2 VAMANGYI 20

Ilwaa na ishia lya mangyi Esekia

(Yes 38:1-8, 21-22; 2 Fye 32:24-26)

1Fyeeri yefyo mangyi Esekia kalwaa kufii na ifwa, nkisuku Isaya mwana wa Amosi kansheya, kammbia Nndumi Iruva, aamba indi; “Songosya mbony ta mmba yafo kukeefwa nta nkukeekya-fo.” 2Naasa Esekia kaindutya kisangu kyakwe neefo isimambeny wa mmba, katereva Nndumi Iruva, eshaamba, 3“Shakutereva, woi Nndumi Iruva, kukummbwe ulaalu, myeengye yakwa usanguny lwafo na ngata shilerunda kya dede na usumanu yefo mashoreny akwa na yewe kumuni fikakusennya” Esekia kafua nnu nnu. 4Kulare, Isaya ansomuka ooka kulya kari ka muri ulya irero lya Nndumi Iruva lyikansheya lyishaamba: 5“Wuya kundevia Esekia nsongoru wa vandu vakwa, Nndumi Iruva, Iruva wa Davidi, we ndoo aamba indi; Shammiita fiterewo fyafo, shalollya na misoru yafo; lola shikushiisa, na nkonu wa kararu kushesaama na yefo mmba ya Nndumi Iruva. 6Mmwasi shishekwengyeryaa suku tafo andu a myaaka ikumi na iraanu na yeny shishekukira yewe na muri yeu na finya ya mangyi ya Ashuru, shisheringa muri yeu kimaruma kyakwa na kimaruma kya Davidi nndundi wakwa.” 7Nawe Isaya kaamba, “Endeny nkate wa mafura muusongosye, nalye naambo nakooye isalala.” 8Esekia kavia Isaya, “A ndesa! Mmbo shilollyaa wende-ki shimanye sheelyi Nndumi Iruva ashishiisaa na nkonu wa kararu shisaami na yefo mmba yakwe?” 9Isaya kammbia, “Kya mbony yei mmbo kulollya wende luuka kwa Nndumi Iruva, sheelyi Nndumi Iruva ashetana yekyo aamba; ndesa kirishe kikeenda mbee fitere ikumi, ao kikawuya numa fitere ikumi?” 10Esekia karouwa, “Nkyingakyi kyaangu nkirishe kyeende mbee fitere ikumi; oonde kirishe yekyo kiwuye numa fitere ikumi.” 11Nkisuku Isaya katereva Nndumi Iruva; kaviira kirishe kilya numa fitere ikumi, kilya kyemmoloka fitereny fya Ahasi.

Vandu wooka Babilony

(Yes 39:1-8)

12Kyeeri yekyo Merodak-baladani mwana wa Baladani mangyi ya Babilony karuma barrwa na findo fya pya kwa Esekia mashika emmiita sheelyi Esekia alwee. 13Esekia kavawarya, kavaora mmba na umasi lwakwe loose, fesa saabu na mafura afwaama nisha, fisha fya fira na filya fyoose filekooywa yefo mmba yakwe ya isuruma findo; nkulesaa-fo kindo kimwi kya umangyi lwakwe kulare Esekia alewoora-fo. 14Naasa nkisuku Isaya keenda kwa mangyi Esekia, kaambia, “Nkyokyi vandu yeva vakeyaamba? A mmbo wooka-kwi vakasha kwafo.?” Nawe Esekia kaamba, “Wooka urukeny lwa Babilony.” 15Kammbia, “Nkyokyi vallollya yefo mmba kwafo?” Nawe Esekia karouwa kaamba, “Vallollya wok indo kikee yefo mmba kwakwa; nkwiifo kindo yefo mmba yakwa yeesuruma findo kulare shawoora-fo.” 16Naasa Isaya kavia Esekia, “Aranya irero lya Nndumi Iruva: 17Lolaan kwiifo mikonu ikeesha, findo fyoose yefo mmba kwafo, na filya nde yaafo ensangirya kufike inu, mmbo fishiipowa firawa Babilony; nkisaa-fo kindo kimwi-fo, ni Nndumi Iruva aamba. 18Na vana vafo maata, yewo kuvawonnye kumuni, vashekamarwaa mifungwa, vasheva mashinga yeefo Babilony mmba ya kimangyi,” 19Naasa Esekia kavia Isaya, “Irero lya Nndumi Iruva yelyo kwaamba ni isha.” Mmbo ekusara, “Ukiva nkwi lukai, kwakooya kwiifo ufoo na uringyi yefo muuny mbwakwa?”

Umandoo lwa kyeeri kya Esekia

(2 Fye 32:32-33)

20Mbony toose ta Esekia tilesaa-fo, na widimi lwa mashora moose, na ngata alesongosya kirori kya mura na yeende mura kafita muriny mmbo filakee fireiye yefo kyitabuny kya mikonu kya vamangyi va Yuda? 21Naasa Esekia kafwa kimwi sha vandeye na Manaseh mwana wakwe kashillya ando akwe.

Currently Selected:

2 VAMANGYI 20: MAS2

Highlight

Compare

Copy