2 MBONY TA FYEERI 36

Mangyi Yoahas wa Yuda

(2 Vam 23:30-35)

1Vandu va Yuda mmbo vesauwa mwana wa Yosia vakamwaamba mafura kava mangyi ya Yerusalemu. 2Yoahas mmbo etiri myaaka makumi avii na iraru kyeeri eva mangyi ya Yuda, nawe kashillya Yerusalemu ando a miiri iraru. 3Mangyi Neko wa Misri kantira mifungwa, kutani Yuda yaniingya ratili fiku mfungare na mayana araanu ta arera na ratili makumi mfungare na isaanu ta saabu kive ni kindo kyemmbauwa. 4Neko kaallwa Eliakimu nave mangyi ya Yuda ando a Yoahas, na irina lyakwe kamwaalasha kammbanga Yehoyakimu. Yoahas karawa Misra ni Neko.

Mangyi Yehoyakimu wa Yuda

(2 Vam 23:36–24:7)

5Yehoyakimu mmbo etiri myaaka makumi avii na iraanu kyeeri eva mangyi ya Yuda. Kashillya Yerusalemu ando a myaaka ikumi na umwi. Kalyamarya Nndumi Iruva, Iruva wakwe. 6Mangyi Nebukadinesar wa Babilony, kanlamya finya, kamfinga na mise naambo ankamare mfungwa andemfita kulya Babilony. 7Nebukadinesa kakamara kyenga kya masaa a mmba ya Iterevya, kandeavika kulya mmba yakwe ya kimangyi kulya Babilony. 8Mashora moose yoo Yehoyakini atannyi, na findo fingyi fyoose fikasha atannyi, mmbo fikee fireiye yefo kyitabuny kya Vamangyi va Israeli na Yuda. Yehoyakini mwana wakwe kava mangyi ando akwe.

Mangyi Yehoyakini wa Yuda

(2 Vam 24:8-17)

9Yehoyakini mmbo etiri myaaka ikumi na nyanya kyeeri eva mangyi ya Yuda, kashillya kulya Yerusalemu ando a myaaka iraru na mikonu ikumi. Nawe katana makasha usanguny lwa Nndumi Iruva. 10Ando a mwaaka umwi, mangyi Nebukadinesar karuma vandu vakandeondwa Yehoyakini amwi na masaa moose alya a mmba ya Iterevya. Naasa Nebukadinesar kaallwa Sedekia nave mangyi ya Yuda na Yerusalemu ando a mwanamaye Yehoyakini.

Mangyi Sedekia wa Yuda

(2 Vam 24:18-20; Yer 52:1-3a)

11Sedekia mmbo etiri myaaka makumi avii na umwi, kyeeri eva mangyi ya Yuda, kashillya ando a myaaka ikumi na umwi. 12Katana makasha usanguny lwa nndumi Iruva; kava mbafu mbee ya nkisuku Yeremia, yeto mwiyaamba Irero lya Nndumi Iruva.

Iwunduka lya Yerusalemu

(2 Vam 25:1-21; Yer 52:3b-11)

13Sedekia nawe kamina mangyi Nebukadinesar ulya emmbikya ishingo kalyiisyamboo na irina lya Iruva, sheelyi nnyakaa natatale-se Iruva-fo. Kalema ikurya, na iwuiya Nndumi Iruva, Iruva wa Israeli. 14Naakwa ni vasongoru va Yuda, vakohani na vandu woose, vakalatya ngaa shikasha ya vandu va masanga vakaindya maruva a wongo, na itefusa mmba ya iterevya ilya Nndumi Iruva muni ennyivika sheele. 15Nndumi Iruva, Iruva wa vakuu vawo keengera-se ivarummya varumi ivaikimba naambo vakurye, kimaruma kya ivalyillya wo na mmba ilya ya iterevya. 16Indi valakunde yaarannya, vakaengera itatala na imina varundi va Iruva, vakamina marero a Iruva, na iseka varumi vakwe kutani Nndumi Iruva arooywa ni ngoo kya vandu yeva kulave-fo nta umwi aidima iturunnya. 17Kweekyo Nndumi Iruva keende mangyi ya Babilony ivakapa. Vakawaawa vandu veengyi va Yuda vakasandwa-fo na valya vekee yefo mmba ya iterevya. Vandu va ngata shoose, vandu vakuu ao vakoo, vomi ao vaka, valwee ao valalwee Nndumi Iruva kavarammbikya woose vakakombwa kombi. 18Mangyi kandekurika findo fyoose filya fyekee kulya mmba ya iterevya na masaa engyi moose a mangyi amwi na a vasongoru vengyi vakafikamara fika Babilony. 19Kakora mmba shoose ilya ya iterevya amwi na muri. Kawunndwa isimamba lya Yerusalemu, kakora mmba shoose ta kimangyi amwi na masaa avayo moose. 20Valya woose veturunya, kawakamara mifungwa fika Babilony, vakandeva-fo mashinga akwe, na vammba yakwe kutani kyeeri kya Umangyi lwa Persia lwapooka. 21Nakyo kilya Nndumi Iruva emmamba na kana kya nkisuku Yeremia kyikainukya, “Uruka lushevaa sama, kuleefo iremwa ando a myaaka makumi mfungare, kyiinani na kyeeri kya mikonu ilya ya Sabato kulare yeiinndywa.”

Koreshi Eetika Vayuda Vawuye Kyeny

(Esr 1:1-4)

22Mmbo kwekee mwaaka wa mbee, wa ushilyi lwa Koreshi mangyi ya Persia na kilya Nndumi Iruva, emmamba na kana kya nkisuku Yeremia kyikava dede. Nndumi Iruva kaata makusaro a mangyi Koreshi nawe makusaro yoo kaata kwa vandu vakwe woose yefo, ushilyiny lwakwe na barrwa tireiywa na isomwa kundo koose yefo umangyi lwakwe. 23“Yelyi ni ishingo lya Koreshi mangyi ya Persia. Nndumi Iruva, Iruva wa Iruveeu, mmbwe aleshisauwa mangyi ya ulana loose, kashiniinga na mashora a irundya mmba yakwe ya interevya ya Yerusalemu kunu urukeny lwa Yuda. Ulaalu yeni moose mukee vandu va Iruva, kwipoony mukeenda na nndumi Iruva, Iruva waany namusongoye.”

Currently Selected:

2 MBONY TA FYEERI 36: MAS2

Highlight

Copy

Compare