2 VAMANGYI 3

Fira nnang'ani ya Israli na Moabu

1Naasa Yoramu mwana wa Ahabu kapooka ishillya Israeli kulya Samaria kwikee mwaaka wa ikumi na nyaya wa Yehoshafati mangyi ya Yuda, kashillya myaaka ikumi na ivii. 2Karunda mitannyi mikasha usanguny lwa Nndumi Iruva, indilyo nshi sha ndeye na maye-fo; mashika eutau ngo ilya ya baali yemmbakyo-u nndeye. 3Kimwi nafyo katana ngyulyamari ta Yeroboamu mwana wa Nebati, ngyulyamari kulare eindima ilakana nato kutani ateere nato vana va Israeli. 4Naasa Mesha mangyi ya Moabu, eke mwiisa mashoonri, kava mwitaa mangyi ya Israeli sufu ya mashoonri fiku iyana, na suva fiku iyana. 5Indi Ahabu ekifwa mangyi ya Moabu kasakya na mangyi ya Israeli. 6Kyeeri kilya kyeni mangyi Yoramu kulya Samaria kaekyena vandu va Israeli woose. 7Karuuya Yehoshafati mangyi ya Yuda nrumi kaamba, Mangyi ya Moabu alensakya na yeny; a ndesa kusheekulungaa na yeny lukapani na Moabu? Kaamba, Nshendaa; yeny mmbwe yeve, vandu vakwa mmbo vandu vafo, fraasi takwa ni frasi tafo. 8Kavesa, A ni shia ingai lushiraa? Kammbia ni shia ya Kasa ka Edomu. 9Naasa mangyi ya Israeli ya Israeli kaenda, na mangyi ya Yuda, na mangyi ya Edomu. Vakepoo kyaaro mikonu mfungare, kulaifo mura weena wa vasikari nta wa findo filya veryani. 10Mangyi ya Israeli kaamba, Oshi lweru! Mmbo Nndumi Iruva alekwaanisya vamangyi eva vararu nandeveera maakony a vamoabu. 11Indi Yehoshefati kaamba, yaa kwiiyo-se Nkisuku wa Nndumi Iruva, alweekye ivesa mbony eti efo kwa Nndumi Iruva? Ishinga lyimwi wa mangyi ya Israeli; karouwa kaamba, Kwiifo Elisha mwana wa Shafati, ulya mwiiletya Elia mura maakony akwe. 12Yehoshafati kaamba, eto mmbwe atiri irero lya Nndumi Iruva. Naasa mangyi ya Israeli, na Yehoshafati na mangyi ya Edomu, vakallatya. 13Elisha kavia mangyi ya Israeli, Nkyokyi kyafo shitiri neewe? Enda kwa vakisuku vandeye-afo, na vakisuku vamaye-afo. Mangyi ya Israeli, kammbia Oode, nshi indo-fo, mashika Nndumi Iruva mmbo akwaanisya vamangyi eva vararu naambo avavike maakony a Vamoabu. 14Elisha kaamba, Nndumi iruva wa matorito eefo na muu, yeto shilemmba ishinga lyakwe, nshekulolaa na miso, nta ikwaanannya na yewe, kulaore ni kimaruma kya Yehoshafati, mangyi ya Yuda-fo. 15Indi, ulaalu sheengye mwiikapa kinanda. Naasa mwikapa kinanda ekiwonika, Nndumi Iruva kanniinga finya. 16Naasa kaamba Nndumi Iruva aamba, Suminy-fo mindeshe kunu kyaandeny ekyi, 17Mashika Nndumi Iruva aamba indi, Mmulollya uraato nta mmbwa-fo indi efo kyaandeny ekyo mmbo kushiishwafo mura wany weena, na ng'umbe tany na findo fyany fya mmba fya ivikya. 18Na mbony yei ni kindo kyaangu deny efo misony a Nndumi Iruva; na Vamoabu muvatire mifungwa maakony any. 19Mushekaba wo muri utiri ulale, na wo muri ukee nsauwe, na imanya wo nri nsha, na ifisha ngyusoka shoose ta mura, na ipapara na mawe wo andu kusha koose. 20Elyi lya ngama kyeeri kyeniingya kiraso kya nswa, ukasha mura wuuka taari ya Edomu ukaishura uruka loose. 21Naasa Vamoabu vekiita sheelyi vamangyi woose vakuumbya andu amwi ikabana nawo, valya vatiri finya ya iraa fisha, na valya vatiri myaaka miingyi vakandekaa kulya mimyanuny. 22Vakakwipoo ngama shuru, na mwi ukamika-mika uwe ya mura, na Vamoabu vekilola mura ulya efo mbee yaawo ukavaka samu, 23Vakaamba ee yei ni samu, vamangyi valya vankumaa veni na veni, ulaalu yeni Vamoabu kamareny mifungwa! 24Naasa vekifika alya ulaleny lwa Israeli, Vaisraeli vakakwiipo vakakaba Vamoabu kutani varisha, vakaengera itana indo kutani vafika minyanuny kwawo. 25Vakawundwa miri yaawo, wo nndu na iive lyakwe vakaanyanyata kundo koose kakaishwa-fo shapu, vakafisha ngyusoka toose ta mura, vakamamanya miri misha myoose, ni mawe a Kir-haresethi nsi esaau; indi valya vesaaye na mawe, vakaushingillya vakaukaba. 26Mangyi wa Moabu ekilollya ammbingwa fira keepo-se lyingyi vandu mayana mfungare vatiri finya naambo varorove usumanu na mangyi ya Edomu nta nalaidimi. 27Naasa ekilollya indo, kaniingya mwana wakwe mmbee, yeto esheshillya andu akwe, kanningya nave kiraso kyeemamitwa uwe ya isimamba. Mbony yei ikeende-fo usuvanu uniini uwe ya Israeli, naasa vakasama kwakwe, vakawuya urukeny lwawo weni.

Currently Selected:

2 VAMANGYI 3: MAS2

Highlight

Compare

Copy