2 MBONY TA FYEERI 19
19
Nkisuku Yehu ekyimba Yehoshafati
1Mangyi Yehoshafati wa Yuda ewuya kimmpwa kulya mmba yakwe ya ushilyi Yerusalemu. 2Na mwilollya Yehu mwana wa Hanani, keenda kandaambya mangyi, kammbia, “A mmbo kwiishi ni kindo nisha yeekya valyamari na ikunda valya vasuuye Nndumi Iruva? Findo yefi kuletana fyankweengye nsindara nnang'ani yafo na Nndumi Iruva. 3Indi lyo kwiifo usha lumwi nnang'ani yafo. Kulemaa ikurwafo mafwanu moose alya Ashera, na iruva wa kyika, na ivinnya iruuya Iruva na nrima wafo moose.”
Yehoshafati aalashika
4Mangyi Yehoshafati mmbo ekaa Yerusalemu, indilyo wo kyeeri mmbo eshendaa isaiya vandu va Beersheba ya sinde, kufike mafumbuu a Efraimu taari ya ndoo. Mmbo etana indo, naambo noomwe vandu vaidimi iwuyya Nndumi Iruva, Iruva vasaawoye vawo. 5Mmbo esauwa valeti miriny myoose ya Yuda ilya yeetiri turuve. 6Kavavia, “Loleny nnu elyi mufikyaa mwirummbwa mbony, mashika mirumbuye yeyo mmukeyuuta na ishingo lya kivandufo, nna ishingo lyishuuka kwa Nndumi Iruva, nawe mmbo akee amwi na yeni, elyi mwiifo murummbwa mbony. 7Naasany, kupookya ulaalu, ereyeny Nndumi Iruva, mukwiise na wo kindo mushekooya itana, mashika Nndumi Iruva weeru nnyashesalallya mwiireta usumanu, kya ikunndya vandu na iwarya findo fya ireta usumanu-fo.” 8Muriny Yerusalemu, Yehoshafati mbo esauwa valeti maata, valeti na vasongoru va mmba ta Vaisraeli, naambo vave vandu va ileta myaandu ikwaani na mbony ta ifisha mavavaso a Nndumi Iruva, ao myaandu nnang'ani ya vandu va muriny. 9Kavavikya ishingo kaamba, “Rundeny yefyo fikwaani na yeni mwishereyaa Nndumi Iruva mumwiindyaa na nrima moose. 10Wo kyeeri vana va maye vany wooka muriny na ukava ungau vakamweengye mwaandu na ukava wa ngata ki kwakooya ni uwai, ao ifisha ishingo, ao wiikimbi, ao mavavaso, vaniingeny makusaro mesha valasheilyamarya Nndumi Iruva. Mulantana indo, yeni na vana va maye vany, mmbo nyashi ya Nndumi Iruva ishemuwoyaa. Indi mukantana shaasa kikwaani itanwa, mmushekooywaa ni renga fo 11Amaria, nkohani nniini, mbwe ashesalallya mbony shoose yeto tikwaani na Nndumi Iruva, nawe Sebadia mwana wa Ishmaeli Kafnawa Yuda mmbwe ashesalallya mbony shoose tikwaani na ushilyi, na Valevi mmbo vashevaa vesalallya. Kapyeny nngoo mwiinutye mavavaso yaa moose, nawe Nndumi Iruva namukaye yeni mukee na usumanu.”
Currently Selected:
2 MBONY TA FYEERI 19: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
