2 SAMUELI 2

Davidi Avikwa Mangyi ya Yuda

1Kiikiva indo Davidi kovesa Nndumi Iruva, “A sheenda muriny umwi wa Yuda?” Nawe Nndumi Iruva kammbia, “A ni ungau mmbee?” Kammbia, “Hebroni”. 2Naasa Dvidi kakupoo na vaka vakwe vavii, Ahinoamu wa Yezreeli, na Abikaili, ulya eekee nka wa Nabali wa kulya Karmeli. 3Nawe Davidi mmbo alerwa nafo na vandu valya vakwe ekee nawo, nawo vekee na vandu va kyeny kwawo, vakandekaa Hebron. 4Nalyo vandu va Yuda vakasora-fo Davidi vakandemwaamba mafura nave mangyi ya Yuda. Vakawuya vakavia Davidi, Ni vandu va Yabesh-gileadi valerika Sauli. 5Naasa Davidi karika varumi kwa vandu va Yabesh-gileadi vandevavia, “Nndumi Iruva namuvikye mbora yeni vandu vakwe, kimmba muletannya mangyi yaany we Sauli kya wiindi mukamwaara. 6Nawe Nndumi Iruva namuvikye mbora. Na yeny mmbo nshevemutannyaa mesha indo mashika elyi muletana fya usha. 7Wareny finya, muveva vakaari mashika mangyi yaany Sauli alefwa, na Vayuda vakashaamba yeny mafura shive mangyi waawo.”

Ishboshet Avikwa Mangyi ya Israeli

8Naasany Abineeri wa Neri ekee mwisalallya itorito va Sauli, mmbo embika Ishbosheti mwana wa Sauli nave mangyi ya Israeli, kanduuta neende Mahanaimu, 9nandeshillya Vagileadi na Aseri na Yezreeli, Efraimu na Benjamen, na Israeli woose. 10(Ishboshet kyeeri ekyi ekee wa myaaka makumi aana, kashillya ando a myaaka ivii nsi). Lyo Yuda wo vakalanga ishillyo Davidi. 11Na Davidi mmbo aleshillya kulya Hebron ando a myaaka mfungare na kyenga.

Israeli na Yuda Vakabana Fira

12Naasa Abineeri mwana wa Neri na Varundi va Ishboshet wa Sauli, vakooka mahanaimu veende Gibeon. 13Nawe Yoabu wa Seruya na Varundi wa Davidi vakakupoo vakandekwaanannya alya iruveny lya Gibeoni yeva taari yei na yeva taari yei ya iruva llya. 14Naasa Abineeri kavia Yoabu, “Lweekeye vana-te lulole shaasa vatavaa.” Yoabu kammbia, “Nkisha.” 15Naasa vakakupoo vakaeenda taari ilya ingyi yeekyena lyifye sha llya vandu ikumi na vavii va Benyaminy mmbo va Ishboshet mwana wa Sauli, na vandu ikumi na vavii va varundi va Davidi. 16Vakakutira wo nndu kawara urooye nrwe neekapa usu yoo uvariny marama, nawo vakawa si woose. Ando alya akavaangwa ni “Ando a Ngyusu,” Helkat-hasurimu nafo Gibeon. 17Fira yeyo mmbo ilenyaasya nnu nkonu yeto. Abineeri kavingwa we na vandu va Israeli, vakavingwa varundi va Davidi. 18Nawo vana Vararu va Seruya mmbo veefo, nawo, ni Yoabu na Abishai na Aseheli. Aseli yeu ekee nndu eerishaa sha sarya. 19Naasa kasora Abineeri kulore aleangya kunu ao kulya. 20Abineeri kainduka kallola elyi efo ansoraa, kammbia, “Nnyewe-ro woko usha ao woko umuso, kundesoka nsoro umwi yoo fisha fyakwe.” 21Lyo Asaheli nnyaleirikya ira insorafo. 22Abineeri kammbia lya kavii, “Kulashisore-fo, indukya kulya. Nkimaruma-kyi shikuwaa? A mmbo shekarya inda iwaa mwanamau Yoabu?” 23Lyo we Asaheli kalema yiinduka, llyo Abineeri alenkaba n kitota kya ifumu yoo ndeu, kikandefuma neefo mungo, kafiiya-u kweni. Na wo nndu ekeefika yoo Asaheli alefiyya kasalalau mbele. 24Naasa Yoabu na Abishai vakasora Abineeri, veefikaa ifumbuu, lya Ama kukeela, mfo taari ya Gia kuleenda na Gibeon. 25Na vana va Benyaminy vakakusang'irya veeteterwaa ni Abineeri, vakava ironda lyimwi, veeselelyi uwe ya kidooro. 26Llyo Abineeri alevaanga Yoabu, kammbia, “A usu mmbo lulyaa vandu wo nkonu? Kwiishi nkindo kivavaa-se? A niinda kulashiidimaa yiima vandu ikabana na vana vamaye vawo?” 27Na Yoabu kammbia, “Kya dede ya Iruva akee na muu, kure kularera vandu vakwa mmbo veevingyaa yewo vafo fika ndesi.” 28Llyo Yoabu alekaba iranda, vandu vakwe vakasalala, valakilatye-se Israeli, nta valakikabana-se. 29Abineeri na vandu vakwe vakakupoo kio kilya vakeenda nnang'ani ya Araba vakakyilya Yordan vakeera yoo nnang'ani ya Bitron vakandefika Mahannaimu. 30Yoabu nawe kara ilatya Abineeri kawuya. Eekimaa isang'irirya vandu woose, varundi valya va Davidi vandu ikumi na keenda sanda na Asaheli. 31Vandu va Davidi mmbo venkaba vandu va Benyaminy na va Abineeri vakafwau vandu mayana araru na makumi arindaru. 32Asaheli kanderikwa mbangeny ya ndeye kulya Bethlehemu. Yoabu na vandu vakwe vakeenda kio kyoose kukandekya vekee Hebron.

Currently Selected:

2 SAMUELI 2: MAS2

Highlight

Compare

Copy