2 MBONY TA FYEERI 5
5
1Naasa, Solomon kamaa mashora mose alya akwaani na mmba ya Nndumi Iruva. Nalyo Solomon kasangirya masaa moose alya emmbikwa wakfu ni Davidi we ndeye ekee ni: fesa, saabu na findo fiingyi; kandefisuruma ando amwi na masaa a mmba ya Iruva.
Isanduku lya kyaasa lyaendewa mmba ya Iruva
(1 Vam 8:1-9)
2Naasa mangyi Solomon kakwaanyisya kulya Yerusalemu vamiku na vasongoru va ngyufyari ta Israeli naambo vandeonndwa isanduku lya kyaasa lya Nndumi Iruva lyuuka kulya Sioni muriny wa Davidi. 3Llyo vekwaanannya woose kyeny kwa mangyi kwikee nkonu wa sikukuu mwiiri wa mfungare. 4Vamiku va Israeli woose vekifika, Valevi vakakurika isanduku lya kyaasa 5vakandelyivika kulya mmba ya Iruva. Vakohani na Valevi vakakurika yeema lya Nndumi Iruva na findo fingyi fyoose vakandefivika kulya mmba ya Iruva. 6Mangyi Solomon na vandu va Israeli woose vakandekwanannya alya Isanduku lya Kyaasa lyekai vakautya-u Nndumi Iruva kiraso kya mburu na ng'umbe tilavaa yeekyena, shiingyi nnu. 7Naasa vakohani vakakurika isanduku lilya lya kyaasa lya Nndumi Iruva fika kulya mmba ya Iruva, vakandelyivika alya ando Kweele nnu. Kwasi ya mafwanu alya atiri maaru. 8Maaru a mafwanu alya akasikkya Isanduku ando amwi na milo ilya ya ikurika. 9Mmbo nndu moose ashiidimaa ilollya milo ilya ekee alya usumanu na alya andu Kweele mashika a waasha lwa-vayo. (Milo yeyo mmbo yiiyo fika inu). 10Yefo Isandukuny yelyo lya kyaasa nkweifo kindo kingyi kuuta mapoo alya a mawe avii Mose evika-fo alya Ifumbuu lya Sinai, llya Nndumi Iruva evikyana kyaasa na vandu va Israeli; kyeeri kilya vekee yuuka Misri.
Itumbe lya Nndumi
11Na Vakohani vekikwipoo alya ando Kweele woose (Mashika vekwiilisa na isasanga amwi kuleefo amina ungyi). 12Valevi veembi veiyo woose ni Asafu, Hemani, na Yeduthuni, amwi na Valevi vengyi va ngyufyari tawo veree soori tikee shifumi nisha nnu, verie matowasi, finanda na sese vakasalala taari ya ngama ya alya ando kweerasya. Vakohani iyana lyimwi na makumi avii veeke andu amwi na vekapa mbembe. 13Veembi yewo vakaikannywa ni ngyunyanga shisha ta veekapa mbembe, matowasi na fiyya fiingyi fya irumisha Nndumi Iruva fimwiimbya, “Mashika we ni mfoo na isarya lyakwe ni lya llung'anu.” 14Kyeeri yekyo kyoose mmba ya Nndumi Iruva ikaishurwa ituu lya mumuyo wa Nndumi Iruva lyimika mikaa, kutani vakohani valemwa itereva.
Currently Selected:
2 MBONY TA FYEERI 5: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
