2 MBONY TA FYEERI 35
35
Yosia aindya Pasaka
(2 Vam 23:21-23)
1Mangyi Yosia kainndya Pasaka kulya Yerusalemu kyaiinndya Nndumi Iruva. Kwikee nkonu wa ikumi na kaana, mwiiri wa mbee kashisha moonri a sukukuu. 2Kasauwa vakohani va irunda mashora yoo akwaani nawo kulya mmba ya Iruva ya iterevya, kavavika nrima vakooye irunda nisha. 3Keengera kavya Valevi valya velosha vana va Israeli, veerunda yefo mmba ya Nndumi Iruva: kavavya, “Vikeny Isanduku yelyi yeele kulya mmba ya iterevya, ilya mangyi Solomoni mwana wa Davidi. Mmukyikurikaa-se lyingyi mushendaa kunu na kunu-fo; mmbo musherunndya Nndumi Iruva, Iruva waany, na vandu vakwe Israeli. 4Wo nndu narunde yekyo kikwaani nawe yefo mmba ya iterevya kwi-ngyufyari tany shaasa mweloshwa ni mangyi Davidi na mwana wakwe mangyi Solomoni. 5Wo umwi nasalale ando akwe naambo mukooye yeekkyana yefo mmbeny ta vandu va Israeli. 6Mmbo mushishaa ngurana ya suva ya Pasaka. Naasa mukuiilyise na ikudeesya iniingya firaso, naambo vana va maye vany Israeli, vaidimi ilatya nisha shaasa Mose eloshwa ni nndumi Iruva.” 7Kyeeri kya Pasaka, mangyi Yosia mmbo eniingya ngurana ta suva fiku makumi araru na ngoleta fiku firaru. 8Naakwa ni Vasongoru vakwe nawo mmbo vaakana nawe vakaniingya kimaruma kya vandu, vakohani na Valevi. Na vasongoru vaniini va mmba ya iterevya, Hilkia, nkohani nniini, Sakaria na Yehieli vakaniingyya ngurana ta suva fiku fivii na mayana arindaru na ngoleta mayana araru fikee ni firaso kyeeri kya sukukuu ya Pasaka. 9Vasongoru va Valevi, Konania, Shemaia, na vana va maye, Netanaeli, Hashabia, Yeieli na Yosabad vakaniingya ngurana ta suva fiku firaanu, na ngoleta mayana araanu kwa Valevi fikee ni firaso fya Pasaka. 10Kyeeri findo yefyi fyoose fya Pasaka fyemaa ivikwa urambeny, vakohani na Valevi, wo nndu mmbo esalallya ishora lyakwe shaasa mangyi emeyaamba. 11Ngurana tilya tikimaa ishishwa na yuutwa shonyi, vakohani mmbo vefwallya samu ilya uwe ya kitara kyerasya. 12Naasa vakaavya vandu kwi mmba firaso filya fyeekora na muro naambo vakooye iniingya shaasa Mose evalosha. 13Vakohani vakandekora firaso fya Pasaka uwe ya muro shaasa vakee vavavasye, na kiraso kilya kyekwiilyisa vakandekora rukony na birika, nunguny naakwaa ni fikaango, na yaavya vandu swan-swany. 14Vekimaa itana indo, Valevi vakeende nyama tawo veni ta Vakohani va mmba ya Aron, kimaruma kya mashora awo iva meengyi fika kio, vekoraa nyama na mafura alya a firaso. 15Neeva vasorya ni veembi va Valevi va ufyari lwa asafu mmbo vekee mashoreny ukya kyeeri kya uramba lwa mangyi Davidi: Asafu, Hemani, na Yeduthun velollya va mangyi. Valya vekeeringa mwaango wa mmba ya iterevya mmbetiri kimaruma kyetiyya-u mashora awo-fo, mashika kweifo Valevi vengyi vemma ideesya Pasaka yaawo. 16Ndesa mangyi Yosia emmaamba findo fyoose fyetanyilla nkonu ulya, kya yiindya nkonu wa Nndumi Iruva wa Nkonu nniini wa sukukuu ya Pasaka we niingya firaso fyeekora uwe ya kitara kyerasya. 17Ando a mikonu mfungare, vandu va Israeli woose vekee alya mmbo veendya sukukuu ya Pasaka ya Nkate ulatiri Ntarango. 18Ukya kyeeri kya nkisuku Samueli, nkuleve-fo Pasaka yainndywa king'ani indo-fo, nta nkulevefo mangyi ungyi aindya indo sha mangyi Yosia-fo. Vakohani, Valevi, na vandu woose va Yuda, Israeli na Yerusalemu, 19na kyeeri kyoose kya myaaka ikumi na nyanya ya ushilyi lwa Yosia.
Umando lwa ushilyi lwa Yosia
(2 Vam 23:28-30)
20Mangyi Yosia ekimaa itana findo yefyi fyoose fikwaani na mmba ya Iterevya, mangyi Neko wa Misri, kaanta fira, ikapana na Karshemish kulya mureny wa Eufrate. Nawe Yosia kasalala kyuumi. 21Indi Neko, kurumya Yosia nrumi, kammbia, “Fira yei shiifo shikapana, nshi yafo yewe, mangyi ya Yuda-fo. Nshalesha ikapana na yewe-fo; indi ni ikapana na vakidu va vakwa; na Iruva anshivya shiitike. Iruva ni kyaalu kyakwa akai, kweekyo kulashiirikise-fo, ao Iruva nakumamite.” 22Indi Yosia mmbo emmaikudeesya ikapana. Kalema yaarannya kilya ekee vywa ni Iruva kwa shia ya Neko. Kweekyo kakwalasha nalashemanyika keenda fireny kulya kasa ka Megiddo. 23Vekee fireny mangyi Yosia kakapwa mife ni nndu wa Misri. Kavya varundi vakwe, “Shuuteny kunu; shammbaviswa kikasha!” 24Varundi vakwe vakamuuta yefo ikariny lyakwe lya frasi vakammbika ikariny lyingyi lyekee alya, vakankurika fika Yerusalemu. Kafiiya kulya kanderikwa fifuny fya kimangyi Vandu woose va Yuda na Yerusalemu vakarovywa kya ufu lwakwe. 25Nkisuku Yeremia kareiya kiimbo kya ifuuya Mangyi Yosia. Kyiimbo yekyo kyikava miishivye Israeli koose. Veembi, va kyika na kyuumi wo kyeeri mmbo veemba kyiimbo yekyo kyeenkummbwa-we. Kyiimbo yekyo kyikee kyireiye yefo fiimbony fya kyiiyo. 26Wo kindo Yosia atannyi mbee ya Nndumi Iruva, yiindya mavavaso, 27na mbony ta mashora akwe, kupookya mapookyon kundefika masiiyony mmbo tikee shireiye yefo, Mbony ta Vamangyi va Israeli na Yuda.
Currently Selected:
2 MBONY TA FYEERI 35: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
