2 MBONY TA FYEERI 26
26
Mangyi Usia wa Yuda
(2 Vam 14:21-22; 15:1-7)
1Naasa vandu woose va Yuda vakashevika Usia nave mangyi ando a ndeye Amasia etiri myaaka ikumi na irindaru. 2Mmbwe etana muri wa Elati wiiya, numa ya ufu lwa ndeye. 3Usia mmbo eva mangyi etiri myaaka ikumi na irindaru, kashillya Yerusalemu ando a myaaka makumi araanu na ivii. Maaye ni Yekolia wa Yerusalemu. 4Katana mashora mesha mbee ya Nndumi Iruva kavaka ndeye. 5Karundya Nndumi Iruva na usaari kimaruma kyeelyi ekunda yaarannya Sakaria a dundi ulya wa Iruva, nawe Nndumi Iruva kammbikya mbora. 6Usia kakwiipo kandekapa Vafilisti. Kawundwa mmba ta miri ya Kati, Yabne na Ashdodi na kulya vafiitani nawo. 7Iruva kamwiidimisya ikapa Vafilisti, Vaarabu va kulya Kuobaali na Vameuni. 8Vaamoni vakandesangyirya usanu vakandetaa kwa Usia na wiidimi lwakwe lukamanyika koose fika Misri. 9Lyingyi Usia, kandetana minara karingitya myaango mbai na mbai na ulya wa imunngony kya ivambisa muri wa Yerusalemu. 10Nakwaa ni kulya kasa koomu, kandetanafo minara ingyi, kasuma firori fya mura na maruva meengyi, mashika ekee nndu nremi, atiri vandu va mashora a nrema na veiisa findo. 11Mmbo etiri itorito lya fira. Nalyo mmbo lyekee yaavye matorito matorito, na yeekyena lya vayo nndu etiri ni Yeieli na Maasea na nsongoru waawo ekee ni Hanania umwi wa ngari ta mangyi. 12Yewo vasongoru veshillya fira vekee vandu fiku fivii na mayana arindaru. 13Kwasi ya ushilyi na usongoru lwawo, mmbo kweifo vasikari vatakuru vekapa fira vandu fiku mayana araru na mfungare na mayana araanu. 14Usia kavavia wo nndu, ifumu, kofia ya minya, ngao, ikoti iniini ura, na mife amwi na mawe maniini na minara iringitye muri moose. 15Kulya Yerusalemu kukavafo vafuru vakansongosya findo fya yaasa yeerya mawe maniini ooka minareny na ndumba ta masimamba a miri. Katira wiidimi lukakwaana kundo koose, na kya mmwasi finya yakwe ikeengereka yuuka kwa Nndumi Iruva.
Umbafu lwa Usia lwamweengye ngapo
16Kyeeri Usia eva na wiidimi na finya shiniini mmbo ekusaamisa kava na kiila nakyo kyikamweengye uvingo. Mmbo epoo ubani kandeanga mmba ya Nndumi Iruva naambo nandefumbira alya kitareny kyeerasya. 17Kyeendi nkohani Aseria amwi na vakohani vengyi vakaari makumi nyanya vakalatya mangyi vakammbia, “Nkutiri mumu-fo.” 18Vakammbia, “Usia! Nkutiri muumu wa ifumbira ubani kwa Nndumi Iruva-fo. Mmbakohani-nsi yewo vaparikye kwa ufyari lwa Aron. Uka yaa ando kweele. Kwanlyamarya Nndumi Iruva, nta nkukitiri mbora yakwe-fo.” 19Kyeeri Usia ni yefo mmba ya Iruva eselelyi kufi na kitara kyeerasya, etiri bakuri yeefumbira ubani. Kakunyafwa kya vakohani, na kyeeri yekyo kyeni, kisangu kyakwe kyikawoywa ni nsaka alya mbee ya vakohani valya. 20Asaria nkohani nniini, na vakohani valya vengyi vakalola kisangu kya mangyi vakaaukwadeny, uviny vakansomuta poo ya mmba ya Iruva. Nawe muni kaangusya isomuka na poo, mashika Nndumi Iruva muni emma inkapa. 21Kyeeri kya muu wakwe moose mangyi Usia, katirwa ni nsaka kutani afwa. Nyekiidima yaanga lyingyi mmba ya Iruva-fo, kakaa kulya mmba yakwe muni. Kara-fo mashora moose, na Yotamu mwana wakwe kashillya uruka. 22Nkisuku Isaya mwana wa Amosi mmbo ereiya mashora yoo mangyi Usia atannyi kyeeri kya muu wakwe. 23Usia ekifwa mmbo erikwa kyaambeny kya vamangyi, lyo nnyerikwa kifuny kya vamangyi mashika etirwa nsaka. Mwana wakwe Yotam mmbwe eva mangyi ando akwe.
Currently Selected:
2 MBONY TA FYEERI 26: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
