2 MBONY TA FYEERI 16
16
Ngusana na Israeli
(1 Vam 15:17-22)
1Wikee mwaaka wa makumi araru n a karindaru wa ushilyi lwa Asa, Baasha, mangyi ya Israeli; kakapa misa urukeny lwa Yuda kapooka itana muri wa Rama naambo nndu nalaidimi isomuka nta yaanga kwa Asa mangyi ya Yuda. 2Llyo mangyi Asa epoo fesa na saabu tuuka mbolokony ya mmba ya Nndumi Iruva na ya ushilyi, katiruma Damasko kwa Ben-hadadi mangyi ya Shamu, kammbia, 3“Lukulunge kimwi, yeny neewe shallya vande veru vekai, lola mmbo shakurikya fesa na saabu ya pyai, naambo kufishe ukulungo lwiifo nnang'ani yafo na mangyi Baasha wa Israeli naambo nalaengere ishikapa mmwasi.” 4Nawe mangyi Ben-hadadi kairikyana na mangyi Asa; wa Yuda. Karuma vaniini va vasikari vakwe, vandekapa misa kulya urukeny lwa Israeli, vakatira miri ya Iyoni, Dani, Abel-maim, na miri myoose ya Naftali ilya yetiri fisike fya shoonga. 5Mangyi Baasha ekiita mbony ya ngapo yeto, kaalasha makusaro yoo etana muri wa Rama. 6Llyo mangyi Asa eruma va Yuda woose vakashaasamira-fo mawe a Rama na mbau, fikee ni findo filya Baasha enndeesya fitana muri wa Rama-yefi mfyo Asa endetana nafyo miri ya Geba na Mispa
Nkisuku Hanani
7Kyeeri yekyo mmbo mwiilollya Hanani eengya mangyi Asa wa Yuda, kammbia, “Kimmba kulevika nsia kwa mangyi ya shamu ando a ivika nsia kwa Nndumi Iruva, Iruva wafo, kwaashuka itorito lya mangyi ya Shamu. 8A shaasa, Veesopia valya na Valibya nshi veeke veengyi mmwasi, na mitika na vesaama frasi veengyi? Indi kimmba kwevika nsia kwa Nndumi Iruva mmbo ekweekya kwaidima ivavinga. 9Nndumi Iruva mmbwe nringyi wa ulana na vandu vakwe woose, kavaniinga finya na wiidimi valya vammbikye nsia. Ekyi ni kindo kya utondo kuletana, na kimmba ni indo, kupookya ulaalu, mmbo kuvaa na misa wo kyeeri.” 10Kimaruma kya marero yaa, mangyi Asa kasua nnu, kutani avika mwilollya Hanani kifingyony, kupookya yoondo mangyi Asa kapooka iva nnyaasi na ilyisa vandu ukiva nnu.
Mafurumyony a Ushilyi lwa Asa
(1 Vam 15:23-24)
11Mashora a Asa, uka mapookyony kufike masiiyony, mmbo akee mareiye yefo kyitabuny kya “Vamangyi va Yuda na Israeli.” 12Kwikee mwaaka wa makumi araru na kyeenda, ya umangyi lwakwe, Asa mmbo elwaa ndwari ya marende, kalwaa nnu. Naakwa ni indo, Asa nnyekunda yaalashika nriminy na yaalukya Nndumi Iruva naambo namweekye-fo, mmbo evika nsia kwa vaanga naambo vamweekye. 13Numa ya vayo, Asa kafwa kwikee mwaaka wa makumi aana na lyimwi wa ushilyi lwakwe. 14Karikwa mbangeny kundo ekusongosya we muni kulya muriny wa Davidi. Vakamwaara isandukuny lyetiri mafura afwaamaa a wo ngata akee madeesye mmbandu va mashora yoo. Vakaata muro nniini kya imwiindya.
Currently Selected:
2 MBONY TA FYEERI 16: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
