2 MBONY TA FYEERI 18
18
Nkisuku Mikaya Eekimba Ahabu
(1 Vam 22:1-28)
1Mangyi Yehoshafati wa Yuda ekilollya ammba nndu mmasi na yiindywa mmbandu mmbo erummbwa shila kaoora nka kwa Ahabu mangyi ya Israeli. 2Ando a myaaka myaangu, Yehoshafati kafinga kyaaro keenda Samaria kwa mangyi Ahabu. Kyeemwiindya mangyi Ahabu kadesya sukukuu niini nnu, ya Yehoshafati we na vandu vakwe eriyani nawo, kashisha ng'umbe na moonri meengyi, kyemwaaya naambo akulunge nawe vakape muri va Ramot-gileadi. 3Ahabu mangyi ya Israeli, kavia Yehoshafati mangyi ya Yuda, “A-shaasa, kukulunga neeny lweende ikapa muri wa Ramoti-gileadi?” Nawe karouwa, kammbia, “Yee, yeny shikee kimwi na yewe, vandu vakwa mmbo vandu vafo. Mmbo kushendaa neewe fireny.” 4Naasa Yehoshafati keengera kavia mangyi ya Israeli, “Kya mbony yei luvese mbele Nndumi Iruva makusaro?” 5Naasa Ahabu kavaanga ikwaanu lya vakisuku mayana aana, kavavesa, “Lukeenda ikapa muri wa Ramoti-gileadi ao luleende?” Vakammbia, “Enda! Iruva ashekukapannya!” 6Indi Yehoshafati kavesa, “Aya, kwiiyo-se nkisuku ungyi wa Nndumi iruva lushiidima immbesa makusaro?” 7Nawe mangyi ya Israeli karouwa Yehoshafati, kammbia, “Aiyo umwi, Mikaya mwana wa Imla. We lushiidima immbesa makusaro a Nndumi Iruva. Indi lyo shinsuuye mashika nnyashikunndya makasha tupu.” Yehoshafati kammbia, “Nshi nisha mangyi yaamba indo-fo.” 8Naasa, Ahabu, mangyi ya Israeli kavaanga nndu umwi nsongoru, kammbia, “Uviny nandeende Mikaya mwana wa Imla.” 9Ulaalu, mangyi ya Israeli amwi na Yehoshafati, mangyi ya Yuda, mmbo vekaaye fitima fyao fya umangyi, vekee uvasheny lwa ikapya nganu alya mwaangony nniini wa yaanga muriny Samaria, woose veree soori ta kimangyi, na kyeeri yekyo mmbo vakisukuveifo veshaawuya fisuku mmbe yaawo. 10Naasa umwi wa vaawuya kisuku yewo, Sedekia mwana wa Kenaani kakusongosikya mbembe ta minya, kaamba, “Nndumi Iruva amba Indi, “kwa mbembe yeti, mmbo kushevakapa kutani kwavamamita deny.’ 11Na vakisuku valya vengyi vakavavia sha valya va mapookyony vakavavia endeny mundekapa Ramoti-gileadi, mashika Nndumi Iruva ashemukapannya.” 12Kyeeri ekyo kyeni nndu ulya erumwa kwa Mikaya mmbo emmbya, “Vakisuku vengyi woose, mmbo valeamba sheelyi Nndumi Iruva akee kyaalu kyawo ashevakapannya, neewe shakutereva endeamba shawo.” 13Indi-we Mikaya kammbia, “Nndumi Iruva yeu eefo na muu, kilya ashivia we Iruva wakwa, nkyo shishaamba.” 14Naasa Mikaya ekifika mbee ya mangyi, mangyi kammbesa, “A-shaasa sheenda ikapa fira kulya Ramoti-gileadi ao shileende?” Mikaya karouwa, “Enda kwandevinga; Nndumi Iruva ashekukapannya.” 15Nawe mangyi kammbia, “A-mmbo kukundye shikuvavase ki-kwi, kyeeri kwiifo kurera na yeny kwisendaa irina lya Nndumi Iruva, ni kuti kushivie udede weni?” 16Nawe Mikaya kaamba, “Shilelollya vandu woose va Israeli venyanyakye yefo mafumbuu sha moonri alatiri mwiyiisa. Nndumi Iruva kaamba, ‘Vandu yeva mmbatiri nsongoru-fo; valekeye vawuye wo nndu kyeny kwakwe kwa ufoo.’” 17Nalyo yeni mangyi ya Israeli kavia Yehoshafati, “Shilekuvia-se nnyakara nashikundye mesha-fo, ni makasha tupu?” 18Naasa Mikaya kaamba, “Ulaalu arannya shikuvie irero lya Nndumi Iruva; Mmbo shilelollya Nndumi Iruva ekee rembo yefo kitiminy kyakwe kya umangyi na itorito lyakwe lyoose lya iruveeu lyiiselelyi taari ya woko lwakwe usha na umuso. 19Llyo Nndumi Iruva kavesa, ‘Mmbovi yeto aleamba Ahabu, mangyi ya Israeli naende imamikya yefo Ramoti-gileadi? Wo umwi karouwa kikwakwe. 20Naasa umwi wa mimuyo kasalala mbee ya usangu lwa Nndumi Iruva, kaamba, ‘Yeny shishendaa.’ Nndumi Iruva kammbesa, ‘Kwa ntambo ki?’ 21Nawe karouwa kaamba, ‘Mmbo shishendaa shindeallwa vakisuku vakwe woose vaambe wongo.’ Nndumi Iruva kammbia, ‘Yewe kushiidimaa, ulaalu endaany kwandetana indo.’” 22Naasa ni indo mbony tikai. Nndumi Iruva ni indo aleallwa vakisuku yeva vafo vaambe wongo. Na Nndumi Iruva aamba, mmbo kushekwanannya-fo na nsindara. 23Llya yeni nkisuku Sedekia mwana wa Kenaani kashongya Mikaya kankapa woyi kammbia, “Ni kwa shya-kyi Mumuyo wa Nndumi Iruva alesama kwakwa, kasha irera na yewe?” 24Mikaya kammbia, “Nkonu yeto kushekusurumaa yefo mmba nnang'ani llyo kushemanya mbony yei.” 25Nawe mangyi ya Israeli koota ishingo, kaamba, “Tireny Mikaya mummbire kwa Amoni nniini wa miri, na kwa Yoashi mwana wa mangyi. 26Muvavie vambike kifingyon vanniinge nkate na mura kutani shawuya kimmpwa.” 27Llyo Mikaya aamba, “Kwammbuya kimmpwa, naasa llyo kumanyaa Nndumi Iruva nnyerera neeny.” Naasa keengera irera, “Aranyiny, yeni vandu woose!”
Ufu lwa Ahabu
(1 Vam 22:29-35)
28Naasa mangyi ya Israeli keenda amwi na mangyi Yehoshafati ya Yuda indekapa Ramotigileadi. 29Mangyi ya Israeli kavia Yehoshafati, “Yeny mmbo shiraa soori tilakee ta kimangyi indekapana fira, indi yewe raa soori tafo ta kimangyi.” Kweekyo mangyi ya Israeli keenda fireny nalaree soori ta kimangyi. 30Mangyi ya Aramu emmbavasa vesaalallya mitika vakwe valashekapa nndu ungyi moose kuuta mangyi ya Israelifo 31Naasa llya velollya mangyi Yehoshafati, woose mmbo vekusara mmbwe mangyi ya Israeli, vakapooka inkapa. 32Indi vesalallya valya vekimanya nshi mangyi ya Israeli vakainduka vakawuya. 33Indi umwi wa veekapana wa Aramu keera mfe ukandekapa mangyi ya Israeli alya ando soori yakwe ya minya ikee shilungye. Na yoo kweni mangyi Ahabu kavia ulya eerye ikari namuute kulya uvasheny lwa fira. 34Nkonu yeto fira ikava shinyaasi, ukya ngama kufike nkwaany, na kunu mangyi ya Israeli akwaamirye ikariny lwakwe elolaa Vaashami, kufike nkwaany kakumba muu.
Currently Selected:
2 MBONY TA FYEERI 18: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
