2 VAKORINTO 2

1Kyaindi nriminy wakwa mmbo shekundye indi, shilashe kwany na ting'wa. 2Mashika kwakooya shamuniinga ting'wa ni vi yeto ashiningaa ifura yeny kuuta yeto akeeningwa ting'wa nnyeny? 3Neeny mmbo shemureiya irero elyo yeni, naambo elyi nshaa shilashesua na valya kishisumanyi ifura nawo, shimuvikye nsia yeni moose sheelyi ifura lyakwa yeny llyo na lyany yeni. 4Mashika kunu ukiveny lwakwa na ngatareny ta nrima wakwa mmbo shilemureiya na misoru miingyi, nshi naambo mukooye isua-fo, kyaindi naambo mukoye imanya ikunda elyo lyakwa kwany shaasa lying'ani.

Ifwaayana

5Kyaindi kwakooya nndu anyarika nshi ashinyarisa yeny da-fo lyo kyenga (naambo shilasherovya nndu) mmbo amunyarisa neeni moose. 6Mmbo kyeema nndu wa ngata yeyo nawoni ngapo yeyo aniingwa nnyewo vengyi; 7na kilasha kya efyo, kyeni munsarye neembiirya muu, naambo nndu sheeto nalashemirwa ni unyaario lwiirye kyeeso. 8Nkyo mmbo shamutereva mumoore ikunda lyany. 9Mashika nkyo kimaruma shilereiya naambo nkooye imanya kwany kwakooya muleva veindya kya findo fyoose. 10Kwakooya mwafwaaya nndu kya kindo kyoose neeny mmbo mmufwayaa, mashika naakwa ni yeny kwakooya shafwaaya nndu kindo kyoose, mmbo shamfwaaya kimaruma kyany mbee ya Kristo. 11Loleny, mmbishwa nalasheluvinga, mashika lwiishi ngata takwe.

Nyinyira ya Paulo muriny wa Troa

12Naasa lwikifika Troa kimaruma kya Nrumi ya Nsia ya Kristo, sharuywa mwaango kyeendwa ni Nndumi, 13nriminy shilasenywa mashika nshilelollya mwana-ma Tito-fo, nkyo shavasama sheenda Makedonia.

Uvingyi lwa Kristo

14Llyo Iruva naarafuma akee iluniinga ifura wo kyeeri lukee na Kristo neekaarisa nrungo eto wemmanya we ando koose kunu ishoreny lyeru. 15Mashika yese mmbo lukee kifwaamu kya Kristo mbee ya Iruva, na kwa yewo vakeekirwa, na kwa yewo vakeereka; 16kwa yewo vakeereka ni kyuuna kya ufu, lyo kwa valya vakekirwa nkifwaamu kishendee muu. A-ni vi yeto amaaye kya findo efyo? 17Mashika yese llukee sha yewo vengyi vakekapya irero lya Iruva mbusha-fo kyaindi mmbo lukee vaa pyai miriminy sha vana vaukye kwa Iruva, niindo lwaamba lukee na Kristo.

Currently Selected:

2 VAKORINTO 2: MAS2

Highlight

Copy