2 MBONY TA FYEERI 32
32
Vaashuru vaerese Yerusalemu
(2 Vam 18:13-37; 19:14-19, 35-37; Yes 36:1-22; 37:8-38)
1Numa ya mashora yaa mesha moose aletana mangyi Esekia, mangyi Senakeribu wa Ashuru kakwipoo nakape Yuda. Mmbo esha kavika turuve kulya koose kutiri finya evikye nsia sheelyi ashiidimaa itira mifungwa. 2Mangyi Esekia ekilollya sheelyi mangyi Senakeribu mmbo akundye ikapa Yerusalemu, 3mmbo erummbwa shila, we na vaitori vakwe vaniini va fira woose indefisha ngyusoka na mira yekee poo ya miri nawo vakairikyana nawe. 4Vakakusangyirya amwi vandu veengyi vakandefisha ngyusoka na fimura fyoose kulave-fo mura ushekooywa yefo urukeny yelo. 5Mangyi kaengera isimamba lya kavii karingitya muri moose na uwe ya vayo katana-u nnara na taari ya kipoo kaengera isimamba lyingi karingitya riti; kavambisa kwa wiiya lyikatira finya taari ilya ivaangwa Milo kulya muriny wa Davidi. Kaengera deny isongosya mafumu na ngao. 6Kaumbya vandu va muri woose kavavika kwasi ya vaitori vailola va fira yoo uvasheny mwaango wa muri, kavavia, 7“Mulaereye nta mulasave kya mangyi ya Vaashuru na matorito akwe a fira-fo, nkwiifo kindo ashiidimaa ilutannya-fo mashika yese mmbo lutiri finya mmwasi lukamwiilannya. 8We ni finya ya vandu atiri, indi yese, mmbo lutiri finya ya Nndumi Iruva, Iruva weeru mmbwe ashelweekya, na ilukapannya fira yeeru, mmbwe lummbikye nsia.” Marero ya a mangyi Esekia, mmbo eniinga vandu finya shiniini nnu. 9Numa ya vayo, Senakeribu mangyi ya Ashuru ameringitya muri wa Lakishi we na matorito akwe moose, karuma varundi vakwe Yerusalemu kwa Esekia mangyi ya Yuda, na kwa vandu woose vakee kulya Yerusalemu, eshambaa, 10“Senakeribu mangyi ya Ashuru mmbo akee yaamba indi: Nkyoki mukusirye kutani mwakaa Yerusalemu, kundo muri wamma iringitywa? 11Nshimmbo, Esekia akemulemba mushefiiya yaandi ni shaa ao nyura, emuvyaa, ‘Nndumi Iruva, Iruva waany ashemuturunyaa maakony a mangyi ya Ashuru?’ 12Nshi Eesekia yeu alelyamara ando kwakwe kweyiindya na fitara fyakwe eyitikyaa vandu woose va Yuda na Yerusalemu evavyaa, ‘Mmushindyaa kitara kyerasya kimwi na uwe ya vayo mushekorya firaso fyany?’ 13A mmbo muleeshi alya moose yeny na vasaawoye vakwa luletannya vandu woose va masanga engyi? A shaasa maruva yoo a masanga a ngyuruka yeto veedima iturunya ngyuruka yeto maakony akwa? 14Ni iruva ungau nnang'ani ya maruva yoo a masanga yoo aleidima iturunnya vandu vakwe wooka maakony akwa llyony neeni mwiidimi ivika-u nsia sheelyi Iruva yeto waany ashemuturunyaa maakony akwa? 15Mulalembwa ni Esekia nta mulasheyiirikya mbony yeto. Mulasheyiirikya nndu yeu-fo, mashika, nnyalensha-fo iruvva wa masanga ao mangyi shoose kavinga iturunya vandu vakwe wooka maakony a mangyi ya Ashuru-fo nkyo Iruva yeu waany nnyashiidimaa-fo.” 16Varundi va mangyi ya Ashuru vakarera marero meengyi makasha a itatala Nndumi Iruva, na Esekia nndundi wakwe. 17Mangyi muni kareiya Nndumi Iruva, kamwaarara Iruva wa Israeli eshaamba, “Ndesa maruva a masanga engyi alelemwa iturunya vandu vawo uka maakony akwa, naakwa ni Iruva wa Esekia nnyashiidima iturunya vandu vakwe-fo.” 18Vasongoru yewo vakavarya kwa unyanga uniini Kiebrania, kyevaniinga usau na weeresi vandu va Yerusalemu valya veselelyi uwe ya isimamba lya muri naambo kive kyaangu kwawo itira muri. 19Vakarera kya Iruva wa Yerusalemu ngata ilya varera nayo maruva a vandu va masanga, mafwanu akee masongosye na maako a vandu. 20Mangyi Esekia na nkisuku Isaya mwana wa Amosi vakatereva Iruva na imfuuya naambo avaniinge weekyi. 21Nawe Nndumi Iruva karuma nsu mweele kawaa vasikari na vasongoru va fira va Ashuru woose. Naasa mangyi ya Ashuru kawuya kyeny kwakwe na usutu uniini. Nawe ekee yefo mmba ya iruva wakwe, nnang;ani ya vana vakwe vakashemmbwaiya alya kweni na usu kafwa. 22Niindo Nndumi Iruva, eturunya mangyi Esekia na vandu va Yerusalemu na vakiduva vakwe woose, kavaniinga nduma nsha, na urilalyi nnang'ani ya amurasa na vandu woose. 23Vandu veengyi vakasha Yerusalemu yeengye Nndumi Iruva firaso, amwi na yeengye Esekia mangyi ya Yuda findo fiingyi fya pya fya wuuru uniini. Kupookya yoondo, vandu va masanga engyi moose, vakamwiitikisa nnu.
Ikutuula lya Esekia na Ndwari Yakwe
(2 Vam 20:1-3, 12-19; Yes 38:1-3; 39:1-8)
24Kyeeri yekyo Esekia mmbo elwaa, kufii nafwe. Esekia katereva Nndumi Iruva, nawe Iruva kairikya kiterewo kyakwe kamoora kiringisyo. 25Indi Esekia nalakikunde yuutya Nndumi Iruva kiraso kya yefyo fyoose alentannya mashika nrima wakwe weeshwe ikwiishika. Kindo yekyi kikeengye waataro vandu va Yuda na Yerusalemu. 26Mafurumyony, Esekia na vandu vakwe va Yerusalemu, kakunyiisa, nawe Nndumi Iruva kavafwaaya kutani Esekia afwa.
Umasi na usuri lwa Esekia,
27Mangyi Esekia kava isimba nnu, kainndywa ni vandu woose. Katira mmba shiingi ta isuruma-fo saabu, arera, mawe a wuuru uniini na findo fingyi fya umasi lwakwe; ngawo na findo fyoose fya yefo kwakwe fing'ani 28Na kyammwasi etiri mmba kundo kwevika shoonga ta vandu, fyeelya na fyeena amwi na shoonga ta findo fyakwe fya mmba. 29Iruva kamweengerya miri ingyi mmwasi kundo kwevika-ng'umbe na moonri, na masaa yoo meengyi Iruva enniingye. 30Ni mangyi Esekia, mmbwe yeto eraya usoka lwa Gihoni, kasuma mfongo, kutani waparikya taari ya kavii ya isimamba lya Yerusalemu. Esekia kavikywa mbora wo kindo eketana. 31Naakwaa ni kyeeri kilya vateteri vaniini va Babilony vekeerumwa kulya kwakwe indevesa kya findo finiini fyekee yutika kulya kwake, Iruva mmbo enreeya nalole kindo akusarye yefo nriminy mbwakwe.
Umando lwa ushilyi lwa Esekia
(2 Vam 20:20-21)
32Mashora engyi a mangyi Heseki na usha lwakwe, akee mareiye yefo masukukyony a nkisuku Isaya mwana wa Amosi, yefo Kyitabuny kya Vamangyi va Yuda na Israeli. 33Esekia kafwa karikwa kwa uwe ya fifu fya Vamangyi. Vandu woose va Yuda na Yerusalemu vakanniinga wiindi uniini nnu. Mwana wakwe Manase kava mangyi ando akwe.
Currently Selected:
2 MBONY TA FYEERI 32: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
