1 SAMUELI 31

Ufu lwa Sauli na Vana Vakwe

(1 Fye 10:1-12)

1Nawo Vafilisti vakandekapana na Vaisraeli. Vaisraeli vakarisha vakawaawa alya ifumbuny lya Gilboa. 2Vafilisti vakavingya nnu Sauli na vana vakwe. Vafilisti vakapooka iwaa Yonatan na Abinadabu na Malkishua ni vana va Sauli. 3Fira ikeengera inyaasya nnu taari ya Sauli. Veyaasa na mife vakankooya keereve nnu deny kimaruma kyawo. 4Llyo Sauli alevia ulya mwiikamara fisha fyakwe, Sommwa usu lwafo swany kushidoshe nalo, naambo vandu yeva valaishi Iruva valasheeshaasa wookefo vashitatale. Lyo yeto mwiikamara fisha fyakwe kalema mashika mmbo aleiryaa nnu. Llyo Sauli alewarya usu lwakwe muni kaluwoya. 5Nawe mwinkamarya fisha fyakwe eekilollya Sauli amfwa, nawe muni kawoya usu lwakwe, nawe kavefwa. 6Niindo Sauli alefwa ando amwi na vana vakwe vararu na mwiikamara fisha fyakwe kiwo, na vandu vakwe woose nkonu yeto mweni. 7Naasa vandu va Israeli valya vekee kwakulya ya imungo kwakulya ya Yordan veekilollya Israeli vanrisha, na Sauli na vana vakwe vamfwa, vakasama efo miriny yaawo vakarisha. Vafilisti vakeenda vakandeanga-fo.

8Naasa elyi lya ndesi ya vayo, llya Vafilisti valendetira findo fya valya valewaawa, vakakooya Sauli alya alewa na vana vakwe vararu alya ifumbuny lya Gilboa. 9Vakanrumbwa nrwe, vakaipoo na fisha fyakwe, vakookafo vakarika varumi kulya urukeny lwa Vafilisti koose, vavambise yaamba ekyo kwa maruva awo na kwa vandu vawo. 10Fisha efyo vakafivika mmba kwa maruva awo. Na mwiili wakwe ulatiri nrwe vakauvanika isimambeny wa muri wa Bet-shani.

11Naasa vandu va Yabesh-gileadi vekiita mbony yeto, shaasa Vafilisti valetannya Sauli, 12vandu vakaari va uruka loose vakakupoo vakarua kio tararaa, veerye mwiili wa Sauli na yeyo ya vana vakwe, vannyuuta mmbombony wa Bet-shani, vakashefika Yabeshi vakaimamitya-u. 13Numa vakeepoo maffwa awo, vakaarika sindaa-nri alya Yabesh. Veekimaa efyo, vakakootoya ando a mikonu mfungare.

Currently Selected:

1 SAMUELI 31: MAS2

Highlight

Compare

Copy