2 MBONY TA FYEERI 4
4
Fiyya fya Itana Mmba ya Mwiindye
(1 Vam 7:23-51)
1Mangyi Solomon kasongosya kitara kya irasya kya Arera, kitiri waasha luinani taari shoose mita kyeenda kwa kyeenda; na uka sumbai enda na uwe mita yiinya na kyenga. 2Numa ya vayo kasongosya yoondi lya mura lyikuringyitye, lyitiri mita yiinya na kyenga uka mbai na mbai; yeenda sumbai mita ivii na robo na kiringyityo kya vayo mita ikumi na isaru na kyenga. 3Taari ya sumbai kweeringyitya yoondi ilyo mbo kwekee kushope na misafwa ivii ya shau, nsafwa umwi uwe ya yeto ungyi mishopye ya yoondi yelyo yoose mmbo yesongosywa ando amwi. 4Nalyo yoondi yelyo mmbo lyekee yeekyerye uwe ya mafwanu a shau a Arera ikumi na avii, mafwanu araru akalla taari ya ndoo, araru taari ya nkwaany, araru engyi akalla na taari ya sinde na yoo engyi taari ya ngama. 5Nkukufa wa vayo wetiri sentimita mfungare na kyenga, ndumba ya vayo ikavaka ndumba ya ileseri ikoosoye na kipoo ivakye kivaro. Yoondi yelyo lyeshiidimaa itira mura lita fiku makumi arindaru. 6Na lyingyi kasongosya-se mideeva ikumi a isangya findo filya fya yuutya firaso fya imamitwa. Nnang'ani ya fideeva yefyo firaanu kativika taari ya sinde, na firaanu taari ya ndoo. Yoondi yelyo lyekee ni lya Vakohani lya ikusangya. 7Kasongosya firembo ikumi fya saabu ando kusheekerywa taa, veelatyaa uramba vakevaniinge, na mesa ikumi, vakashetivika kulya kirieny kiniini kya Ekalu, firaanu vakafivika taari ya sinde na firaanu taari ya ndoo. 8Kasongosya mesa ikumi kashetivika yefo kisafu kya Ekalu. Kasongosya mabesi iyana a saabu. 9Kasongosya ndala ya nnang'ani ya makohani na ndala ingyi shiniini ya kipoo, myaango ya vayo yekee ya arera, 10na yoondi lilya kalyivika taari ya sinde ifiitani na ndumba ya mmba. 11Huramu nawe kasongosya nungu, mabeleshi na mideeva. Naasa Huramu kamarisa mashora mangyi Solomon yoo akwaani nawe a mmba ya Iruva. 12ngo ivii, fideeva, ngyureto ivii uwe ya ngo, na waafu ivii ta soori ta isikya fideeva filya fya ureto fikee uwe ya ngo tilya, 13na mafwanu a makomamanga mayana aana a waafu tilya ivii, misafwa ivii ta makomamanga a ishopa mabakuri alya akeemaekyerye uwe ya ngo tilya tikeshisikye na ngyureto. 14Mmbweda esongosya mideeva uwe ya mitika, 15na yoondi lilya lyimwi, na mafwanu alya a shau ikumi na ivii kwasi ya yoondi yelyo. 16Naasa nungu mabeleshi, na uma na findo fingyi fyoose fya mmba ya Nndumi Iruva, yefyo Huramuabi alesongosya mangyi Solomon, mmbo fyekee fya arera shisangye ikavarama nisha. 17Findo yefyo fyoose, mmbo mangyi esongosya kulya imungony lya Yordan kyenga kya uteri yelo lwa ndala lwekee nnang'ani ya Sukoti na Sereda. 18Arera yeyo shoose, yesongosya findo yefi nkwiifo yeekyena lya vayo-fo mashika Solomon mmbo esongosya findo fiingyi nnu. 19Solomon mmbo esongosya findo fyoose yefyo fyekee yefo mmba ya Iruva, Kitara kya saabu kyeerasya, mesa ya mikate ya ivika usanguny lwa Iruva. 20Ando kwa yeekyera taa ta saabu shisangye taimikya alya ando Kweele ngata kikwaani. 21Fivaro, taa amwi na mwaaro fyoose mmbo fyesongosyo na saabu shisha-nnu. 22Mikasi na mideeva, fisaani fya ubani na fideeva fya ikurika muro, fyoose ni fya saabu shisangye. Rashi ta mmba na myaango ya alya ando Kweele na myaango ingyi myoose ya kulya kisafu mmbo yekee misongosye na saabu.
Currently Selected:
2 MBONY TA FYEERI 4: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
