2 MBONY TA FYEERI 17
17
Yehoshafati ava mangyi
1Yehoshafati mmbwe evikwa mangyi, ando a ndeye Asa, kaseleesa umangyi lutiri finya uwe ya Israeli. 2Kavika matorito miriny myoose ya Yuda, na kundo koose kulya Yudaya na miri ifitani na Efraim kulya koose ndeye we Asa entira kandevika-fo matorito eeringa. 3Nawe Nndumi Iruva kandekaa kyaalu kyakwe kammbikya mbora, mashika Yehoshafati mmbo elatya ngyayo ta ndeye ta mapookyony, nta nnyeendya maruva a wongo-fo. 4We mmbwe eendya Iruva ulya eendywa ni ndeye, kainndya mavavaso akwe, nta nnyelatya mikaaye ya vandu va Israeli-fo. 5Nndumi Iruva kaseleesa ushilyi lwa mangyi Yehoshafati urukeny lwa Yuda na vandu woose vakamwiindya na imweengye findo fiingyi fya pya fikamweengye uniini. 6Kalanga nnu nriminy wakwe irundya Nndumi Iruva, na kilanya ya fyoose kawunndwa-wunndwa kundo koose maruva a wongo, na mafwanu a Ashera iruva wa kyika, wa Yuda eekai. 7Kwikee mwaaka wa kararu wa ushilyi lwakwe, Yehoshafati karuma: Ben-haili, Obadia, Sekaria, Netanaeli na Mikaya, vendelosha kulya miriny ya 8Valevi kyeenda na Vakohani vavii vakeenda kimwi nawo. Valevi yewo ni: Shemaya, Netania, Sebadia, Asaheli, Shemiramoti, Yehonatani, Adonia, Tobia-donia na vakohani vekee ni: Elishama, na Yehoramu 9mmbo vekurika kyitabu kya mavavaso a Nndumi Iruva, vvakarunguka nakyo kulya mirin ya Yuda veloshaa vandu.
Finya na wiidimi lwa Yehoshafati
10Nndumi Iruva, mmbo evika weeresi ngyumangyi toose tilya teefiti na Yuda, tikaereya ikapa fira na Yehoshafati. 11Vafilisti maata vakaenngye Yehoshafati fesa, na findo fiingyi fya pya, na Vaarabu vakamweengye suva ta moonri fiku mfungare na mayana mfungare na ndafu fiku mfungare na mayana mfungare. 12Kweekyo Yehoshafati mmbo engera iva na finya mmwasi. Katana ulale na kundo kweevika shoonga. 13Kweekyo etiri kundo kuniini kweevika shoonga kulya miriny ya Yuda. Yefo Yerusalemu kavika-fo vasikari vaantu veeshi ikapa fira. 14Na yelu llo uramba lwawo kweelatya ngyufyari ta vandeye vawo. Adna kava mmbwe nniini wa vasikari vandu fiku mayana araru va isanga lya Yuda. 15Wa kavii ekee ni Yehohanani nawe kava na vasikari fiku mayana avi makumi nyanya kwasi ya yakwe. 16Wa kararu ekee Amasia mwana wa Sikri, nawe etiri vasikari fiku mayana avii kwasi yakwe Amasia kakuuta irundya Nndumi Iruva we muni kuleefo wiitiki. 17Eliada ntakusu, atiri finya, wa mmba ya Benyaminy, etiri vasikari fiku mayana avii kwasi yakwe vatiri ngyura na ngao. 18Wa kavii kwa ushilyi ni Yehosabad, kava nsongoru wa vasikari fiku iyana na makumi nyanya woose vatiri fisha fya ikapa fira. 19Vandu yeva woose, mmbo vekeeifurukannya mangyi yefo Yerusalemu, na kilanya ya fyoose mangyi kavika vasikari vengyi kulya koose kwetiri fiteshe.
Currently Selected:
2 MBONY TA FYEERI 17: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
