2 SAMUELI 1
1
Davidi Amanya kya Ufu lwa Sauli
1Sauli eekifwa llyo Davidi alewuya ammaa ivinga fira yakwe na Vaameleki, kakaa kulya Ziklagi ando a mikonu ivii. 2Nkonu yeto weletya kukasha nndu ooka fireny kulya Sauli eekai, afwani kiluulyi na soori takwe temmba ngosha, Llya alefika alya Davidi akai kawa si kamfiirya ndi. 3Davidi kammbesa, “A nkwi kooka? Kammbia, ‘Shooka kulya ulaleny lwa Vaisraeli.’” 4Davidi kammbesa, “A mmbo kileenda inda efo? Shakutereva shivia.” Nawe kammbia, “Vandu veru mmbo valefunwa vakarisha, na vandu veengyi vamfwa ando amwi na Sauli na mwana wakwe Yonatan” 5Davidi kammbesa, “A nkwi kwamanya Sauli amfwa ando amwi na Yonathan?” 6Nndu ulya kammbia, “Yeny mmbo sheekee uwe ya ifumbu lya Gilboa, shiilolaa, nawe Sauli eekusiiki na ifumu lyakwe lyo itorito vafrasi va vakiduva vekeembingya, na nalamanyi. 7Llya alelola numa ashilollye kashivaanga, shamwiirika.” 8Kashivesa, “Kwava vi?” Shammbia, “Shikee Mwemeleki.” 9Kashivia, “Osho, salala kufii neeny kushiwaa mashika mmbo shambaviswa nnu neeny mmbo shiyou kinanawo.” 10“Naasa shaansora shammbwaa, mashika llya shilelollya kambwa si nnyashiidimaa ikia-fo. Numa sheepoo kofia ilya ya kimangyi eeree na findo filya eeree efo maako, nafyo ekafi shifirye fyoose, mangyi.” 11Nalyo Davidi karanndwa masara akwe, kyoora ting'wa, na valya vekee nawe vakavetana indo. 12Vekapa kiiyo vakaiya, valalye kindo fika nkwaany, veeshiyaa Sauli na Yonathan, na kya vandu vawo valefwa va mmba ya Israeli. 13Naasa Davidi kavia nndu ulya alemweengye mbony. “Nkwi kuukye?” Kammbia, “Yeny mmbo shikee mwana wa muny akee Mwaameleki.” 14Davidi kammbia, “A nta nkuleiryaa yoorwa woko lwafo kuwaa Nsauwe wa Nndumi Iruva?” 15Naasa Davidi kavaanga nsoro umwi kammbia, “Enda nkape kwamuutau,” Naasa kammbwaa. 16Davidi kammbia, “Samu yafo ikuwuye yewe kumuni, mashika ni yewe kumuni kwavika ukureeki kwaamba kulewaa Nsauwe wa Nndumi Iruva.”
Kiiyo kya Davidi Kimaruma kya Sauli na Jonathan
17Naasa Davidi kaiya kya Sauli na mwanaakwe Yonathan eeshamba, 18Kikareiyo efo kyitabuny kya Yashari, kaamba, vana va Yuda Valoshwa findo efi: 19Valya vakee itumbe lyafo vakaa uwe deny ekakawo vammbwaawo, Ewe Israeli Lola shaasa vaafinya valetuulwa. 20Mulakyaambe mbony yeti kunu urukeny lwa Gati-fo nta Mulavambise shieny ta Ashikeloni-fo. Naambo sambura ta Vafilisti valasheekapa Ukoru, Nawo ni vana va vandu valakee varini
21Neeni fidooro fya Gilboa, kwafo
kulookefo laura nta mmbwa-fo,
Nta fimu fya mareminy-fo
Mashika kwafo nng'u tilewa ngao ta
vaafinya
Ngao ya Sauli, ikava sha ya ulya
alandeambwa mafura
22Valya mmbo valewaawa mashika
Ura la Yonatan mmbo lwekeeronga
Na usu lwa Sauli lukava wooyi
23Sauli na Yonatan,
vekee vakunde vakasennya
Vekee na muu ao vammeefwa vakava kindo kyimwi Vakarumbuka sha ngoru,
vakakaarya sha miiso
24Yeni vaka va Israeli iyeny kwa Sauli,
Alemuvika soori tidodorye ta itumbe, katishopa na saabu.
25Shaasa vaafinya valewa fireny,
Neewe Yonatany kwawaiyo uwe ya ifumbu
26Shilerovyo nnu kimaruma kyafo, Yonatan wakwa nkunde,
Elyi kweeshisenyi nnu.
Ikunda lyafo lyeilanyi elyo lya vaka.
27Apaa shaasa vaafinya valewa,
Na shaasa fisha fya fira filemamitwa.
Currently Selected:
2 SAMUELI 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
