2 VAMANGYI 2

Elia aroswa uwe iruveeu

1Llyo Elia evesha aryani na Elisha wooka Gilgali, Nndumi Iruva kakunda isaamisa Elia iruveeu na uraato lwa kitita-si 2Elia kavia Elisha, Shakutereva, kaa yaandi, mashika Nndumi Iruva anshiruma shifike Betheli. 3Elisha kaamba, yeny na muu wakwa, na Nndumi Iruva eefo na muu, nshikulekeiyaa-fo. Nawo vakeenda fika Betheli. Naasa vana va vakisuku valya vekee kulya Betheli akalatya Elisha, vakammbia, A ndesa! Kwiishi sheelyi Nndumi Iruva akunndye yuutau Nndumi wafo inu? Kaamba, yee, shiishi; malallyeny. 4Elia kammbia, shakutereva, kaa yaandi, Elisha, mashika Nndumi Iruva ashiruma shifike Yeriko. Elisha kaamba, yeny na muu wakwa na Nndumi Iruva eefo na muu, nshikulekeiyaa-fo. Nawe vakafika Yeriko. 5Naasa vana va vakisuku, valya vekee kulya Yeriko, vakalatya Elisha, vakammbia, A ndesa! Kwiishi sheelyi Nndumi Iruva akunndye yuutau nndumi wafo inu? Karouwa, yee, shiishi malallyeny. 6Elia kammbia, Shekutereva kaa yaandi; mashika Nndumi Iruva anshiruma shifike Yordan. Elisha karouwa kaamba, yeny na muu wakwa, na Nndumi Iruva eefo na muu nshikulekeiyaa-fo. Vakeengera kyaaro na mbee woose vekee vavii. 7Naasa vandu makumi araanu va vana valya vavakisuku vakeenda isalala kwaasha kinnywa nawo vekee vavii vakasalala kufii na Yordan. 8Elia kautafo soori yakwe ya yeerya, kailema kavii kakapa nayo mura, ukakwaava kunu na kunu. 9Nawo vakimaa ikillya mura, Elia kavia Elisha, Tereva kindo kukunndye kyoose na yeny nshekuniinga, Kulaore shamoondowa kwaf. Elisha kaamba, shakutereva, shiniinga fyenga fivii fya nrima wafo five ni ding'u yakwa. 10Kaamba, kwatereva kindo kyuumu; indilyo, kwashilollya elyi shisheipowaa kwafo, kushewonisaa; lyo nkwashilollya, nkushewonisaa-fo. 11Nalyo vekee kyaarony, vereraa indo, pari-pari kukasha-u ikari lya muro na frasi ya muro likavarauwa wo vavii; uraato lwa kitita-si lukasaamisa Elia iruveeu 12Nawe Elisha kalollya kafua, Nde-yakwa, Nde-yakwa, ikari lya Israeli na vesaama frasi vakwe! Alaidimi ilollya lyingyi, karandwa soori takwe fyenga fivii. 13Nalyo keepo soori ilya ya Elia ilemmboya, kavuya, kandealala alya mbai ya mura wa Yordan. 14Keepo soori ilya ya Elia ilemmboya, kakapa nayo mura, kaamba, Nkwi Nndumi Iruva akai, Iruva wa Elia? Nawe ekikapa mura ukwaava kunu na kunu, Elisha kakillya. 15Nawo vana va vavakisuku valya vekee kulya Yeriko vakalollya vakaamba, Mumuyo wa Elia mmbo ukee nnang'ani ya Elisha. Vakasha ikwanannya nawe, vakakulema kifulufulu mbee yakwe. 16Vakammbia, Lola, yaa lukai kwiiyo mashinga afo vandu vatoki makumi araanu, lwakutereva vaende vanderuuya nndumi wafo, kulakooye ndesa ni Mumuyo wa Nndumi Iruva wamwiipo ukandemweera uwe ya ifumbuu ao waangyee-u. Kavavia, Mulavarumi-fo. 17Vakaengera imwiitikya kutani alollya usutu; kaamba kyasia! Varuminy. Naasa vakavaruma vandu makumi araanu, vakaruuya mikonu iraru valalollye. 18Vakammbuiya, llya alekyeeyo kulya Yeriko; kavavia, shilemuvia-se mulasheyeenda?

Ngyende ta Elisha

19Vandu va muriny vakavia Elisha, Lwakutereva andu yaa lukai ni muri nsha indi-lyo mura wa vayo ni nkasha na uruka ni uporu. 20Kaamba; Sheengyeny kia kiiya muvike-fo shumbi musheengye 21kakwiipo kafika usokeny lwa mura, keera-fo shumbi ilya, kaamba Nndumi Iruva aamba indi shammeeremuta mura yeu, nkukyikaa kuuke-fo lyingyi kindo kifu nta iwonika-fo kiporu-fo. 22Nato mura ulya ukaeremuka fika inu ndesa Elisha alerera. 23Ooka kulya kasaama kafika Betheli, nawe eshendaa indo kakwaanannya na vana vakoo wooka muriny, vakankapya ngula, vakammbia Saama yewe meewoya! Saama yewe meewoya! 24Kalola numa kavalollya, kavadenga kwa irina lya Nndumi Iruva Ngare ivii ta kyika tikafuma efo ngoroshony tikavarattwa, vana vakoo makumi aana na vavii nnang'ani yaawo. 25Kakwiipo kulya kafika ifumbuu lya Karmeli, na yuuka kulya kawuya kafika Samaria.

Currently Selected:

2 VAMANGYI 2: MAS2

Highlight

Compare

Copy