2 VAMANGYI 21

Mangyi Manse wa Yuda

(2 Fye 33:1-20)

1Manase etiri myaaka ikumi na ivii kyeeri alepooka ishillya; kashillya Yerusalemu myaaka makumi araanu na iraanu; na irina lya maye evaangwa Hefziba. 2Katana makasha usanguny lwa Nndumi Iruva; fikavaka makasha a vandu va masanga valya Nndumi Iruva alevaumbuta mbee ya vana va Israeli. 3Mashika mmbo alesongosya-se ando kwa uwe kulya Esekia we ndeye ellya mara; katannya Baali kitara kyeerasya kasongosya Ashera sha ilya alesongosya Ahabu mangyi ya Israeli, kasheindya mimuuyo mikasha myoose ya iruveeu, na iifurukannya. 4Nalyo kashesongosya kitara kyeerasya yefo mmba ya Nndumi Iruva, kilya Nndumi Iruva emaamba, “Kunu Yerusalemu nsheselesaa-fo irina lyakwa.” 5Nalyo kashesongosya-fo kitara kyeerasya maruva yefo mmba ya Nndumi Iruva. 6Naasa kaniingya mwana wakwe kiraso kya imamita, kimaruma kya usavi na ilafya, katana makasha meengyi a unyafi usanguny lwa Nndumi Iruva. 7Naasa ifwanu llya lya Ashera esongosya kashelyivika kulya mmba ilya Nndumi Iruva evia Davidi na Solomon mwana wakwe, “Kunu mmba yei na kunu Yerusalemu, mmbo shilemma isauwa nnang'ani a ngyufyari toose ta Israeli, nng'u ando shisheindywaa llung'anu; 8mmbashekikupoo kunu Israeli nta ira-raa kwaasha na uruka yelu shilemma iniinga vandeye vawo-fo, kwakooya vakwiisa na yiindya mavavaso akwa na alya a ishinga lyakwa Mose.” 9Indi-lyo mmbalekunda yaarannya-fo nawe Manase keengera-se ivateere vakatana makasha akailannya alya etanwa mmbandu va masanga alya Nndumi Iruva evamamita usangun lwa vana va Israeli. 10Naasa Nndumi Iruva karera kwa varundi vakwe vakisuku, kaamba, 11“Kimmba Manase mangyi ya Yuda allyamara, katana makasha kailannya alya moose vetana Vaamori valya vekee kunu kwambee yakwe, nawe kateere vayuda na mafwanu akwe; 12Kweekyo Nndumi Iruva aamba indi, we Iruva wa Israeli, Lola shikeyeendengapo uwe ya Yerusalemu na uwe ya Yuda, mkasha avavisaa, na wo nndu yeto ashiita maarwi akwe mmbo ashesuruvaa. 13Shimweengye ngapo nnang'ani ya Yerusalemu na Samaria, shindesandya-fo na mmba ya Ahabu; shindengata Yerusalamu sha nndu ashaangataa kideeva kakifulutya-si. 14Na veni ding'u valya vasaa-fo shishevaanta-fo, shivaniingye maakony a vakiduva vawo, vashekamarwaa nrapu na mashinga yefo kwa vakiduva vawo, 15kimaruma kya itana makasha mbee ya usangu lwakwa, sharooywa nngo, kufike nkonu ulya sheuta vandeye kulya misri kufike nkonu wa inu.” 16Kilanya ya fyoose Manase mmbo apusuye samu ya vandu veengyi valatiri mbese na nndu, kutani yawala-wala urukeny koose kupookya Yerusalemu; kyeendwa mmbwe Kateere Vayuda vakatana ulyamari mbee ya usangu lwa Nndumi Iruva. 17Ulaalu, findo Manase atannyi yefyo fisaaye-fo, na filya fyoose aletana, na ngyulyamari atannyi mmbo filakee fireiye yefo fitabuny fya mikonu ya Vamangyi va Yuda? 18Naasa Manase kafwa, kimwi sha vandeye, kaarwa kulya kyaambeny kya mmba yakwe kulya kyaambeny kya Ussa; na Amon nsero wakwe kashillya ando akwe.

Mangyi Amoni wa Yuda

(2 Fye 33:21-25)

19Amon etiri myaaka makumi avii na ivii kyeeri epoka ishillya, nawe kashillya Yerusalemu myaaka ivii. Irina lya maye ni Meshullemeth mfu wa Harus wa Yothbah. 20Nawe kava mwiitana makasha mbee ya usangu lwa Nndumi Iruva, kimwi sha Manase we ndeye. 21Meengye yakwe myoose ikavaka meengye ya ndeye, nawe kava mwiifurukannya mafwanu na iayiindya. 22Kafuluta Nndumi Iruva, Iruva yeto wa vandeye nta nalakunde ilatya shia ya usumanu ya Nndumi Iruva. 23Nawo varundi va Amon vakandevika kyama kya uriingi uwe ya mangyi kutani vandemmbwaiya yefo mmba yakwe muni 24Indi-lyo vandu va uruka lulya vakarumata vandu valya woose vevika kyama kya iwaa mangyi Amon, na andu akwe vakavika-u Yosiah nsero wakwe nave mangyi andu akwe. 25Naasan, mashora yoo moose Amon atannyi na yoo alesaa-fo, mmbo alakee mareiye yefo kyitabuny kya mikonu ya vamangyi va Yuda? 26Karikwa kifun kyakwe kulya nnden wa Ussa, na mwana wakwe Yosia kashillya andu akwe.

Currently Selected:

2 VAMANGYI 21: MAS2

Highlight

Compare

Copy