2 VAKORINTO 4
4
Simbo ta Mumuyo fiyyeny fya uteeri
1Naasany, kimmba lutiri urundi elu, shaasa lulelyimywa isaryo, llusheelelekaa-fo. 2Mashika findo efyo fya sony fya kirika mmbo lulefilema, nta llukaa na ntambo-fo, nta isasanda irero lya Iruva na wongo-fo. Mashika lukammora ekyo kyikee kya dede paa, mmbo loora shaasa lukee va usumanu, mirima ya vandu iiluvikyaa ukureekyi mbee ya Iruva. 3Lyo kwankooya Nrumi ya Nsia yei yeeru yansurumwa, mmbo yasurumwa kwa yewo vakeereka; 4yewo iruva lya ulana yelu lyilesingira makusaro awo, kimmba valairikkye, na sa ya nrumi ya nsia ya Kristo yeto akee kyaaso kya Iruva ikara ilavafumya. 5Mashika yese llukeekuvambisya luveni-fo, kuuta ni Kristo Yesu sheelyi ni Nndumi, neese sheelyi mmbo lukee varundi vany kimaruma kya Yesu. 6Mashika kimmba Iruva aleamba, “Sa imike ireeminy” mmbwe yeto alemika kunu miriminy yeeru, naambo naluniinge sa ya urango lwemanya Iruva lwiilolaa Yesu Kristo.
7Lyo mmbo lutiri umasi yelu fiiyeny fya uteeri naambo usuri yelo uniini luve lwa Iruva, lulaukye kweru. 8Mmbo luringityo nngatara, lyo lulafotwa, lukatirwa nnyinyira, lyo lulaute pa. 9Lukasutwa lyo llukeerewa-fo, lukafwalywa si, llyo llukeemamitwa-fo. 10Wo nkonu mmbo lurye iwaawa lya Kristo kunu miiliny yeeru, na muu wa Yesu ushelollyo paa miiliny yeeru. 11Mashika yese lukee na muu wo nkonu mmbo lukeerawa lundefwa kimaruma kya Yesu, naambo na muu wa Yesu ulollyo paa miiliny yei yeeru iraiye ufu. 12Naasany yoo nng'u ufu lwakoora nnang'ani yeru, na muu nnang'ani yaany. 13Kyaindi kimmba lutiri mumuyo ulya mweni wa kyikusiryo, shaasa kyikee kyireiye, “Mmbo shilekusirya-u, nakyo kimaruma shilerera, yese mmbo lukusirye-u, na kyeendwa nkyo lukarera. 14Lwiishi sheelyi yeto aleruta Nndumi Yesu, mmbo ashelurutaa neese ando amwi na Yesu, na ilusanda ando amwi neeni. 15Mashika findo fyoose nkimaruma kyany, naambo elyi isarya elyo lyisheengerwaa nnu kwa yewo veengyi kyaanu king'ani na Iruva nawoni iitikiswa.”
Ikaa kikusiryony
16Kweekyoony llusheelelekaa-fo, na kyikava unndu lweru lwa kyipoo lukeekwa. Lyo unndu lweru yelo lwa efo nnang'ani mmbo lukevikwa wiiya nkonu simu. 17Mashika ngatara yeeru nshaang'u ikaveva ya kirambo kyaangu-da, nayo mmbo yalweengye itumbe llya lya llung'anu lyiilannyi nnu. 18Naambo lure lulalole nnu yefi filollyo ulaalu, llulle efyo filalollyo. Mashika efi filollyo ulaalu mfya kirambo-da, lyo yefyo filalollyo mfya llung'anu.
Currently Selected:
2 VAKORINTO 4: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
