2 MBONY TA FYEERI 20
20
Edomu yakapwa fira
1Kulandere mikonu miingyi, matorito a Moabu na Amoni vakasanga amwi na Vameuni maata vakakapa Yuda. 2Vandu maata vesha vakavia mangyi Yehoshafati, “Itorito iniini lyansha ishekapa fira kwafo lyuuka Edomu, kwakulyaa ya yeeve lya Shumbi. Vammaa itira mifungwa Hasason lamari.” (Yelyi ni irina lyingyi lya Engedi) 3Yehoshafati katirwa mmbwerei, katereva Nndumi Iruva nantetere. Kavia vandu va Yuda woose vafinge. 4Vandu vakasha Yerusalemu, wooka miriny ya Yuda myoose, vakakuumbyaa amwi naambo vatereve nndumi Iruva nawaekye. 5Yehoshafati kasalala nnang'ani ya mamwiingyi ulya wa vandu va Yuda na Yerusalemu mbee ya uvasha wiiya lwa mmba ya Nndumi Iruva. 6Katereva na unyanga waasha kaamba, “Woi Nndumi Iruva, Iruva wa vasawoye veru, yewe mmbwe Iruva kukee iruveeu! Yewe ni mwiishillya mangyi toose urukeny mmbo kutiri wiidimi na finya, nta nkwiifo ashiidimaa ikusiika-fo. 7Ni yewe woi Iruva weeru, ni yewe kwaanta veni uruka yelu, kyeeri vandu vafo Israeli veanga kunu urukeny yelu kwaniinga vana va mmba ya Abrahamu mbuya yafo, luve uruka lwawo llung'anu. 8Na kunu mfo kundo vakai, na ikutannya-fo mmba kyaiindya irina lyafo, vevikye nsia 9sheelyi vakawoywa ni renga shoose fira, ndwari shikasha, ao shaa, mmbo vashaa ishesalala usanguny lwa mmba yei mbee yaa usanguny lwafo, vakufuuye fima fyawo na yewe kushevaarannya na ivakira. 10Ulaalu vandu va Amoni, Moabu na va ifumbu lya Seiri, valya kulare kweniingya vasawoye veru muumu wa ivapaana kyeeri vekeyuuka Misri vakeera kipwa kuleefo kindo kyevepaana. 11Lolaany kindo vakeelutannya, mmbo vakeesha ilusoka uruka llwa kweluniinga luve masaa eru. 12Yewe mmbwe Iruva weeru! Lukapanye mmbe, mashika yese llutiri finya isiika yeva vatiri itorito litiri finya ing'ani indi-fo. Llwiishi kindo kyeetana fo kuuta ngyeekya yuuka kwafo, nnyo luvikye nsia.” 13Womi va Yuda woose amwi na vaka vawo na vana vawo, mmbo veselelyi mbee ya Nndumi Iruva. 14Llyo Mumuyo wa Nndumi Iruva, esheya umwi wa Valeti ekee nnang'ani yaawo, avangwaa Yahasieli mwana wa Sekaria, mwana wa Benaya, mwana wa Yeieli, mwana wa Matania, wa ufyari lwa Asafu. 15Yahasieli kaamba, “Yeni vandu va Yuda, na mangyi Yehoshafati, na valya woose vakee Yerusalemu arannyiny, Nndumi Iruva mmbo amuvia indi: mulaereye, nta mulasavae kimaruma kya itorito yelyi lyingani indi-fo. Mashika fira yei nshi yaany fo, ni ya Iruva. 16Ndesi vakapeny misa, kyeeri veefo vasamaa imungo lya sisi. Mmbo mushekooya alya masiiyony a imungo, taari ya ngama ya kasa koomu ka Yerueli: 17Mmukwaani ikapana fira yei fo. Yeni kwaaleny safu nsi, mukavereya mulole shaasa Nndumi Iruva efo ekapana misa ando any. Yeni vandu va Yuda na Yerusalemu, mulasavae nta mulasheyeereya fo. Endeny fireny, nawe ndumi Iruva ashekaa ando amwi neeni!” 18Naasa mangyi Yehoshafati kafiirya ndi kifulufulu na vandu woose va Yuda na Yerusalemu vakasheindya Nndumi Iruva. 19Valevi na ufyari lwa Kohati na Kora vakasalala na irumisha Nndumi Iruva, Iruva wa Israeli, kwa unyanga waasha nnu. 20Lya ndesi ya vayo, vakakwiipoo ngama shuru, vakafika kasa koomu ka Tekoa. Yelyi veefo vakwipoo, Yehoshafati kasalala kavavia, “Shaarannyiny, yeni vandu va Yuda na valya va Yerusalemu! Indyeny Nndumi Iruva, Iruva waany, llyo mutiraa finya. Na yiindya vakisuku vakwe llyo mushekooya ivinga.” 21Mangyi ekimaa yuumburana na vandu, kasauwa veembi vaangu, kavavia varee soori tawo veere mbee ya itorito, veshimbaa, “Aniny Nndumi Iruva, mashika isarya lyakwe ni lya llung'anu.” 22Kyeeri valepooka yiimba na irumisha, Nndumi Iruva kavafuluta makusaro a veekapa fira va Amoni, Moabu na va ifumbuu lya Seiri valya veshaikapana na Yuda. Na vekapana yewo vakavingwa. 23Vandu va Amoni na va Moabu vakakapa misa veni va ifumbuu lya Seiri, vakapooka ikukapa veni kwa veni vakakumamita piny. 24Itorito lya Yuda lyikifika alya kutiri nnara wa uringyi kulya kasa koomu, mmbo velola taari ya vakiduva vawo vakalollya minying'a ikwaalalye wo ando. Kuleefo nta nndu umwi aleturushuka. 25Yehoshafati na vekapana vakwe vakeenda yiipoo mifungwa, vakakooya ng'umbe shiingyi, masaa, soori na findo fingyi fya wuuru. Mmbo verunda ando a mikonu iraru sele veshiinga mifungwa yeyo, valaidimi nta iimaa fo mashika yekee miingyi. 26Nkonu wa kaana vakandekuumbya kulya Imungony lya Sifa, vakanderumisha Nndumi Iruva, kya mesha yoo moose alevatannya. Nkyo kimaruma imungo yelyo lyiwaangwa Imungo lya Sifa kufike innu. 27Naasa Yehoshafati keenda we na itorito lyakwe vakafika Yerusalemu vefuraa kimaruma yelyi Nndumi Iruva alevakapannya. 28Vakifika Yerusalemu vakeera ruru fika mmba ya Nndumi Iruva vakandekapya-fo finanda, fivale na mbembe. 29Ngyumangyi shoose mmbo tetirwa ni usau kyeeri teeta shaasa Nndumi Iruva ekapannya Israeli. 30Naasa Yehoshafati kashillya kwa urilalyi, na Iruva kanniinga urilalyi taari toose.
Ufishony lwa ushilyi lwa Yehoshafati
(1 Vam 22:41-50)
31Yehoshafati mmbo etiri myaaka makumi araru na iraanu kyeeri epooka ishilya Yuda. Epooka ishilya uka Yerusalemu ando a myaaka makumi avi na iraanu. Maye evangwaa Asuba mfu wa Shilhi. 32Katana mesha usanguny lwa Nndumi Iruva, kavaka Asa we ndeye. 33Indi nnyelyamara kidoorony alya ando kweyuutya mirumwa yaawo fo. Nta vandu mmbelakana na maruva a wongo na yiindya Iruva yeto wa ndeye vawo fo. 34Mashora engyi moose yoo Yehoshafati atannyi kupookya kyeeri kya ushilyi lwakwe mmbo tikee shireiye yefo kyitabuny kya Yehu mwana a Hanani, nato tikandevikwa yefo kyitabuny kya vamangyi wa Israeli. 35Numa ya mbony yeti Yehoshafati mangyi ya Yuda kashekulunga na Ahasi mangyi ya Israeli, nndu etannyi findo fikasha. 36Vesangyi amwi, vakasongosya merikebu kulya Esiogebeni tishendaa kufike Tarshishi. 37Indi Elieseri mwana wa Dodavahu ooka muriny wa Maresha kautya Yehoshafati, ukisuku kammbia, “Kimmba kwankulunga na Ahasi, Nndumi Iruva mmbo afishafisha marikebu toose yeto muletisongosya.”
Currently Selected:
2 MBONY TA FYEERI 20: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
