2 MBONY TA FYEERI 7
7
Ivauwa Mmba ya Mwiindye
(1 Vam 8:62-66)
1Solomon ekimaa kiterewo kyakwe, muro ukaoloka wuuka iruveeu ukamamita firaso filya fyoose fyenningywa, na mmba ikaishurwa itumbe lya Nndumi Iruva. 2Kimmba itumbe lya Nndumi Iruva lyeshura yefo mmba ya Nndumi Iruva Vakohani mbeidima yaanga-fo-fo 3Vaisraeli vekilollya muro wishooloka wuuka iruveeu, na itumbe lya Nndumi Iruva, kulya mmba, mmbo vewa-si kifulifuli kutani fisangu fyapaana sumbai, veshiinndya na irumisha Nndumi Iruva
Kya ilillya lyakwe
na ikunda lyilatiri umando.
4Naasa mangyi Solomon na vandu woose vakautya Nndumi Iruva nsimbika. 5Nawe Solomon kautya Nndumi Iruva ng'umbe fiku makumi avii na ivii, na moonri fiku iyana na makumi avii. Ni indo Solomon na vandu vakwe woose vevauwa mmba ya Iruva. 6Vakohani vakasalala kyaanya ando kudesye kwawo kwesalala, nawo Valevi vakasalala vetiri findo fya Nndumi Iruva fyeiimba, filya fyensongosywa ni mangyi Davidi fya kiraso kya nndumi Iruva. Vakamwiimbya, “Kimaruma kya ikunda lyakwe lyilatiri umando,” ni indo mangyi Davidi emmbavia. Vakohani vakakapa mbembe na Vaisraeli woose vakava Vaselelyi. 7Naasa mangyi Solomo kavauwa mmba ya Nndumi Iruva nnang'ani ya kiria kilya kyikee mbee ya mmba ya Nndumi Iruva, mashika yoondo nng'u kweyuutya firaso kyemamitwa na mafura a urilalyi mashika kitara kilya kyeerasya kya arera kilennya na firaso fikaingifwa. 8Nawe Solomon kavika sukukuu ando a mikonu mfungare we na kilula kya vandu woose va Israeli wooka taari ya Hamati kundefika mura wa Misri. 9Nkonu wa nyanya, vakakuumbya lyingyi vakavika nndumwa wa kyaanya, tikisia mikonu ilya mfungare ingyi vakailyisa kitara kya irasya, na mikonu mfungare ya sukukuu. 10Nkonu yeto walatya kwikee nkonu wa makumi avii na kararu wa mwiiri wa mfungare Solomon kasama vandu vaende kwawo vetiri nsia na ifura miriminy yaawo, kimaruma kya simbo yei Nndumi Iruva eniinga Davidi, Solomon na vandu vakwe Israeli.
Iruva akoora Solomon lyingyi
(1 Vam 9:1-9)
11Naasa mangyi Solomon kamaa itana Mmba ya Iruva shaasa enkudeesya amwi na mmba ya umangyi na filya fingyi fyoose ekunndye itana yefo mmba ya Nndumi Iruva. 12Na yelyi kio Nndumi Iruva kansheya kammbia, “Shammita kiterewo kyafo na yeny shawarya mmba yei ive ando kweeshuutya firaso fyany. 13Kwakooya shamwiima mmbwa, ao shamweengye nrie tishelya fimu fyany, ao ndwari shikasha. 14Kwakooya vandu yewo vakwa vakunyiisa, vatereve na ishiruuya vashera-fo mikaaye yawo mikasha, llyo yeny shishevaarannyaa kuuka iruveeu, shivafwaaye ulyamari lwawo, na uruka lwawo. 15Ulaalu mmbo shiringaa mmba yei, na yaarannya fiterewo fyany. 16Mashika shammbauwa mmba yei naambo vandu vainndye-u irina lyakwa llung'anu. Mmbo shiiringaa na ikunda kyeeri kyoose. 17Kwakooya kwashirunndya na ishiindya sha ndeye wafo Davidi, kwirundaa na ilatya filya fyoose shilekuvavasya, na ilatya ushilyi lwakwa, 18llyo nshevangisa kiri kyafo kya ushilyi shaasa shevikyana kyaasa na nde-wafo Davidi shammbia, ‘Kwafo nkwushekaa kuturike-fo nndu wa ishillya Israeli-fo. 19Indi mukalema ilatya ushilyi na mavavaso akwa shilemuniinga, mukeenda ilatya maruva engyi na yiaiindya, 20mmbo shishemurwaa muuke kunu urukeny yelu shilemunniinga. Naakwa ni mmba yei shileivauwa na irina lyakwa, mmbo shisheifwallya kwaasha na yeny shisheyaallwa kindo kiipale na yiilwa nnang'ani a vandu va masanga moose.’
21“Na kya mmba yeyo ikerumisha irina lyakwa, wo nndu ashiira-u, mmbo ashaaukwaa, na ivesa, ‘A nkikyi Nndumi Iruva atane indo kya uruka yelu, na kya mmba yei?’ 22Llyo vandu vasherouwa vaambe, ‘Ni kimaruma kya elyi valeepala Nndumi Iruva, Iruva wa vasawoye vawo yeto alewauta urukeny lwa Misri, vakaiindya na irunndya maruva engyi. Nkyo kimaruma Nndumi Iruva kaveengye ngapo yei.’”
Currently Selected:
2 MBONY TA FYEERI 7: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
