2 VAKORINTO 3
3
Varundi va Kyaasa Kiiya
1A-nyiraa mmbo lwampooka lyingyi ikurumisha luveni? A-mmbo lukunndye kimwi sha vengyi barrwa teemurumisha timusheye ao tuuke kwany? 2Barrwa yeeru nnyo yeni, ikeeshireiye miriminy yaany iishiwa na ikeesomwa ni vandu woose; 3mmbo mumanyikye paa sheelyi mmbo mukee barrwa ya Kristo ikeeshirumi ni yese, ilakee shireiye na winu, kuuta Mumuyo wa Iruva akee na muu, nta nshi maboony a mawe-fo, kuuta ni maboo akee ni mirima ya vandu.
4Na ivika nsia elyo lulyitiri mbee ya Iruva kyeendwa ni Kristo. 5Nshi sheelyi mmbo lumaye ikusara kindo kyoose sheelyi nkyeru luveni-fo kyaindi wiidimisyo lweru mmbo luukye kwa Iruva. 6Nawe mmbwe yeto akeelwiidimisya iva veekeya Nrumi ya Nsia; nshi wa mareiyo-fo, lyo mmbwa mumuyo, mashika mareiyo mmbo awaa, lyo Mumuyo to mmbo urutaa. 7Naasany kwakooya urundi lwa ufu lukeeureiye neetitwa efo maweny lulesha na itumbe nta Vaisraeli valaidimi ivikya kisangu kya Mose miso, kyeendwa ni itumbe lya kisangu kyakwe, nalyo lyeekeny itumbe llya lyilyamarikaa. 8A-le ndesa, urundi yelo lwa mumuyo llusheilannyaa ikaa itumbeny? 9Mashika kwakooya urundi lwa ngapwa lutiri itumbe, a urundi yelo lwa usumanu nshi lushetiraa itumbe mmwasi? 10Mashika naakwa ni lulya lulerumishwa lweetiri itumbe indi-fo kyeendwa ni itumbe elyo lyiilanyi mmwasi. 11Mashika kwakooya urundi lulya lulyamarikaa lwetiri itumbe, yelo lwesinda-u mmbo lushetiraa itumbe mmwasi.
12Naasany, kimmba lutiri ivereya lyifye indo, mmbo lwakaarya nnu. 13Neese nshi kimwi na Mose llya alesikkya kisangu kyakwe na kirami-fo, naambo Vaisraeli valalole nnu itumbe elyo lyilalyamarikaa. 14Kyaindi makusaro akarovyo, mashika kufike inu, kyeeri Kyaasa Kyikuu kyikee isomwa kirami kilya kyeesikkya kisangu mmbo kyiiyo, nkyo kyaamba mmbalesukuyo kyeamba mmbo kyautwa-u ni Kristo-fo. 15Lyo fika inu, kyeeri uvavaso lwa Mose lukeesomwa, kirami kilya kyeesikkya kisangu mmbo kyikaaye mirima yaawo. 16Kyaindi kwakooya vainndukya Nndumi, kirami kilya mmbo kishutwaa-u. 17Kyasiany, “Nndumi” mmbwe Mumuyo, na ando Mumuyo wa Nndumi akai, yoo nng'u na uleke lukai. 18Lyo yese loose, mmbo lukeeviira-u itumbe lya Nndumi lukee na kisangu kilatiri kirami, sha nndu alolaa kiloleny, mmbo lwaalashwa luve va kyaaso ekyo kyeni, itumbe lyisorye itumbe, sha itumbe elyo lyauka kwa Nndumi, we Mumuyo.
Currently Selected:
2 VAKORINTO 3: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
