2 MBONY TA FYEERI 25
25
Amasia Mangyi ya Yuda
(2 Vam 14:2-6)
1Amasia mmbo eva mangyi etiri myaaka makumi avii na iraanu kashillya Yerusalemu ando a myaaka makumi avii na kyeenda. Maaye ni Yehoadani wa Yerusalemu. 2Etana mesha fikasennya Nndumi Iruva llyo mmbo etana sha nndu ekeitikywa. 3Ekitira finya umangyiny lwakwe, kandewaa vandu valya woose vewaa ndeye, 4Lyo nnyewaa vana va vandu yewo-fo, kalatya shaasa Nndumi Iruva evavasa Mose: Kyeyaamba, Vandeye mmbashewaawa kimaruma kya vana-fo, nta vana mmbashewaawo kimaruma kya vandeye-fo; wo nndu mmbo ashewaawa kimaruma kya ulyamari lwakwe muni.
Edomu yakapwa Fira
(2 Vam 14:7)
5Mangyi Amasia mmbo esangyirya womi woose ufyari lwa Yuda na Benyaminy kandevavika matorito matorito a fira. Wo itorito kavika-fo mwiisalallya, wa mafiku na wa mayana. Yeva mmbo vekee vandu va myaaka makumi avii enda na uwe vamaaye vandu fiku mayana araru va fira, veeshi itira mafumu na ngao. 6Kya mmwasi, kandeengerya vengyi fiku iyana lyimwi wooka Israeli kwa wuuru lwa arera kilogramu fiku firaru na mayana aana. 7Indi nkisuku kakwiipo kalatya mangyi kammbia, “Kuleepo vasikari yeva va KiIsraeli fo. Mashika Nndumi Iruva, nnyakee nisha na vandu yeva va Umangyi lwa taari ya ndoo fo. 8Yewe mmbo kukusarye vashekuniinga finya mmwasi kuvinge fira, ate Iruva mmbwe atiri wiidimi lwa ikuniinga iviinga ao ivingwa, nawe mmbo ashelekyeyaa vakiduva vafo vashekuvinga.” 9Amasia kavesa nkisuku, “Ashaasa fesa tilya takwa shammainiingya-fo mmbo kyivaa inda?” Nkisuku kammbia, “Nndumi Iruva ashiidimaa ikuviirya tingyi mmwasi ya yeto!” 10Kweekyo Amasia kaviira vasikari valya, kavavia vakuwuye kyeny. Yaa mmbo vewuya kyeny vesuuye na ikunnyafwa nnu kya vandu va Yuda. 11Amasia kasalala kyuumi kasongoya itorito lyakwe kandefika imungony lya Shumbi. Vakakapana alya, vakawaawa vasikari va Edomu fiku ikumi, 12na vengyi fikumi vakatirwa mifungwa. Vakandevasaamisa fika kidoorony kya iwe iniini kulya muriny wa Sela vakandeveera waangeny vakafika vakafwa. 13Kyeeri yekyo kyeni, vasikari va KiIsraeli valya Amasia elema valeende nawe fireny vakandekapa miri ya Yuda kupookya Samaria kundefika Beti-horoni, vakawaawa vandu fiku firaru na mifingwa miingyi ikatirwa. 14Amasia ekiwuya ooka fireny, ankapa Veedomu, mmbo esha-fo eerye maruva a wongo kasheainndya neafumbirya ubani. 15Nndumi Iruva kasua nnu kya mbony yei, kweekyo karuma nkisuku kwa Amasia, “Nkisuku kakunda imanya kimaruma nkyokyi kutani kwasheinndya maruva engyi alashiidimaa yeekya nta vandu vawo veni wooka yefo maakony afo?” 16Ni ukya i-ndii, “Lulekwaallwa yewe kwava nngari wa mangyi? Sanda kana, ao shaniingya muumu kuwaawa!” Nkisuku kamalallya, lyo kulare ammalallya, “Ulaalu shammanya sheelyi mmbo Iruva arummbwa kyafo ikumamita, mashika ni yewe kwatana yefyi fyoose na kya mmwasi kwashimina.”
Israeli yakapwa
(2 Vam 14:8-20)
17Naasa mangyi Amasia wa Yuda we na vangari vakwe kavika shila kya ikapa Israeli. Karuma nrumi kwa Yehoashi mwana wa Yehoahasi kammbia, “Osho lukapane.” 18Indi Yehoahasi karummya nrumi kammbia, “Nkonu umwi mwiinga werummya nrumi kwa mweresi wa Lebanoni, ‘Shininga mwana yeu wafo wa kyen nawe nka wa mwana wakwa!’ Indi ifisi lya ngoroshony lyimwi lyikeerau lyikavarya mwiinga ulya. 19Ulaalu yewe Amasia mmbo kukeyaamba, ‘Shammbwa Vaedomu! Na nrima ukakuniinga kwakushela. Naasa, kaa yefo kwafo ukyiva llweekyi kukeruuya lushekweengye urumato yewe kumuni amwi na vandu vafo?” 20Amasia kalema yaarannya. Mashika yekyo mmbo kyekee urambeny lwa Iruva, Amasia nakapwa, kimaruma kyaiindya maruva a wongo a Veedomu. 21Kweekyo mangyi Yehoash wa Israeli keepo fira ikapana na mangyi Amasia wa Yuda. 22Vandu va Yuda vakakapwa ni Vaisraeli na itorito lyawo vakarisha na kyeny kwawo. 23Yehoashi mangyi ya Israeli kashetira mifungwa Amasia mangyi ya Yuda, mwana wa Yoashi, mwana wa Ahasia wa kulya Beti-shemeshi kandemfita Yerusalemu. Kulya kandewunndwa myaango ya isimamba wa muri, kapookya ando kutiri waasha lwa mita mayana avii. 24Keepo masaa meengyi; saabu, arera na findo fingyi fyoose fya mmba ya Iruva, fisalallyo ni Obed-edomu, na filya fyoose fya mmba ya ushilyi, amwi na mifungwa naasa vakawuya Samaria. 25Amasia mangyi ya Yuda mmbo ekaa myaaka ikumi na iraanu ukya ufu lwa Yehoashi mwana wa Yehoahasi mangyi ya Israeli. 26Mashora engyi moose a Amasia, uka mapookyony kundefikya masiiyony mbo akee mareiye kyitabuny kya mbony ta vamangyi va Yuda na Israeli. 27Kyama kyewaa Amasia mmbo kyevikywa kulya Yerusalemu ukya llya emina Nndumi Iruva; kweekyo kandekusuruma muriny wa Lakishi. Yekyo nkyemaafo, vakiduva vakwe vakaruma vandu Lakishi, vakandemmbwaiyafo. 28Nnying'a wakwe ukeendwa Yerusalemu, uwe ya frasi ukasherikwa fifuny fya kimangyi, kulya muriny wa Davidi.
Currently Selected:
2 MBONY TA FYEERI 25: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
