2 MBONY TA FYEERI 34
34
Mangyi Yosia wa Yuda
(2 Vam 22:1-2)
1Yosia etiri myaaka nyanya kyeeri eva mangyi kashillya Yerusalemu ando a myaaka makumi aranu na umwi. 2Mashora akwe akasennya Nndumi Iruva, mitannyi yakwe ikawaka ilya ya saawoye mangyi Davidi, kainndya mavavaso a Nndumi Iruva moose.
Yosia awundwa mwiinndye ta vandu va masanga
3Kwikee mwaaka wa kaana wa ushilyi lwa Yosia, ekee indo mwana n-ndu, kapooka yiinndya Iruva wa saawoye mangyi Davidi. Yosia myaaka yiina mmwasi, kapooka iwunndwa-wunndwa kulya koose kwekee kutani kundo kweyiinndya mafwanu Ashera na maruva a wongo. 4Kwa usongoru lwakwe, vandu vakwe vakafishafisha fitara fyoose alya Baali eshinndywaa, kundo kweekorya na ifumbira ubani uwe ya fitara yefyo fyeerasya fyoose fikafishwa-fishwa, na mafwanu a Ashera, na engyi eepashwa kaasisa akava kilulyi, nakyo kandekifwallya uwe ya fifu fya vandu valya veniingya firaso yefyo. 5Kakora mafwanu a vakohani valya va maruva a wongo, uwe ya fitara filya fyawo fyeerasya. Ekimaa itana indo, Yuda na Yerusalemu ikailyiswa kwa wiiya. 6Niindo etana kulya miriny ya Manase, Efraimu, Simeoni fika Naftali. 7Minyanuny koose kwa umangyi lwa taari ya ndoo, kandefishafisha-fo mafwanu a Ashera moose na fitara fyeerasya fyoose fikapaparwa fyengafyenga fikava sha kiluulyi, naasa kawuya Yerusalemu.
Kyitabu kya mavavaso kyakooywa
(2 Vam 22:3-20)
8Kwikee mwaaka wa ikumi na nyanya wa ushilyi lwakwe, kyeeri ammaayiilyisa uruka na mmba ya miindye, kwevika ishingo kya valya veiinndya maruva a wongo, lyony mangyi Yosia eruma vandu vararu vandetokopa mmba ya Nndumi Iruva; Shafan mwana wa Asalia na Maaseia nsongoru wa Yerusalemu, na Yoa mwana wa Yohasi mwiireiya mbony. 9Fesa tilya tensangirywa ni vasongoru Valevi ta mmba ya Iruva mmbo teniingywa Hilikia nkohani nniini (Mmbo tesangirywa tuuka kwa vandu va Efraimu, na Manase, na tingyi mmbo tooka na umangyi lwa taari ya ndoo na vandu va Yerusalemu, Yuda na Benyaminy). 10Fesa yeti mmbo teniingywa vandu vararu vasongoru vesalallya itokopa mmba ya mwiinndye, 11nawo vakaniingya vandu vepasha mbau, na veefisha mawe, tive ni fesa teendoora mawe na mbau teendetokopa mmba tilya vamangyi va Yuda vesalallya tikawunduka. 12Vandu verunda mashora yaa, mmbo vekee vandu vasumanu kya dede deny. Mmbo vesalallywa ni Valevi vaana; Yehati na Obadia wa ufyari lwa Merari, na Sekaria na Meshullamu wa ufyari lwa Kohati, na (Valevi yeva woose mmbo vekee veembi vasomyi). 13Valevi maata vakarambikywa mashora a isangirya na yiinga maryo, na isalallya vandu valya woose vekee kulya mashoreny a wo ngata na vengyi veereiya mashora ekerundwa na vengyi veeringa yefo mashoreny. 14Kyeeri fesa tekeeyutwa yefo mmba kundo tesurummyo, Hilkia kakooya kyitabu kya mavavaso a Nndumi Iruva, mavavaso alya Iruva eniingya Mose. 15Kavia Shafan, “Shankooya kyitabu kya mavavaso ya mmba ya iterevya.” Kaniingya shafan kyitabu kilya. 16Na Shafan keepo karwaaya mangyi kaamba, “Lwamma wo knndo kulluvya lutani. 17Lwammipoo fesa tilya tekee shisurumi kulya mmba ya iterevya, lwamma iniingya varundi vatokopa mmba na vasongoru vawo.” 18Naasa keengera kaamba, “Yaa shitiri kyitabu shaniingywa ni Hilha.” Naasa kasomya mangyi na unyanga uniini 19Llya mangyi eeta kyitabu kilya kisomwaa, karanndwa soori takwe. 20Llyo evya Hilkia, Ahikamu mwana wa Shafan, Abdon mwana wa Mika, Shafan mwiireiya na Asaya nndundi wa mangyi kaamba, 21Endeny mukandevesa mbony kwa Nndumi Iruva ando akwa, na vandu yeva vaseeye kunu Israeli na Yuda, mumanyi mbony tikee kunu kyitabuny yekyi tiriye iluvya inda. Ni Nndumi Iruva arooywa ni ngoo kimaruma kya vasaawoye veru ilema yiinndya irero lya Nndumi Iruva vakalema itana yekyo kyitabu yekyi kyaambaye ni kuti kitanwa. 22Kwa ishingo lya mangyi. Hilka na vandu vengyi, vakeenda ivesa nka nkisuku avaangwa Hulda akee kufii na Yerusalemu, (Mmi wakwe ni Shallumu, mwana wa Tikfa na nshuku wa Harhas, ekee mwilola soori ta mmba ya Iterevya). Vakammbia shaasa mbony tiletanyika, 23nawe kawavya vawuye kwa mangyi vandemmbya Nndumi Iruva mmbo aamba, 24“Mmbo shikendekapa Yerusalemu na vandu vakwe woose amwi na kidengo shaasa kikee kyireiye kulya kyitabuny kilya kilesomywa mangyi. 25Vakashimina na yiindya maruva engyi a wongo, vakaniingya-fo kiraso na ifumbira ubani. Sharooywa ni ngoo, kwa mitannyi yaawo mikasha. Sharooywa ni ngoo kimaruma kya Yerusalemu kuleefo musiisiika. 26Indi yekyo kyikwaani na mangyi ya Yuda, mbieny nndumi Iruva, Iruva wa Israeli aamba, Yewe kulaarannya kilya kyekee kyireiye kulya kyitabuny, 27neewe kwakurya na ikunyiisa, kwafiira na iranndwa soori tafo, kyeeri kweeta mbony yeti ta ngapo ya Yerusalemu na vandu vawo; Shamiita kiterewo kyafo. 28Kweekyo nshisheende-se ngapo yeyo Yerusalemu kyeeri kya mu wafo-fo, mmbo kuvaa na urilalyi kutani kwafwa.” Vandu vakeengye mangyi Yosia mbony yei.
Yosia avika kyaasa yiindya Nndumi Iruva
(2 Vam 23:1-20)
29Mangyi Yosia kavaanga vasongoru woose va Yuda na Yerusalemu. 30Vakaanga amwi mmba ya iterevya variani na vakohani, na Valevi na vandu vengyi woose masimba na valakee masimba mbee ya vandu woose mangyi kasoma na unyanga uniini kyitabu kya Kyaasa kilya kyekooywa kulya mmba ya iterevya. 31Naasa kasalala ando kwa Umangyi, kavika kyaasa kyayiinndya Nndumi Iruva, yiindya ishingo na mavavaso na ngoo na nrima wakwe moose ilatya na itana shaasa fikee fireiye kulya kyitabuny kya kyaasa. 32Kaallwa vandu va Benyaminy na valya veiyo va Yerusalemu vairikye itira kyaasa yekyo. Naasa vandu va Yerusalemu vakairikyana yiinndya Kyaasa yekyo kya Iruva kyevikwa ni vasaawoye vawo. 33Mangyi Yosia kalyamara mafwanu alya moose ekee kulya minyanuny ya vandu va Israeli, na kyeeri kyoose kya muu wakwe, mmbo vandu va Israeli verunndya Nndumi Iruva, Iruva wa vasaawoye vawo.
Currently Selected:
2 MBONY TA FYEERI 34: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
