2 VAMANGYI 4

Elisha eekya nka nkiva wa ding'u

1Naasa nka umwi nnang'ani ya vaka va vana va vakisuku kafuuya Elisha, kaamba, Ishinga lyafo we mmi wakwa alemfwa; na yewe mmbo kwiishi sheelyi ishinga lyafo eke nndu aereiye Iruva, na umwi wa vandu etiri siye yakwe mmbo alesha kwakwa nakamare vana vakwa vavii andevavika mashinga. 2Elisha kammbia, shakutannya-ki? A kye shivia nkyokyi kutiri kulya kyeny kwafo? Kaamba, Yeny ndundi wafo nshitiri kindo kingyi kulya kyeny kwakwa kuuta shupa ya mafura-fo. 3Kaamba, Enda efo kwa vandu vafo va nnyanu woose, kwandesangirya-fo fyia ngata kushidimaa, fyia filatiri kindo. 4Naasa kwaange yefo mmba, kukuraiye-fo yewe na vana vafo. Fyia fyoose filya kwasangirya kuletye-fo mafura, filya fyaishwa fyoose kufivike mbai. 5Naasa nka ulya kakufingya efo mmba na vana vakwe, vakamweengye fyia fyilya nawe kaletya-fo mafura. 6Fyia filya fikimaa yiishwa, kavia mwana shiniinga kia kyingyi Kammbia, nkwiiyo kyingyi-fo. Mafura akamanda. 7Llo eenda kavia nndu ulya wa Iruva. Nawe kaamba, Enda kumba mafura yaandi kwataa siye yafo; na yoo asaafo ni afo na vana vafo.

Elisha na nka Isimba wa Shunemu

8Nkonu umwi, Elisha keenda Shunemu, nafo kweifo nka umwi isimba, nawe kamwiitikya naange kwakwe alye shoonga, Kyikava wo nkonu amiira shia ilya, mmbo eshaangya kalya shoonga. 9Nka ulya kavia mmi wakwe, Yeny shilollye nndu yeu era yaandi kweru wo kyeeri, ni nndu mweele wa Iruva. 10Shakutereva lunsongosikye kiria, kyimi kidu, neefo mmba lummbikye-fo kitara, mesa, kiri na ando kweevika taa, nawe kansha lyingyi naveyaanga-fo. 11Kasha nkonu umwi kaanga kulya kireny kilya kalala. 12Kavia Gehasi ishinga lyakwe, Vaanga Mshunami ulya. Nawe kasha kasalala mbee yakwe. 13Kammbia rera nawe ulaalu, Lolate, ndesa kwanlufurukannya, kwatannywa-kyi ulaalu? A ndesa! Kwanterevya-ki kwa mangyi ao kwa nniini wa matorito? Nka ulya karouwa kaamba, yeny mmbo shikaa na vandu vakwa shimuni 14Kaamba katannywa kyokyi? Gehasi karouwa kaamba, Kya dede nnyatiri mwana-fo na mmi wakwe ammikwa. 15Kammbia, Enda mmbaange. Nawe ekimaa ivaangwa, kasalala mwaangony. 16Kaamba, kwikee kyeeri sha ekyi mwaaka ushaa kushetiraa mwana. Kaamba, Woode Nndumi Iruva wakwa, yewe nndu wa Iruva, kulasheshivia wongo yeny ishinga lyafo. 17Nka ulya kavanlemwa, kaniingwa mwana wa vomi kyeeri sha kilya mwaaka yeto walatya ndesa Elisha emmbia. 18Naasa mwana ulya eking'ana, nkonu umwi kakwiipo kalatya ndeye nreminy. 19Kavia ndeye, “Nrwe wakwa! Nrwe wakwa! Nawe kavia ndundi wakwe mwipoo kwanrwaaya maye.” 20Kamwipoo kanrwaa kwa maye, maye kammbika ng'undeny, kwiikifika nsanyiny kafwa. 21Maye kasaama mmba efo uwe, kamwaara uwe ya kitara kya nndu ulya wa Iruva karaya mmba, kasomuka. 22Numa kavaanga mmi, Kaamba, Shakutereva, shiniinga umwi wa mashinga, na nshungu umwi, naambo sheende kulya kwa nndu ulya wa Iruva swany, shiidimi iwuya. 23Kaamba, a kimaruma kweende-fo inu nkyokyi? Nshi mapookyony a mwiiri nta nkonu wa iimuya-fo. Kaamba, nshi kindo-fo. 24Kamwaallya nshungu. Kavia ishinga llya ndifo enda na mbee kuleefo yiimuya. Shilankuvia kulaangure meengye-fo. 25Naasa keenda, kafika kwa nndu ulya wa Iruva, kulya ifumbuu lya Karmeli. Nndu ulya wa Iruva ekilollya eshaa, kavia Gehasi ishinga lyakwe, endawarya Mshunami afo ashaa kulya. 26Shakutereva angusya-deny, Kummbese, nnamafoo-ro? A Mmi wafo na mwana veefo nisha? Karouwa Veefo nisha. 27Nawe ekifika kulya ifumbuu kwa nndu ulya wa Iruva, kantira marende. Gehasi kakunda imuuta-u, indi nndu ulya wa Iruva kammbia, Nre; kulampaani-fo mashika atiri mavavyo nnang'ani ya nrima wakwe na Nndumi Iruva kashisuruma nalakunde ishivia. 28Nka ulya kaamba, mmbo shetereva mwana kwa nndumi wakwa? Shakuvia kulaseshilemba-ndi? 29Nalyo Elisha kavia Gehasi, kufinge siny, kwipoo nsengye yeu wakwa wokony lwafo, kweende kyafo, kwakwanannya na nndu kulamwiidikire-fo, na nndu kankuidikira kularouwe-fo; kundevika nsengye yeu wakwa uwe ya kisangu kya mwana. 30Maye wa mwana ulya kammbia, nrima wafo, na Iruva yeu eefo na muu nshikulekeyaa-fo. Naasa kakwipoo, kallatya. 31Nawe Gehasi kavasongoya mbee kandevika nsengye ulya yoo uwe yaa kisangu kya mwana; indilyo nkwetiwa unyanga nta kirouwo-fo. Naasa kawuya indembya, kammbia mwana nnyakupoo-fo. 32Llya Elisha efika kyeny kakooya mwana mmbo ammefwa, nnyoo kitareny kyakwe akeemwaare. 33Naasa kaanga mmba kakufingya-fo we na mwana ulya ve vavii kantereva Nndumi Iruva. 34Kasaama uwe ya kitara, kakwaara uwe ya mwana, kavika kana kyakwe uwe ya kana kyakwe, na miso akee uwe ya miso akwe, na maako akwe uwe ya maako akwe; kakoorwa uwe yakwe; mwiili wa mwana ukapooka yiita nrike. 35Kyaangu kawuya kyeny karwa-rwa efo neefo, naasa kasha kasaama kitareny kakoorwa uwe yakwe, mwana ulya koota mmbwa ka mfungare na mwana katarammbwa miso akwe. 36Kavaanga Gehasi, kaamba vaanga Nshunemu. Naasa kammbaanga. Ekifika kwakwe, Elisha kammbia, Ipo mwana wafo. 37Naasa kaanga mmba kafiirya-ndi kamwaana, kyaangu keepo mwana wakwe kasomuka.

Ngyende tingyi ivii

38Na lyingyi Elisha kandefika kulya Gilgali nafo kweifo shaa kulya urukeny llwa, na vana va vakisuku veifo ando amwi nawe. Kavia nndundi wakwe vika sufuria niini rukony, kukorye vana va vakisuku shoonga 39Na umwi waawo keenda yaaya nyany, ekifika kulya kalollya-fo ntango wa ngoroshony kayaya, matango a ngorosho, kutani aishwa kikoi kyakwe, kimmba ilakee miishivye, kaapaparya rukony. 40Naasa vakaniinga vandu yewo, naambo valye. Veefo valyaa, vakakapa kyoorongye vakaamba, Yelu ni Ufu, nkyokyi nndu wa Iruva kwaluniinga. Nta valaidimi ilya. 41Indi we kaamba shengyeny nswa. Nawe kafwallya kulya sufuryeny, kaamba ulaalu niinga vandu valye. Ate kweifo nta kindo kikasha kulya sufuryeny-fo. 42Naasa kasha nndu auka Baal-shalisha, keengye nndu wa Iruva fimu fya mbee mikate makumi avii ya shayiri na ikunnya lya nganu shivisi. Kaamba niinga vandu valye. 43Na nndundi ulya wakwe kaambia, Ekyi nkyo shiniinga vandu iyana? Indi-we kammbia, Niinga vandu naambo valye, mashika ni Nndumi Iruva aamba indo; Valyaa na isarisa. 44Naassa kavaniinga, vakalya, vakasaarisa na irero lya Nndumi Iruva lyikainukya.

Currently Selected:

2 VAMANGYI 4: MAS2

Highlight

Compare

Copy