2 MBONY TA FYEERI 6
6
Solomon Arera na Vandu
(1 Vam 8:12-21)
1Naasa mangyi Solomon katereva, “Nndumi Iruva, mmbo kulesauwa kundo kutiri mafishi na ireema. 2Ulaalu shakutannya mmba yafo shisha ando afo kusha kweeka llung'anu.” 3Vandu va Israeli woose ni alya veselelyi. Mangyi kavaindukya kavalola katereva Iruva navavikye mbora. 4Kaamba, “Iruva narumishwa, Iruva wa Israeli! Mashika amminutya marero alya evia nde-yakwa Davidi, kaamba, 5ukya llya shoota vandu vakwa Misri, kufikee inu, nshindesauwe muri kunu urukeny lwa Israeli ando kweetana mmba ando shishiindywa-fo; nta nshilesauwe nndu moose wa itetera vandu vakwa Israeli-fo. 6Indi ulaalu shansauwa muri wa Yerusalemu usheva muri ando shishiindywaa, na yewe Davidi shakusauwa kusheshillya vandu vakwaa Israeli.” 7Naasa Solomon keengera kaamba, “Nnde wakwa Davidi, enkusara itannya Nndumi Iruva mmba ya mwiindye ando kweiindya Nndumi Iruva, Iruva wa Israeli; 8Indi Nndumi Iruva, kammbia, ‘Kwetana nisha kya ikusaro lya ishitannya mmba ya mwiindye, 9indi lyo nkukaa yewe kushitannyi mmba-fo. Ni mwana wafo, mwana wafo kumuni mmbwe yeto asheshitannya mmba yakwa.’ 10Na ulaalu Nndumi Iruva amminutya kyaasa kyakwe, anshivika mangyi ya vandu va Israeli ando a nde wakwa, shantana mmba kwa irina lya Nndumi Iruva wa Israeli. 11Na yefo mmba yeyo shavika-fo isanduku lilya lyitiri kyaasa kilya Iruva evikyana na vana va Israeli.”
Kiterewo kya Solomon
(1 Vam 8:22-53)
12Naasa mbee ya vandu Solomon keenda kasalala mbee ya kitara kya irasya kaorwa maako na uwe katereva. 13(Solomo ensongosya kitara kya arera ando kweefirya-ndi kavika kulya mbee nnang'ani kavii, waasha na ivari fitiri mita ivii na robo yeenda uwe yetiri mita imwi na robo kandevika ando wo nndu ashiidimaa iulallya, kafiirya-ndi kaorwa maako akwe iruveeu) 14Katereva, “Woi Nndumi Iruva wa Israeli, nkwiifo Iruva ungyi sha yewe-fo, kunu urukeny na yefo iruveeu Yewe mmbo kukee Iruva wa dede, kwaindya kyaasa kulevikyana na vandu vafo Israeli kwavaora ikundalyafo kwa varundi vafo woose yewo vatiri wiindi neekwiindya na nrima moose. 15Mmbo kwainutya kyaasa kilya kwevikyana na nde wakwa Davidi, na wo kindo kwaamba mmbo kyamma yiinukya. 16Kwekyo ulaalu, Woi Nndumi Iruva, Iruva wa Israeli, mmbo shakutereva naambo kukooye yiinutya kyaasa kilya kwevikya ishinga lyafo Davidi nde-wakwa, kwiimmbyaa mikonu myoose kitima kya umangyi kya Israeli mmbo kishekaywa ni ngyeeri yafo kwakooya vashendaa na ilatya usumanu lwa mavavaso akwa shaasa yewe kulelatya. 17Ulaalu, woi Nndumi Iruva, Iruva wa Israeli; shakutereva kuinutye filya fyoose kulekooya ivikyana kyaasa na ishinga lyafo Davidi.
18“Indi woi Iruva ni dede yewe kushekaa kunu urukeny na vandu? Nakwaa ni yelyi ngina ting'ani nnu, na kwasanda-fo, na tilya ta uwe mmwasi ntikumaa-fo, ni indaany kusheang'anya kunu mbeny-yei shilekutannya? 19Nakwaa ni indo, woi Nndumi Iruva, Iruva wakwa, yeny ishinga lyafo, shakutereva kusharannyi na yirikya kiterewo yekyo shikekutereva inu. 20Ringa mmba yei nsanyiny na kio, ando kulesauwa vandu vafo vashekuutya-u nnduma wa irina lyafo. Kushaaranyi yeny ishinga lyafo, yelyi shishaa yaa ivika kiterewo. 21Kwaaranyi fiterewo fyakwa yeny ishinga lyafo, na fya vandu vafo Israeli kyeeri vasheshaaa itereva vealutye fisangu ando yaa. Kwaaranyi fiterewo kuriikee yefo iruveeu kuvelufwaaya.
22“Kyeeri nndu asakya na nndu ungyi, nawe kyeendwa na kunu mmba yafo nasheambaa paa mbee ya kitara kyeerasya, lwakutereva kumwaranye. 23Kuuka yefo kwafo iruveeu kuvautye uvingo mashinga yoo afo. Yeto mwaandu ushewuya nawe nakapwa kiinani na marekyo yoo akwe na yeto alatiri mwaandu nndu nalekeyo na ikunndywa mbora kya ngaa yakwe shisha. 24Kyeeri vandu vafo Israeli vashekapwaa ni vakiduva vawo, kimaruma kya ngyulyamari tawo, vakammiirikya na ikurya mbee yafo, ulyamari yelo valekutannya, vakasha mbee yafo, kwi irina lyafo vekunyiisye vakashekutereva usari kunu mmba yei, 25naasa kuirikye kuuka yefo iruveeu kuvasarye ngyulyamari tawo, na ivaviirra kulya urukeny kuvaniingye wo na vasaawoye vawo.
26“Mmbwa ikalema ikapa kimaruma kya ngyulyamari tawo valyamarye, vakakutereva veyaalutye fisangu ando vesendaa irina lyafo na ikurya ngyulyamari tawo lwakutereva 27kuvaarannyi kuuka yefo iruveeu kuvasarye ngyulyamari tawo mashinga afo, vandu vafo Israeli; na ivalosha ilatya shia isongovikye, kushekapa-fo mmbwa kunu urukeny lwafo yelu kuniingye vandu vafo luve masaa awo.
28“Kwakooya kwiifo shaa urukeny au ndwari, mwi wa mansuma, ndwari ta shoonga mareminy nrie au nseto, au kwakooya vandu vafo vanringitwa mmbakiduva ando koose yefo urukeny lwawo, ao kwakooya kwiifo ngapo shive ao ndwari shive, 29Woi lwakutereva kwaarannyi fiterewo fyoose yefyo vashekutereva fyuuka kwa vandu vafo Israeli; wo nndu ngata aveishi kima kya nriminy wakwe ekutereva eshorwaa maako akwe kunu mmba yei. 30Naasa mmbe kyuuka na kwafo iruveeu kusarye vandu vafo woose, wo nndu ngata kikwaani nawe, mashika nyewe kwiishi makusaro na mirima ya vandu woose. 31Llyo vashekwiindyaa, na ilatya usumanu lwa shia tafo kyeeri kyoose vakee kunu urukeny yelu kuniingye vasaoe vawo.
32“Kushekaa nashe nndu mwiny, alakee umwi va vandu vafo Israeli, ooka urukeny lwa kwaasha, kimaruma kya finya na wiidimi lwafo kutiri, ishetereva kunu mmba yei, 33shakutereva kumwaarannyi kwiikee yefo kwafo iruveeu, kwiirikye mwiny yeto eefyo akutereva naambo vandu va ulaniny koose vamanyi irina lyafo yewe na ikwiindya ngata ya vandu vafo Israeli, naambo vamanyi sheelyi mmba yei shiitannyi nnyando kwaiindywa yewe. 34Vandu vafo vakeenda fireny indekapana na vakiduva vawo, yefo koose kushevarumaa nawo vakashekutereva veyaalutye kisangu na kunu muriny yeu, kuleusauw na mmba yei shileitana kimaruma kya irina lyafo, 35shakutereva kwarannye fiterewo na fyeereero fyawo kuvaekye na ivaidimisya kwikee yefo iruveeu.
36“Kwakooya vakutannya ulyamari, mashika kuleefo nndu alatanaa ulyamari; kunyafukwa na ivareeya vakapwa ni vakiduva vawo kutani vakurikwa mifungwa urukeny lwa kwaasha ao kufii; 37nawo vekee yefo usamirony vakakurya yefo makusarony na miriminy yaawo vakatereva ifwaaywa kya ulyamari lwawo, veshambaa, ‘Luletana ulyamari; lukareka shia lukatana makasha; 38na kwakooya vakurya kya nrima, na makusaro awo moose kyeeri vakee yefo usamirony, nawo vakakutereva veyaalutye fisangu na kunu urukeny yelo kuniingye vasawoye vawo, muri yeu kulesauwa na mmba yei shileitana kimaruma kya irina lyafo, 39naasa mmbe shakutereva kwaarannyi fiterewo fyawo kwiike yefo iruveeu kuvaniingye yefyo fyikwaani nawo, kusarye vandu vafo yewo valekulyamarya.’
40“Ulaalu woi Iruva wakwa, lulole kwashewarya fiterewo lusheterevaa ando yaa. 41Ulaalu kwiipoo woi Nndumi Iruva,
kwaange ando kwafo kweimuya
Yewe amwi na isanduku lya
kyaasa lya finya tafo.
Vakohani vafo woi Nndumi
Iruva vakooye vafure
kya isarya lyafo
42Woi Nndumi Iruva,
kulakape mungo nkisuku wafo
Kummbwa ililya lyafo kwa
ishinga lyafo Davidi.”
Currently Selected:
2 MBONY TA FYEERI 6: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
