1 VAMANGYI 22

Nkyisuku Mika Ekyimba Ahabu

(2 Fye 18:2-27)

1Vakakaa myaaka iraru kuleefo fira nang'ani ya Shamu na Israeli. 2Kwiikyifika mwaaka wa kararu Yehoshafati mangyi ya Yuda, keenda kwa mangyi ya Israeli. 3Mangyi ya Israeli kavia varundi vakwe, A ndesa mmbo muleeshi Ramoth-gilead ni yeeru? Nta kulare lwansoka mangyi yei ya Shamu? 4Kavia Yehoshefati, A ndesa kushendaa neeny lundekapana na Ramoth-gilead? Yehoshafati, kavia mangyi ya Israeli. Yeny, mmbwe yewe, vandu vakwa ni vandu vafo, na frasi takwa ni frasi tafo. 5Yehoshafati kavia mangyi ya Isaeli, “Shakutereva kuvese mbele Nndumi Iruva irero elyo.” 6Naasa mangyi ya Israeli kaumbya vakisuku ando amwi, sha vandu mayana aana indi. Kavavia, A ndesa shakwipoo shindekapa fira Ramoth-gilead? Ao shakusye-do? Vakammbia, kweengye mashika Nndumi Iruva ashekukapannya. 7Indi Yehoshafati kaamba, A ndesa mmbo kulaiyo nkisuku wa Nndumi Iruva yaandi naambo kummbese-we? 8Nawe mangyi ya Israeli kavia Yehoshafati, Kwiiyo nndu umwi lushiidima immbesa kwa Nndumi Iruva, Mikaya mwana wa Imla; indi yeto nshinkunndye-fo, mashika ukisuku lwakwe llushikunndya mesha-fo, ni makasha tupu. Yehoshafati kaamba, oode! Mangyi nalashee yaamba indo-fo. 9Nalyo mangyi ya Israeli kavaanga nshilyi, kammbia, uviny sheengye Mikaya mwana wa Imla. 10Naasa mangyi ya Israeli na Yehoshafati mangyi ya Yuda wo nndu eree soori ta kimangyi, eekaaye kiri kyakwe kya ushilyi, mbengyeny ya samaria na vakisuku woose vakaauyankisuku mbee yaawo. 11Nawe Sedekia mwana wa Kenaana, kakusongosiya mbembe ta minya, kaamba Nndumi Iruva, aamba indi, kwa mbembe yeti mmbo kushekunaa Vaashami kutani valyamarika. 12Na ukisuku lwa vakisuku woose lukava lwa ngata imwi veamba, Enda Ramoth-gilead, kushevinga mashika Nndumi Iruva ashekukanya. 13Nawe nndu ulya erumwa kandevaamga Mikaya, kammbia, kulollye-ro, ndesa marero a ukisuku lwawo lumwi na irera mesha mbee ya mangyi, neewe ulaalu shakutereva kurere marero mesha sha ewo vengyi. 14Mikaya kaamba, Nndumi Iruva eefo na muu, irero elyo sheshivyoo ni Nndumi Iruva, llyo shishelyaambaa.

15Nalyo akifika kwa mangyi, mangyi kammbesa, Andesa, Mikaya lukeenda Ramoth-gilead ikapana fira ao lukamalallya? Kammbia, enda kundevinga mashika Nndumi Iruvva ashekukapannyaa. 16Mangyi kaambia, Ami Matorito eenga shishekuvesaa kutani kikee kya usumanu kwa irina lya Nndumi Iruva? 17Kammbia, mmbo shilelollya Vesraeli woose venyanyankye kulya mafumbuu sha mashonri alatiri mwiisi. Nndumi Iruva, kaamba; Eva mmbatiri muni-fo; wo nndu nawuye kyeny kwakwe na ufoo.

18Mangyi ya Israeli kavia Yehoshafati Anshilekuvia, sheelyi ukisuku lwakwe, nshilo lushikunndya mesha-fo indi ni makasha tupu? 19Mikaya kaamba, Ulaalu arannya irero lya Nndumi Iruva, mmbo shilelollya Nndumi Iruva ekaaye kiri kyakwe kya umangyi/Ushilyi, na vasikari vakwe woose va efo iruveeu veselelyi taari ya woko usha na woko umuso. 20Nndumi Iruva kaamba, Ni wovi ashelembaa Ahabu, naambo neende kulya Ramoth-gilead naambo andefiiya-fo? Naasa umwi kaamba indi na mangyi kaamba indi. 21Kukasha unyanga mbee ya Nndumi Iruva lushambaa, “Ni yeny shillembaa. 22Nndumi Iruva kammbesa, Mmbo kullembaa inda? Kammbia mmbo nshendaa shive mumuyo wa wongo efo kaniny ka vakisuku vakwe woose. Kaamba, ‘Shammiirikya kushiidimaa illemba dede, enda kwandetana indo.’” 23Naasa lolany, Nndumi Iruva ammbika mumuyo wa wongo efo kaniny ka vakisuku vafo woose. Nawe Nndumi Iruva karera kyafo kyikasha. 24Nalyo Sedekia mwana wa Kenaana, kaserikya kufii, kakapa Mikaya woi lwa yuundu, kaamba, A mumuyo wa Nndumi iruva mmbo alooka inda kwakwa naambo asherera na yewe? 25Mikaya kammbia, kwiise nnu, ulya kurishaa kiryeny, kya nnang'ani llyo kushemanyaa. 26Mangyi ya Israeli kaamba, Ipoony Mikaya mukammbiira kwa Amoni nniini wa muri, kulya kwa Yoashi mwana wa mangyi. 27Mundaamba, Mangyi, mmbo aamba indi, Vikeny nndu yeu efo kifingyoni mushenniinga-fo shoonga na mura wa ukiva kutani kwafika nkonu yeto shishaa na ufoo. 28Mikaya kaamba, Kwammbuya-deny na ufoo, naasa llyo kumanyaa Nndumi Iruva nnyarera na yeny-fo kaamba eni vandu woose mwammiita.

Ufu lwa Ahabu

(2 Fye 18:28-34)

29Naasa mangyi ya Israeli na Yehoshafati mangyi ya Yuda vakakwipoo vakafika Ramoth-gileadi. 30Mangyi ya Israeli kavia Yohashafati, yeny mmbo shikeeuta-fo soori ta kimangyi shikwaalashe, shaange fireny; indi-lyo raa soori tafo. Mangyi ya Israeli kakwaalasha kanga fireny.

31Naasa mangyi ya Shamu, emmbavasa vaniini va mitika akwe makumi araru na avii, kavavia, Mulashekapana na nndu nniini ao nndu n-du, kuuta mangyi ya Israeli sheni. 32Naasa vaniini va mitika vekilollya Yehoshafati, vakaamba, Yeu mmbwe mangyiya Israeli. Vakamwiindukya naambo vakapani nawe, nawe Yehoshafati kakapa kyoorongye. 33Naasa vaniini va mitika vekilollya sheelyi nshiwe mangyi ya Israeli, vakainduka numa valakillatye. 34Nndu umwi kaomwa mfe wa uroi kipashuka kandekapa mangyi ya Israeli, alya masara akwe a minya akulungye, naasa kandevia ulya mwiikamara ikari lyakwe, andemuuta kulya nnang'ani ya vasikari va fira; mashika a mavavio nnu. 35Fira ikaengera inyasika nkonu ulya, mangyi kavikwa kulya ikariny lyakwe, kilasha na miishivire ya Vaashami, kwiikifika nkwaany mangyi kafwa, samu yuuka fyaasheny fyakwe ikapusukya kulya ikariny. 36Nkwaany nkyeere wishoolokyaa, wombe lukakapwa, vakavyo wo nndu eende muriny wakwe na kyeny kwakwe. 37Kweekyo mangyi kafwa kaipowa kandearwa kulya Samaria. 38Vakasangya ikari alya iruveny lya Samaria, na samu ilya ikakombwa ni fite. Na vaka va sshya vakakusangya-fo; irero lyikainukya shaasa Nndumi Iruva aleamba. 39Na mbony shoose ta Ahabu tilesaau, na tilya, shoose alerunda, na mmba ilya ya mbembe aletana, na miri myoose aleitana mfikee fireiye efo kyitabuny-kya-mikonu kya vamangyi va Israeli. 40Naasa Ahabu kaarwa na vandeye vakwe; na mwana wakwe Ahasia kashilya ando akwe.

Mangyi Yehoshafati va Yuda

(2 Fye 20:31–21:1)

41Yehoshafati mwana Asa mmbo epooka ishillya uruka lwa Yuda kwiike mwaaka wa kaana wa Ahabu mangyi ya Israeli. 42Yehoshafati etiri myaaka makumi araru na iraanu kyeeri epooka ishillya; kashillya Yerusalemu myaaka makumi avii na iraanu. Na irina lya maye evaangwa Asuba mfu wa Shilhi. 43Kalatya ngyayo ta Asa we ndeye, nta kulare aalashika, katana fya usha mbee ya Nndumi Iruva. Indi ando alya kweerasya nkweutwau-fo, vandu vakaniingya kiraso kyeekora, sabihu na ufumba alya ando kweerasya. 44Yehoshafati kasheruuya ufoo na mangyi ya Israeli. 45Na mbony shoose ta Yehoshafati tilesaa-u na usumanu aletana, na ngata alekapana fira, mfikee fireiye efo kyitabuny-kya-mikonu kya Vamangyi va Yuda.

46Na lyingyi vandu vafiri woose valesaa urukeny, kyeeri kya Asa we ndeye kavauta-fo. 47Nta kweifo mangyi Edomu-fo, eto kwasi yakwe mmbwe mangyi.

48Yehoshafati kasongosya merikebu ta Tarshishi tindeondwaa-fo saabu, indi ntekyeenda-fo mashika merikebu tendefikya kulya Esion-geberi.

49Naasa Ahasia mwana wa Ahabu, kavia Yehoshafati, Varundi vakwa veende ando amwi na varundi vafo kulya merikebuny. Yehoshafati kanlemya. 50Naasa Yehoshafati kafwa, karikwa ando amwi na vandeye, kulya muriny wa Davidi we ndeye; na mwana wakwe Yeroboamu, kashillya ando akwe.

Mangyi Ahasia va Israeli

51Ahasia mwana wa Ahabu, mmbo epooka ishillya Israe li kulya Samaria, kwiike mwaaka wa ikumi na mfungare wa Yehoshafati mangyi ya Yuda, kashillya Israeli myaaka ivii. 52Katana makasha mbee ya Nndumi Iruva, kalatya ngyayo ta ndeye, na ta maaye, ta Yeroboamu mwana wa Nebati, ulya aleteere Israeli. 53Karundya maruva a wongo, na iaindya, kafuluta Nndumi Iruva, Iruva wa Israeli, na mikaaye myoose mikasha ndeye alekooya itana.

Currently Selected:

1 VAMANGYI 22: MAS2

Highlight

Compare

Copy