2 MBONY TA FYEERI 31
31
Esekia atokopa mba ya mwiindye
1Mikonu ya sukuku ikimaaisya, vandu woose va Israeli mmbo vekwaana miriny ya Yuda myoose, vakafisha-fisha ngo ta mawe shoose na imamanya mafwanu a Ashera moose, iruva lya kyika, na isammbwa fitara fya irasya na yiindya maruva engyi. Ni indo vetana kulya Yuda, Benyaminy, Efraimu na Manase, kutani vamaa ilyamara fyoose. Numa ya vayo vakawuya wo nndu kyeny kwakwe. 2Mangyi Esekia kashesaleesa lyingyi Vakohani na Valevi kwi matorito, wo umwi waawo kanninga ishora lya ngata yakwe, ifurukannya yefo mmba ya Nndumi Iruva. Amwi na yuuta firaso fyemamita, fya urilalyi yaana na irumisha yefo mmba ya Iruva. 3Kuuka findony fyakwe fya mmba fya ivikya, kaniingya firaso fyekora na muro ngama na nkwaany, na filya fyeeniingywa nkonu wa Sabato kyeeri kya sukukuu ya isangya ukombe lwa mwiiri shaasa kikwaani na mavavaso a Nndumi Iruva. 4Kya mmwasi mangyi kavia vandu va Yerusalemu, vamweengye firaso fyoose fikwaani na vakohani na Valevi naambo vaidimi ikuuta nisha ngata mavavaso a Nndumi Iruva aambaye. 5Ishingo yelyo lyikimaa yiitiwa, vandu va Israeli mmbo veniingya fimu fya mareminy fyeena na fyeelya, wukyi na mafura, na fimu fingyi fya wo ngata fyuuka mareminy awo. Vakaniingya firaso fiingyi fya wo kindo valeilula. 6Vandu woose valya vekee miriny ya Yuda vakaenngye Nndumi Iruva firaso fyawo fya moonri na ng'umbe na findo fya wo ngata, na findo fingyi vakandefivika wakfu mbee ya Nndumi Iruva. 7Vakapooka imweengye findo fya pya kwikee mwiiri wa kararu, vakamarisya isangirya na yuumbya ando a miiri yiina. 8Mangyi Esekia we na vasongoru vakwe, ekilollya shaasa vandu vesangirya findo fiingyi, karumisha Nndumi Iruva na vandu vakwe Israeli. 9Mangyi kareryana na Vakohani na Valevi kya findo filya filesangirywa. 10Nawe Asaria nkohani nniini wa mmba ya Sadoki karera nawe, kammbia, “Ukya llya vandu valepooka yeende fimu mmba ya Nndumi Iruva mmbo lutiri shoonga yeelya ilumaaye, neengyi ya nkuka. Ni Nndumi Iruva alevikya vandu vakwe mbora kutani lwawonisa firaso yefi fyoose.” 11Mangyi Esekia kaamba. Songosieny mmba kundo kwesangirya findo yefi yaa kufii na mmba ya Iruva. 12Vakandevika-fo findo filya fyoose fya firaso fyeniingywa, vakavika-fo Konania, Nlevi, nave mwiilola nsongoru, na Shimei mwanawo kavikwa mweeki wakwe. 13Valevi ikumi vakavikwa vave veeki vawo; Yehieli, Asasia, Nahati, Asaheli, Yerimoti, Yosabad, Elieli, Ismashia, Mahati na Benaiah. Ni mangyi Esekia esauwa vandu yeva we na Asaria nkohani nniini. 14Kore mwana wa Imna Nlevi mmbwe eviwa-fo nniini wa isalallya Mwaango nniini wa taari ya ngama wa mmba ya Iruva; mmbwe ekee mwiisangirya na mwaava fimu fyoose fyekee yeendwa yefo mmba ya Nndumi Iruva. 15Miri ingyi myoose kundo kwetiri vakohani mmbo ekeyeekywa ni Valevi vengyi vasaari nnu. Edeni, Miniamin, Yeshua, Shemaiah, Amaria na Shekamaiah. Yeva mmbo veavya valevi shoonga vanavamaye vawo shaasa kikwaani. 16Kuleefo ufyari lwakwe, woose mmbo veniingwa, vomi vatiri myaaka makumi araru enda na uwe valya vetiri mashora a kuti kulya mmba ya Iruva wo nndu kasimbwa shaasa ang'ani. 17Vakohani mmbo veniingwa mashora awo kwi ngyufyari, na Valevi valya vatiri myaaka makumi avii enda na uwe vakaniingwa makamba kwi makamba. 18Mmbo vereiywa woose, andoamwi na vana vawo vadu, na vaka vawo, na vefu vawo, kimaruma kya mashora awo mmbo vekundikye vapooke ikudeesya ikwiilyisa kyeeri kyoose. 19Nnang'ani ya Vakohani va mmba ya Aron valya vetiri marema kulya miriny yaawo, mmbo kweifo vandu vekee vasauwe veevaavya wo nndu kyaawu kyakwe kya irema shoonga tawo. Wo nndu nndumi wa mmba ya Vakohani, na valya woose vekee vareiye va mmba ya Valevi mmbo veniingwa. 20Ni indo mangyi Esekia erunda mashora mesha, a usumanu mbee ya usangu lwa Nndumi Iruva, Iruva wakwe urukeny loose lwa Yuda. 21Wo ishora alerunda kyeeri kya urundi lwakwe yefo mmba ya Iruva, na mitannyi ingyi myoose ikwaani na mavavaso a Iruva, mmbo alerunda na nrima wakwe moose, nawe kaidima iainutya kimmpwa
Currently Selected:
2 MBONY TA FYEERI 31: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
