandekaa yoo mwaangony wa ngiri. Kyeeri nndu ashaa ariwa ni mwaandu wakwe wa yeende kwa mangyi, Absalomo kava mmbo avaangwaa nndu yeto kirika, kammbesa mbony takwe na kundo ookye, llyo vavemmbiaa, “Yeny shuukye kuve, wa ufyari uve lwa Israeli.” 3Nawe Absalomo mmbo ammbyaa, “Kya marero yoo afo ni yewe kutiri usumanu, lyo nnyelyi kwatura nndu mwiikurerya nisha efo kwa mangyi.” 4Kawuya kaamba, kukooye sheevikwaa mwiirummbwa mbony ta vandu, wo nndu neende mwaandu wakwe kwakwa, mmbo shembonisya usumanu lwakwe. 5Na nndu moose eeshisheyaa mmbo shemmbwarya nisha nnu neemmiminda. 6Niindo Absalomo alevia vandu valya woose valefika kwakwe mbele kulore vamfika kwa mangyi, nalyo Absalomo keeva mirima ya Vaisraeli woose.

7Kwiikisia myaaka iina Absalomo kavia mangyi Davidi, “Mmbo shakutereva kushiniinge muumu sheende yiinutya kyaasa kyakwa shivikye na Nndumi Iruva kulya Hebron. 8Mashika yeny nsero wafo mmbo shevika kyaasa ekyo llya shekee kulya Geshuri ya Siria, shishaamba, ‘Kwakooya Nndumi Iruva asheekya shawu-se Yerusalemu neeny nkuti shindunndye.’” 9Nalyo mangyi kammbia. “Kweengye na ufoo.” Naasa kookau keenda Hebron. 10Kyeeri ekyi Absalomo karika vandu va sa kulya Israeli koose kaamba, “Kwakooya mwaita unyanga lwa iranda, llyo mushekabaa ukoru mwaambe, ‘Absalomo ambikwa mangyi kulya Hebron.’” 11Nawe Absalomo mmbo alesangirya vandu mayana avii wooka Yerusalemu vakeenda nawe llya aleenda Hebron, lyo wo valamanyi ekyo arye itana. 12Absalomo karummya Ahitofeli Mgiloni nrumi, nawe mmbo ekee ngyama ya Davidi, nooke kulya Gilo kyeeri ekee yuuta firaso. Uriingyi lwawo lukeengera ing'ana kimmba vandu valelatyya Absalomo valeenda veefumbukaa. Mangyi Davidi arisha Yerusalemu.

Davidi Arisha Auka Yerusalemu

13Naasa kukasha nndu kwa Davidi kammbia, “Vandu veengyi va Israeli mmbo vakutiri na Absalomo ulaalu.” 14Llyo Davidi alevia vasero vakwe woose valya vekee nawe kulya Yerusalemu, “Nndeny lurishe, mashika lwanra lularisha lyo nkwiifo nta nndu umwi ashekyaa mbee ya Absalomo-fo. Angusyeny deny, lwasia, nalasheelukooya yaa nalumamite noosu kunu muriny yeu.” 15Naasa vasero va mangyi vakammbia, “Yese vasero vafo mmbo lutanaa ekyo kyoose mangyi nndumi weeru kuluvavasya.” 16Nalyo mangyi kasomuka na vandu va mmba yakwe woose vakasora, mangyi kasaara-fo fishinga ikumi-nsi, naambo vakallye mmba. 17Mangyi kakupoo na vandu vakwe, vakandeemuya swaa alya Bet-merhaki. 18Vandu valya woose veeriani nawe vakakoora alya akai, mmbo Vakereti na Vapeleti, Vagiti, woose ando amwi veefikye mayana arindaru valya veuka Gati. 19Naasa mangyi kavaanga Itai Mgiti, kammbia, “Nkyoki kyakweende yaa? Yewe wuya kwandekaa na mangyi yeyo shiiya, kimmba yewe kukee mwiirishiswa. 20Mashika mmbo kusheye kunu ukwau a nkiki elyi shikwaataraa shishendaa efo neefo, neeny nta shilaishi kundo nkeenda? Kuwuiye kwaviira na vandu yewo vafo kweengye na ufoo deny. 21Naasa Itai kavia mangyi, ‘Mmbo shakuvia na irina lya Nndumi Iruva woi mangyi, ando koose mangyi ashendaa, kwakooya ni indefwa ao ikya, neeny ishinga lyafo mmbo shiveenda-u.’” 22Davidi kavia Itai, “Kyasia, ndifony!” Nawe Itai kakupoo na vandu vakwe woose ando amwi na vana vadu shaasa veeriani nawe. 23Uruka loose lukakaba kiiyo, na vandu woose vakaruuka mura wa Kidron, na mangyi nawe, woose vakaenda taari ya kasa.

24Nalyo nkohani Sadoki na Valevi woose ando amwi nawe vakeenda veerie isanduku llya lya mavavaso a Iruva naasa vakakurua isanduku elyo. Nkohani Abiatari nawe kasaama na vandu woose vakasia kulya muriny. 25Mangyi kavia Sadoki, “Viira isanduku elyo lya mavavaso kulya muriny. Kwakooya Nndumi Iruva akunda shiwuyaa nafo nshelollya-se isanduku elyi yoo lyikaa.” 26Kyeendi Sadoki kammbia, “Yeny nsheerikyana neewe-fo mangyi ekakau shikee yaa kushitannyi shaasa kwakunda.” 27Naasa mangyi kavia Sadoki, “Wuyeny na kulya muriny, yewe na mwana wafo Ahimaasi na Yonatan mwana wa Abiatari. 28Yeny mmbo shindevereyaa alya irikony lya kasa, kutani mwashivia kyeetana.” 29Kyasya, Sadoki na Abiatari vakeepoo isanduku llya lya mavavaso a Iruva vakalyiviira na Yerusalemu, nawo vakandekaafo.

30Naasa Davidi karwa na shia ilya ya ifumbuny lya miri ya mafura eeshiyaa, keenda eesikye nrwe kyeyoora ting'wa nta nalaree fyaaru, na woose veeriani nawe vakatana indo, elyi veefo veerwaa. 31Nalyo nndu umwi kavia Davidi, “Ahitofeli mmbo ammaalukya kyaalu kya Absalomo.” Davidi katereva kaamba, “Woi Nndumi Iruva shakutereva, reveta kindo ekyo Ahitofeli akitana kive ruu.” 32Davidi ekifika kulya uwe ya ifumbu nang'u kweiyo ando kweeterevya Hushai, Mwaariki kasheambya mangyi na soori takwe mmbo temmba ngosha, na nrwe wakwe utefukye ukava uteeri lwa kiluulyi. 33Davidi kammbia, “Kweenda neeny; mmbo kuwaa irio lyakwa. 34Lyo wuya kulya muriny kundevia Absalomo, Mmbo shikunndye ikurunndya, woi mangyi shaasa shilerunndya ndoo uka elyo, ‘Neewe kwantana indo llyo kushefishaa kyama kya Ahitofeli kishukyeu kisha yeny. 35A ndesa Sadoki na Abiatari. Vakohani nawo nshi-fo vakai? Naasany neewe wo kindo kushitaa efo kwa mangyi llyo kukifitye vakohani yewo wo Sadoki na Abiatari. 36Nafo mmbo veefo na vana vawo vavii, Ahimaasi ni wa Sadoki na Yonatan ni wa Abiatari. Naasany wo kindo mwamiita wo vasheengye.’” 37Nalyo mbuya ya Davidi Hushai keenda na kulya muriny. Absalomo nawe kaveanga na Yerusalemu.

Currently Selected:

2 SAMUELI 15: MAS2

Highlight

Compare

Copy