2 VAMANGYI 1

Elia na Mangyi Ahasi

1Ahabu ekimaa ifwa, Moabu vakeepoo fira na Israeli. 2Naasa Ahasia kashewa sumbai ooka kai ka mmba yakwe kulya Samaria, kavavyo nnu, karuma vandu, kavavia, Endeny mukandevesa baal-zebubu, iruva wa Ekroni kwakooya shikia ndwari yei. 3Indi nsu wa Nndumi Iruva kavia Elia Mtishbi; Nakwiipo andekwaanannya na vandu va mangyi ya Samaria, andemmbesa kwakooya kuleefo Iruva kunu Israeli koose kutani mwenda kwa baal-zebubu iruva wa Ekroni? 4Kimmba ni indoony, Nndumi Iruva mmbo aamba indi, Nkusholokaa yoo kitareny ekyo kulaaye-fo, ni kuti kufwe. Naasa Elia keengya. Varumi valya vakawuya kwa mangyi, nawe kavavesa, 5“A ni inda mwawuya?” 6Vakammbia, mmbo kwiifo nndu alekwaanannya neese, kaluvia, wuyeny kwa mangyi yeto alemuruma, mundemmbia, Nndumi Iruva mmbo aamba indi, a mmbo kuleefo Iruva kunu Israeli koose, kutani mundevesa mbony kwa Paal-sepupu, iruva wa Ekroni? Kimmba niindony, nkusholookaa yoo kitareny ekyo kulaaye-fo, kuti kufwe. Elia keenda. 7Kavavia, A ndesa! Nndu yeto alesha kakwaanannya na yeni kamuvia marero yoo, mmbo ekee nndu wa ngata ingai? 8Vakammbia mmbo eree soori ya mafwaa, na lyingyi ekufingye ukova lwa shonyi kisiny kyakwe. Nawe kaamba eto mmbwe Elia Mtishbi. 9Llyony mangyi karuma nshilyi wa vasikari makumi araanu, na makumi araanu vakwe, veengye Elia. Vakallatya kakooya Elia eke rembo ifumbuu. Kammbia, Yewe nndu wa Iruva mangyi akuvia Ooloka. 10Elia karouwa, kavia nshilyi ulya wa vasikari makumi araanu, kwakooya yeny ni nndu wa Iruva, wooloke muro wuuka iruveeu, ukumamite yewe na makumi araanu vafo. Muro ukaoloka ukammamita we na makumi araanu vakwe. 11Kaaruma-se nshilyi wa makumi araanu ungyi amwi na makumi araanu vakwe. Veengye Elia, Karouwa, kammbia, Yewe nndu wa Iruva mangyi aamba, uviny Oloka. 12Elia karouwa kammbia, Kwakooya yeny ni nndu wa Iruva, wooloke muro wuuka iruveeu, ushekumamita yewe na makumi araanu yafo. Muro wa Iruva ukaoloka wuuka iruveeu, ukammamita we na makumi araanu wakwe. 13Na lyingyi karuma-se nshilyi wa makumi araanu wa kararu, andu amwi na makumi araanu vakwe. Nshilyi ulya wa makumi araanu a kararu, kasama kafika, kandefiirya-ndi mbee ya Elia, kamwoshora, nnu, kammbia, Yewe nndu wa Iruva, shakuoshora, muuwakwa na muu wa mashinga yaa akwa, makumi araanu shavika maakony afo. 14Mashika muro mmbo ulooloka wuuka iruveeu ukamamita vashilyi valya va makumi araanu vavii va mbee andu amwi na makumi araanu vawo, indi ulaalu muu wako shauvika efo maakony afo kushisarye. 15Nsu wa Iruva kavia Elia, Oloka andu amwi nawe kulaereye-fo. Kakwipoo kaoloka kafika kwa mangyi andu amwi nawe. 16Kammbia, Nndumi Iruva aamba indi, Kimmba kwaruma vandu vavese kya Baal-sebubu, iruva wa Ekroni, a mmbo kuleefo Iruva ndesa kunu Israeli, kuvese mbony yakwe? Kimmba ni indo, nkushooloka alya kitareny kilya kulesaama-fo, ni kuti kufwe. 17Naasa kafua na irero lya Nndumi Iruva llya lyilererwa ni nkisuku Elia lyikainukya. Nawe Yoramu#1:17 Yoramu: Mitambasshwe ya kasha mmbo yaamba mmwanamaye wa nndu, kya indi irero elyi llyiifo nreryeny va Kiebrania-fo. kapooka ishilya andu akwe kwikee mwaaka wa kavii wa Yehoshafati mangyi ya Yuda; mashika we nnyetiri mwana-fo. 18A findo fyoose filasaau, filya Ahasia aletana, mmbo kulare filereiywa efo kyitabuny kya mikonu ya vamangyi va Israeli? Ao, Yehoramu; ao Yoramu mwanamaye.

Currently Selected:

2 VAMANGYI 1: MAS2

Highlight

Compare

Copy