2 VAKORINTO 5

1Mashika lwiishi elyi mmba yei lukee ulaalu, nnyo miili yeeru, elyi ishelyamarwaa, mmbo lutiri mmba ingyi kwa Iruva, ilakee shitani mmaako a nndu, ikee ya llung'anu iruveeu. 2Mashika kunu mmbeny yei mmbo lukee ilyilyika, lilangaa nnu iwona kirembo ekyo kya iruveeu, 3lukamaa iwona ekyo llukilolyoo lukee mbereto-fo. 4Mashika yese lukee mbeny yei mmbo lukee ishilyilyika, lwiirovyoo, nshi lukunndye luutwa soori-fo, mmbo lukundye luvikwa, naambo kilya kifwaa kimirwa efo muuny. 5Naasany yeto aleluvika-u kimaruma kya irero elyo yeni ni Iruva, na mmbwe aleluniinga kiringisyo kya Mumuyo. 6Nkyoony lukatira nrima nkaari nkonu simu, neemanya sheelyi kyeeri lukee na mwiili yeu mmbo lukee kwaasha na Nndumi. 7(Mashika mmbo lwakaa na kikusiryo, nshi kwa ilola na miso-fo). 8Naasa mmbo lutiri nrima nkaari neese mmbo lulollye nkyeni lure lulakaa na mwiili yeu lundekaa na Nndumi. 9Na kyingyi-se kwakooya lukee yaa, ao kwakooya lulaiyo mmbo lwavina insennya we. 10Mashika yese loose mmbo kilukooye ishesaleeswa yoo mbee ya kitima kya mwaandu kya Kristo, naambo wo umwi nawonise weesi lwakwe kya efyo aletana ekee na mwiili, shaasa aletana, kwakooya fyekee fikasha ao fisha.

Isandwa na Iruva kyeendwa ni Kristo

11Naasany lukantira weerei lwa iiryaa Nndumi mmbo lloomwa vandu neemanyika paa mbee ya Iruva. Neeny shivikye nsia mmbo lumanyikye deny efo miriminy yaany. 12Mashika llukikurumishaa luveni mbee yaany-fo, lyo mmbo lwamoora kimaruma kyeekurumisha kimaruma kyany, naambo muwoni nnduma yeto kwa yeto vekurumisha kya findo fya kyipoo, filakee fya efo nriminy. 13Mashika kwakooya lukee sha vasukwa, nkimaruma kya Iruva; ao kwakooya mirwe yeeru mmisha nkimaruma kyany. 14Mashika ikunda lya Kristo mmbo lyikeelwiitika, mashika mmbo lukeyuutyo uvingo, elyi umwi alefwa kimaruma kya woose, naasa woose mmbo valefwa. 15Na lyingyi mmbo alefwa kimaruma kya woose, naambo yewo vakee na muu valakikae na muu kimaruma kyawo veni kyaindi ni kimaruma kya yeto alefwa karuka kimaruma kyawo. 16Nkyoony, uka ulaalu yese lwiishi nta nndu umwi kyikee kya mwiili-fo. Na kyikava yese mmbo lulemanya Kristo lukee na mwiili yeu, kyaindi ulaalu nshi indo-fo. 17Naasany nndu kankaa nnang'ani ya Kristo mmbo ammaaluka kyuumbe kiiya, mbony ta kasha mmbo tammiira, ekato tammba shiiyaa. 18Kyaindi findo fyoose nkwa Iruva fyuukye, yeto alelusanda nawe kyeendwa ni Kristo, nawe mmbo aleluniinga urundi lwa usandi. 19Nkyo kyaamba Iruva mmbo ekee nnang'ani ya Kristo, ekusandaa we muni na ulana, nalaveekennyi uravi lwawo, nawe kavika nnang'ani yeeru irero elyo lya usandi. 20Naasany mmbo lukee varumi va Kristo, kive sheelyi Iruva mmbo akee iitika na kana kyeru; mmbo lwamwikima yeni kimaruma kya Kristo musandwa na Iruva. 21Yeto nalaishi ulyamari mmbo aleva llyamari kimaruma kyeru, naambo yese lukooye iva usumanu lwa Iruva kyeendwa mmbwe.

Currently Selected:

2 VAKORINTO 5: MAS2

Highlight

Copy