2 SAMUELI 14

Yoabu akunndye iviira Absalomo

1Naasa Yoabu mwana wa Serya kamanya shaasa mangyi Davidi akunndye Absalomo. 2Yoabu karuma vandu veende Tekoa, karuma nandeendwa-fo nka umwi atiri urango deny, kashemmbia, “Nkyekunang'are sheelyi kukee kiiyony, kuraa na soori ta kiiyo sheelyi kwafiiyo, mmbo shakutereva kulakwaambe nta mafura-fo, naambo kuve sheelyi kwankaa kiiyony fyeeri fyaasha. 3Llyo kweendeny kwa mangyi kunndemmbia, ‘Nalyo Yoabu kammbia shaasa andevia mangyi.’” 4Nawe nka ulya wa Tekoa llya aleanga kwa mangyi kandewa-si kifulu-fulu yoo mbee ya mangyi kammfiiryaa ndi kammbia, “Woi mangyi mmbo shakutereva, shitarama ukiva lwakwa.”

5Mangyi kammbia, “Niinda?” Nawe kammbia, “Shaasa kushilollye, mangyi, yeny mmbo shikee nka wa ding'u. 6Neeny kishinga kyafo mmbo sheetiri vasero vavii, nawo vakeenda kyaandeeny vakakabana, nawo veekitura nndu avaleta, umwi kakaba yeto ungyi kammbwaa. 7Nalyo vandu woose vakashiindukya yeny vakaamba, ‘Ende nsoro yeto alewaa yeto ungyi naambo luntaiye kiduva elyi alewaa yeto ungyi, lummbwae nawe. Nawe nta nnyashewonaa muye ding'u-fo. Naasany niindo vakunndye ishisoka ekyo kileshikiiya-u deny, kirumike-u, nta mmbakunndye ireeya mmi wakwa muya ding'u-fo.’” 8Nawe mangyi kavia nka yeto, “Kweengye kyeny, shikweenkyaa.” 9Nalyo nka yeto wa Tekoa kavia mangyi, “Woi mangyi nndumi, uravi elu lushiwuiye yeny na mmba ya nde, lyo lulawuiye mangyi nta umangyi lwakwefo.”

10Nawe mangyi kaamba, “Kwakooya nndu akurerya osho shivia, nawe nnyakureryaa lyingyifo.” 11Nawe kammbia, “Woi mangyi nkyekummbwa Nndumi Iruva, Iruva wafo naambo yeto ataiya kiduva neewaa naleengere ilyamara, na mwana-akwa nasandyo-fo.” Nawe kaamba, “Mmbo shakuvia na irina lya nndumi Iruva nta ufii lumwi lwa mwana wafo lluwaa si-fo.” 12Nka yeto kammbia, “Nkye ra yeny kishinga kyafo shirere na mangyi lyimwi nsi ulaalu.” Nawe kammbia, “Kwaambaye.” 13Nka yeto kaamba, “A nkyikyi elyi yewe kulekusara indo kya vandu va Iruva? Kyasheengye shaamba indo mangyi mmbo aleera mbai, mashika mangyi nnyaleviira mwiirishiswa ulya wakwe-fo. 14Mashika yese loose lufwe, mmbo luvakye mura wapusuka ulakivaa iraa-u. Nawe Iruva nnyawaa nndu-fo. We mmbo akusara mesha kya yeto mwiirishiswa. 15Naakwa ni elyi shasha yaa ulaalu isherera na nndumi wakwa mangyi ni elyi vandu valesheerese nnu, neeny kishinga kyafo shakusara, ‘Ra shinderera na mangyi, kulakooye mangyi asheshiniingaa ekyo shantereva. 16Kimmba mangyi ashaarannya naambo naauwe ishinga lyakwe maakony a yeto akunndye ishimamita yeny na mwana yeto wakwa naluute yaa ulaniny Iruva aluvikye.’” 17Nalyo shaamba, “Ekyo nndumi wakwa mmbo akee sha nsu wa Iruva, aidima irauwa mesha na makasha we nndumi Iruva, Iruva wafo nakukaye.”

18Nawe mangyi kavia nka ulya, “Ulaalu mmbo shakutereva, kulashisurumi nta kindo kyimwi kya efyo nkuvesaa-fo,” nka yeto kaamba, “Kwaambaye mangyi wakwa nndumi.” 19Mangyi kammbesa, “Ni Yoabu alekutannya efyo fyoose?” Nawe kammbia, “Woi mangyi nndumi, dede nkwiifo nndu ashiidimaa ilema ekyo mangyi ammaamba na katana-ki-fo, mashika nsero wafo Yoabu mmbwe ashivavavasya kashoora ekyo shireraa yeny kishinga kyafo. 20Na nsero wafo Yoabu mmbo atana indo naambo naalashe kindo ekyo. Nawe mangyi nndumi wakwa mmbo akee mwaarya nnu kavaka nsu wa Iruva, katana amanya mbony ta ulana loose shaasa tikai. 21Llyo mangyi alevia Yoabu, ‘Naasa shanrummbwa mbony yei, enda kundeviira Absalomo nashe.’”

22Nawe Yoabu kawa si kifulu-fulu kanfiirya ndi, kaana mangyi, kaamba, “Shallollya shaasa inu shawonisa ikiiyo yoo kwafo, woi mangyi wakwa nndumi, kimmba mangyi aniinga nsero wakwe filya fyekeemperesha nriminy.” 23Llyo Yoabu aleuka-u keenda fika Geshuri, keende Absalomo fika Yerusalemu. 24Mangyi kavavasa Absalomo nalashe kwakwe-fo, lyo neende kyeny.

Absalomo Akundana na Davidi

25Kulya Israeli koose nkweifo nndu esennyi sha Absalomo-fo. Pookya uvayo fika nrweny nnyetiri teve-fo. 26Fii ta nrwe wakwe mmbo teesangi kamu, tikava shiroo, nawe kava mwituuta wo mwaka lyimwi. 27Absalomo mmbo eniingwa vana vararu va kyuumi na umwi wa kyika. Yeto wa kyika ni Tamari, nawe eke nsha nnu. Davidi asarya Absalomo

28Absalomo mmbo alekaa myaaka ivii myoose kulya Yerusalemu kulore alollya mangyi neeriso. 29Naasa karummya Yoabu nrumi, naambo nashenrwaa kwa mangyi, kyeendi nalakunde isha. Kanrummya nrumi lya kavii kavelema-da. 30Naasa Absalomo kavia varundi vakwe, “Kimmba nrema ya Yoabu ya nganu ifiitani na wakwa, endeny mukandewaatya muro.” Nalyo varundi va Absalomo vakandelyaatya muro. 31Llyo Yoabu alesora Absalomo kyeny kwakwe kandemmbia, “A mmbo kyava inda elyi varundi vafo vakora nrema yakwa?” 32Absalomo kammbia, “Yeny mmbo shilekurummya nrumi kushe kwakwa naambo kushirwaa kwa mangyi shindemmbesa, ‘Mmbo kilemaany-ki elyi shilooka Geshuri? Nshi kyeevaa kyeni kukooye shilekukaya-fo deny?’ Ulaalu shikunndye ifika mbee ya mangyi, na kwakooya shilyamarye nashiwaa.” 33Naasa Yoabu keenda kanderuuya mangyi efyo fyoose, nawe kavaanga Absalomo nawe kawa si kifulu-fulu, kamwiindya, mangyi nawe kamiminda Absalomo kyeemmbwarya.

Currently Selected:

2 SAMUELI 14: MAS2

Highlight

Compare

Copy