2 MBONY TA FYEERI 33
33
Mangyi Manase wa Yuda
(2 Vam 21:1-9)
1Manase mmbo eva mangyi ya Yuda etiri myaaka ikumi na ivii, kashillya Yerusalemu ando a myaaka makumi araanu na iraanu. 2Katana makasha usanguny lwa Nndumi Iruva, kalatya myeengye mikasha ya vandu va masanga valya Nndumi Iruva evarishisa kyeeri kilya vandu vakwe va Israeli vekeesha urukeny lulya. 3Katana-se kundo kwerasya maruva a wongo, alya Esekia we ndeye emma yaafishafisha. Katana kitara ando kwerasya Baali, kasongosya mafwanu a marua Ashera, na yiindya nyinyiri. 4Katana fitara fyeerasya vandu va nndeny kulya mmba ya Iruva, kundo Nndumi Iruva emmaamba, ni ando kwemwiindya we llung'anu. 5Katana-fo fitara fyeerasya yefo mmba ya Iruva, ando kuvii kuve ni ando kweyiindya nyinyiri. 6Karasa vana vakwe vave kiraso kyemamitwa kulya imungon lya Hinnom. Ekapa ubau, na ivesa mbony kwa varumu na vasavi, eree irisi. Katana makasha meengyi usanguny lwa Nndumi Iruva, Iruva karooywa ni ngoo mmwasi. 7Kavika ifwanu yefo mmba ya iterevya, ando iruva emmivya Davidi na mwana wakwe Solomoni, “Yaandi Yerusalemu, kunu mmba ya iterevya, ando yaa shansauwa nnang'ani ya ngyufyari ikumi na ivii ta mmba ya Israeli, ng'u ando shisheindywaa. 8Na kwakooya vandu va Israeli vaindya na itira Mavavaso akwa moose valenniingywa ni ishinga lyakwa Mose, naasa nshilekeiyaa vaantwa kunu urukeny yelu shileniinga vasaawoye vawo-fo.” 9Manase kasonngwa iteere vandu va Yuda itana fya makasha kailanya filya fya vandu valya Nndumi Iruva emmbarishisa-fo yelyo mbee.
Manase akurya.
10Lla na yelyi Nndumi Iruva evavasa Manase, na vandu, mmbekunda imwaarannya-fo. 11Kweekyo Nndumi Iruva karuma vasikari na vasongoru va fira va mangyi ya Ashuru. Vakatira Manase vakambika mise ya arera ya maako, vakankamara vakandemfita Babilony. 12Kyeeri ekee yefo ukiveny yelo kakurya katereva nndumi Iruva, Iruva wakwe, kakunyiisa nnu mbee ya Iruva wa vasaawoye vakwe. 13Kamooshora, nawe Iruva kairikya kiterewo kyakwe, kammbiira umangyiny lwakwe Yerusalemu. Llyo Manase emanya sheelyi Nndumi Iruva, mmbwe Iruva. 14Numa ya mbony yeti, Manase katana isimamba lyingyi taari ya poo ya muri wa Davidi imungony kufii na usoka lwa Gihoni ufiitani na mwaango nniini wa Makunga; ando kutiri muri uvangwaa Ofeli. Katana isimamba yaasha deny kulella uwe. Kavika-fo vesalallya matorito a fira kundo esurummyi fisha fyakwe fya fira kulya miriny myoose ya Yuda, 15Koota-fo maruva a wongo, na mafwanu alya ekee kulya mmba ya iterevya, na fitara fyeerasya filya emmbika uwe alya mmba ya iterevya yekeeshitanyi, na kundo kungyi kulya Yerusalemu kawunndwa findo yefi fyoose kandefyeera kwaasha ya muri. 16Kandetokopa kitara kyeerasya ando alya nndumi Iruva eshiindywaa. Kandeutya-u Nndumi Iruva kiraso kyaurilalyi kyemwaana na vandu va Yuda woose vakaindya nndumi Iruva, Iruva wa Israeli. 17Vandu vakaengera iniingya firaso, alya ando kwa yutya miindye, indi firaso yefyi ni kwa Nndumi Iruva, Iruva waawo-nsi.
Umando lwa ushilyi lwa Manase
(2 Vam 21:17-18)
18Mashora engyi Manase atannyi, na kiterewo kyakwe kwa Iruva wakwe, na marero alererwa ni vakisuku kwa irina lya Nndumi Iruva, Iruva wa Israeli, moose mmbo akee mareiye yefo mbony ta Vamangyi va Isaeli. 19Kiterewo kya mangyi, na ngata Iruva alemwarannya, ngyulyamari takwe toose atannyi naitura wiindi kwa Iruva, na kundo endetana kweiinndya Ashera na mafwanu a maruva a wongo kulare enkunyiisa kwa Iruva, mmbo akee mareiye yefo mbony ta Vakisuku. 20Manase kafwa karikwa yefo mmba ya umangyi, na mwana wakwe Amon kawa mangyi ando akwe.
Mangyi Amon wa Yuda
(2 Vam 21:19-26)
21Amon etiri myaaka makumi avii na ivii kyeeri eva mangyi ya Yuda; kashillya kulya Yerusalemu ando a myaaka ivii. 22Mashora akwe mmbo evaka alya a ndeye Manase, kalyamarya Nndumi Iruva na yiinndya maruva a wongo, alya ndeye eshiinndya. 23We nnyeva mwikunyiisa mbee ya Nndumi Iruva sha Manase-fo, kaengera itana makasha kailannya ndeye. 24Numa, varundi vakwe vakalya kyama, vakammbwaiya kulya mmba yakwe ya umangyi. 25Indi vandu va Yuda, vakawaa vandu valya woose velya kyama kyewaa Amon; naasa vakaallwa mwana wakwe Yosia kava mangyi.
Currently Selected:
2 MBONY TA FYEERI 33: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
